অসম চৰকাৰ অৱহেলা আৰু অমনোযোগিতাৰ প্ৰতিবাদত উত্তৰ-পূৱ বাতৰি কাকত সংস্থাই ১০, ১১ আৰু ১২ মাৰ্চত প্ৰকাশ পাবলগীয়া কাকতত ৰাজ্য চৰকাৰৰ কোনোধৰণৰ বাতৰি, ফটো আৰু বিজ্ঞাপন প্ৰকাশৰ পৰা বিৰত থকাৰ সিদ্ধান্ত গ্ৰহণ কৰিছে। শুকুৰবাৰে অগ্ৰদূত ভৱনত অনুষ্ঠিত বৈঠকত সংস্থাই এই সিদ্ধান্ত লয়।
উল্লেখযোগ্য যে, বিভিন্ন দাবীলৈ উত্তৰ-পূৱ বাতৰি কাকত সংস্থাৰ এটা প্ৰতিনিধি দলে বিগত বৰ্ষৰ আৰম্ভণিতে মুখ্য মন্ত্ৰী সৰ্বানন্দ সোণোৱালক সাক্ষাৎ কৰিছিল আৰু অভিযোগসমূহ উত্থাপন কৰিছিল। মুখ্যমন্ত্ৰী সোণোৱালে শীঘ্ৰেই দাবী সমূহ পুৰণ কৰাৰ প্ৰতিশ্ৰুতি দিছিল যদিও এবছৰ উকলি যোৱাৰ পাছতো সেয়া কাৰ্য্যত পৰিণত নোহোৱাৰ বাবেই সংস্থাই কঠোৰ সিদ্ধান্ত লবলৈ বাধ্য হ’ল বুলি উল্লেখ কৰে।
বিগত সময়ছোৱাত নিউজ প্ৰিণ্টকে ধৰি অন্যান্য ছপা সামগ্ৰী তথা পৰিবহণ ব্যয় বহু পৰিমানে বৃদ্ধি পাইছে যদিও সেই অনুপাতে ২০১৪ চনৰ পাছৰে পৰা অসমৰ বাতৰি কাকতসমূহত চৰকাৰী বিজ্ঞাপনৰ নিৰিখ বৃদ্ধি পোৱা নাই যাৰ বাবে সংবাদ প্ৰতিষ্ঠান সমূহ সমস্যাৰ সন্মুখিন হ’বলগীয়াত পৰিছে।
উল্লেখযোগ্য যে, গুৱাহাটী উচ্চ ন্যায়ালয়ৰ নিৰ্দেশ মৰ্মে বিজ্ঞাপনৰ নিৰিখ প্ৰতিবছৰে বৃদ্ধি কৰা আৰু বিজ্ঞাপনৰ দেনা কেন্দ্ৰীভূতভাৱে আদায় দিয়াৰ দায়িত্ব চৰকাৰৰ আছিল যদিও চৰকাৰে আজিলৈ ন্যায়ালয়ৰ নিৰ্দেশক অমান্য কৰি কাৰ্য্যকৰী ব্যৱস্থা গ্ৰহণ নকৰিলে।
আনহাতে, ইয়াৰ পাছতো চৰকাৰে নিজৰ স্থিতি সলনি নকৰিলে ভবিষ্যতে আৰু অধিক কঠোৰ পদক্ষেপ গ্ৰহণ কৰাৰ হুংকাৰ দিছে উত্তৰ-পূৱ বাতৰি কাকত সংস্থায়।