উত্তৰ কোৰিয়াৰ নেতা কিম জং উনে দেশৰ এটা পাৰমাণৱিক চাবমেৰিন কাৰখানা পৰিদৰ্শন কৰিছে। ৰাছিয়াৰ ৰাষ্ট্ৰপতি ভ্লাদিমিৰ পুটিনৰ পৰাও তেওঁ এটা বাৰ্তাও লাভ কৰে।
বাৰ্তাটোত পুটিনে দুয়োখন দেশৰ মাজত থকা “অবিচ্ছেদ্য বন্ধুত্ব”ক অতিশয় প্ৰশংসা কৰে। পিয়ংইয়াঙৰ ৰাষ্ট্ৰীয় সংবাদ সংস্থা কেচিএনএ-ই বৃহস্পতিবাৰে এই কথা প্ৰকাশ কৰিছে।
বিশ্লেষকসকলে কয় যে ৰাছিয়াই প্ৰায় চাৰি বছৰ পূৰ্বে ইউক্ৰেইনত পূৰ্ণাংগ আক্ৰমণ আৰম্ভ কৰিছিল। তেতিয়াৰ পৰাই উত্তৰ কোৰিয়াৰ সৈতে দেশখনৰ সম্পৰ্ক অধিক ঘনিষ্ঠ হৈ পৰিছে। মস্কোৰ হৈ ইউক্ৰেইনৰ বিৰুদ্ধে যুঁজিবলৈ পিয়ংইয়াঙে সৈন্য প্ৰেৰণ কৰিছে। বিনিময়ত ৰাছিয়াই উত্তৰ কোৰিয়ালৈ আৰ্থিক সাহায্য, সামৰিক প্ৰযুক্তি আৰু খাদ্য তথা ইন্ধনৰ যোগান প্ৰেৰণ কৰিছে।
কোৰিয়াৰ কেন্দ্ৰীয় বাতৰি সংস্থা (কেচিএনএ)ৰ মতে, কিমলৈ প্ৰেৰণ কৰা বাৰ্তাত পুটিনে কয় যে ৰাছিয়াৰ কুৰ্স্ক অঞ্চলত উত্তৰ কোৰিয়াৰ সৈন্যৰ “বীৰত্বপূৰ্ণ অৱদান”য়েই “মস্কো আৰু পিয়ংইয়াঙৰ মাজৰ অবিচ্ছেদ্য বন্ধুত্বক স্পষ্টভাৱে প্ৰমাণ কৰে।” যোৱা সপ্তাহতে পিয়ংইয়াঙত পুটিনৰ এই বাৰ্তা আহে।
দক্ষিণ কোৰিয়া আৰু পশ্চিমীয়া চোৰাংচোৱা সংস্থাৰ অনুমান অনুসৰি উত্তৰ কোৰিয়াই নিজৰ হাজাৰ হাজাৰ সৈন্য ৰাছিয়ালৈ প্ৰেৰণ কৰিছে। উত্তৰ কোৰিয়াৰ সৈন্যই প্ৰথমে কুৰ্স্কলৈ গৈছিল। তেওঁলোকৰ হাতত আছিল আৰ্টিলাৰীৰ গোলা, মিছাইল আৰু দীৰ্ঘ দূৰত্বৰ ৰকেট চিষ্টেম।
দক্ষিণ কোৰিয়াই অনুমান কৰিছে যে ৰাছিয়াৰ হৈ যুঁজি থকা অৱস্থাত প্ৰায় ২০০০ উত্তৰ কোৰিয়াৰ সৈন্য নিহত হোৱাৰ লগতে আৰু কেইবাহাজাৰ সেনা আহত হৈছে।
উত্তৰ কোৰিয়াই চলিত মাহত স্বীকাৰ কৰে যে তেওঁলোকৰ সৈন্যই কুৰ্স্কত মাইন নিষ্কাশনৰ কাম কৰিছিল, এই প্ৰক্ৰিয়াত কেইবাজনো সৈনিক নিহত হৈছিল।
বৃহস্পতিবাৰে কেচিএনএই প্ৰকাশ কৰে কিমৰ কেইবাখনো ফটো। এখনত তেওঁক কন্যা কিম জু আৰু অন্যান্য বিষয়াৰ সৈতে এখন বৃহৎ চাবমেৰিনৰ কাষেৰে পাৰ হৈ যোৱা দেখা গৈছে।
আন এখন ফটোত কিমক হাঁহি হাঁহি বিষয়াৰ সৈতে কথা পতা দেখা গৈছে, তেওঁৰ কাষত থিয় হৈ আছে কন্যা কিম জু।
কেচিএনএৰ প্ৰতিবেদনত কিম জং উনৰ উদ্ধৃতি দি কোৱাও হৈছে যে পিয়ংইয়াঙে দক্ষিণ কোৰিয়াই পাৰমাণৱিক চাবমেৰিন নিৰ্মাণ কৰিলে ইয়াক আগ্ৰাসনমূলক কাৰ্য্য হিচাপে গণ্য কৰিব যিয়ে ইয়াৰ নিৰাপত্তা আৰু সামুদ্ৰিক সাৰ্বভৌমত্বক গুৰুতৰভাৱে উলংঘা কৰে।
উত্তৰ কোৰিয়াৰ নৌসেনাক আধুনিকীকৰণ আৰু ইয়াত পাৰমাণৱিক অস্ত্ৰ সংযোজনৰ কাম বৃদ্ধি কৰাৰ জৰুৰী প্ৰয়োজনীয়তাৰ কথাও কিমে বৰ্ণনা কৰে।
কেচিএনএৰ প্ৰতিবেদনত এইটোও কোৱা হৈছে যে কিমে বিষয়াসকলক তেওঁৰ নৌসেনাৰ পুনৰ্গঠন পৰিকল্পনাৰ বিষয়ে বুজাই দিছিল আৰু পানীৰ তলত নতুন গোপন অস্ত্ৰৰ গৱেষণাৰ বিষয়ে বুজ লৈছে। এই বিষয়ত আৰু কোনো সবিশেষ দিয়া হোৱা নাই।
