আদিবাসী ভাষাৰ প্ৰথমখন চলচ্চিত্ৰৰ নিৰ্মাতা, বিশ্বনাথৰ প্ৰাক্তন বিধায়ক তথা অসমীয়া ছবিজগতৰ এগৰাকী পৰিচিত অভিনেতা পদ্মনাথ কৈৰীৰ আজি দেহাৱসান ঘটে।
আজি পুৱা প্ৰায় ৬ বজাত গুৱাহাটীৰ ডাউন টাউন হস্পিতালত তেওঁ শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৭০ বছৰ।
বিশ্বনাথৰ সাকোমঠা চাহ বাগিচাৰ (সাধাৰু) নিবাসী কৈৰীৰ শাৰীৰিক অসুস্থতাৰ বাবে দীৰ্ঘদিন ধৰি হস্পিতালখনত চিকিৎসা চলি আছিল।
উল্লেখযোগ্য যে ১৯৮৫ চনত বিশ্বনাথ বিধানসভা সমষ্টিৰ নিৰ্দলীয় বিধায়ক হিচাপে দায়িত্বভাৰ গ্ৰহণ কৰা কৈৰী ৰাজনৈতিক ক্ষেত্ৰখনৰ লগতে সাংস্কৃতিক আৰু চলচ্চিত্ৰ জগতৰো এটা পৰিচিত নাম।
তেওঁ প্ৰথমখন আদিবাসী জনগোষ্ঠীৰ বোলছবি ‘বুধু-অৰ্জুন’ নিৰ্মাণ কৰাৰ লগতে ছবিখনৰ বুধু চৰিত্ৰটোত অভিনয় কৰিছিল। ইয়াৰ উপৰি ৰঙানদী, ৰতনলাল আদি কেইবাখনো অসমীয়া ছবিতো তেওঁ অভিনয় কৰিছে।
From political to cultural arena, Padmanath Koiri had greatly contributed towards the upliftment of Tea tribes communities of Assam.
My condolences on the sad demise of noted actor, filmmaker and former Biswanath MLA. May the departed soul Rest in Peace. pic.twitter.com/AaZe1Ux5nK
— Sarbananda Sonowal (@sarbanandsonwal) June 8, 2020
পদ্ম কৈৰীৰ মৃত্যুত মুখ্য মন্ত্ৰী সৰ্বানন্দ সোনোৱালে শোক প্ৰকাশ কৰাৰ লগতে চাহ জনগোষ্ঠীৰ উন্নতিৰ লগতে ৰাজনৈতিক আৰু সাংস্কৃতিক ক্ষেত্ৰলৈ আগবঢ়োৱা অৱদানক শ্ৰদ্ধাৰে সোঁৱৰে। প্ৰয়াত কৈৰীয়ে পত্নী, দুজন পুত্ৰ আৰু এগৰাকী জীয়ৰীক এৰি থৈ যায়।
