আজি বিশিষ্ট সাহিত্যিক, অসম সাহিত্য সভাৰ প্ৰাক্তন সভাপতি তথা কথা শিল্পী ইমৰাণ শ্বাহৰ ৮৮ বছৰীয়া জন্মদিন।
আজিৰ এই বিশেষ দিনটোত সাহিত্যিক গৰাকীক শুভেচ্ছা জনাবলৈ তেখেতৰ ধাইআলিস্থিত বাসগৃহত ভিৰ কৰেহি বিভিন্ন দল-সংগঠনৰ লগতে অজস্ৰ গুণমুগ্ধই।
অসম সাহিত্য সভাৰ প্ৰাক্তন সভাপতি তথা বিশিষ্ট সাহিত্যিক ইমৰাণ শ্বাহৰ ওপজা দিনত শিৱসাগৰ জিলা সাহিত্য সভাৰ উদ্যোগত কথাশিল্পী ইমৰাণ শ্বাহৰ বাসগৃহত তেওঁৰ জন্মদিন উদযাপন কৰা হয়।
উক্ত অনুষ্ঠানত ‘ইমৰাণ শ্বাহৰ জীৱন বৈভৱ’ শীৰ্ষক এখনি তথ্য চিত্ৰও উন্মোচন কৰা হয়।
বিখ্যাত সাহিত্যিক গৰাকীৰ বৰ্ণিল জীৱন পৰিক্ৰমা সামৰি প্ৰস্তুত কৰা হৈছে এই তথ্যচিত্ৰ খন। ড০ মায়াশ্ৰী গোস্বামী, লুইত চলিহা আৰু নৱনীত হাজৰিকাৰ প্ৰচেষ্টাত নিৰ্মাণ কৰা হৈছে এই তথ্যচিত্ৰ খনি।
উল্লেখ্য যে ১৯৩৩ চনত শিৱসাগৰৰ ধাইআলিত জন্মগ্ৰহণ কৰা কথাশিল্পী গৰাকীয়ে নৱম শ্ৰেণীত পঢ়ি থাকোতেই বনবাসী নামৰ এখন কাব্য সংকলন প্ৰকাশ কৰি সাহিত্য জগতত ভুমুকি মাৰিছিল।
তেতিয়াৰ পৰাই একেধাৰে বিভিন্ন গল্প, নিবন্ধ, কবিতা পুথি ৰচনা কৰি অসমীয়া সাহিত্যৰ ভড়াল চহকী কৰিছে।
ঈষান দত্ত, অনামিকা বৰুৱা, অমিতাভ বৰুৱা আদি ছদ্ম নামেৰে বহু গল্প কবিতা লিখিছিল কথাশিল্পী গৰাকীয়ে।
সংগীতৰ সিপাৰে, জোনাকৰ ছবি, তানচেন, ইনমিতা, ক্ৰান্তিৰেখা, সাগৰিকা, জবানবন্দী, বন্ধ দুৱাৰ, মোৰ ফুলনিৰ ফুল, দৃষ্টি-সৃষ্টি, কুকুহা, বনিদী বিহংগম কান্দে, পিয়া মুখচন্দা পাথিক, দোকমোকালি আদিৰ দৰে বহু গ্ৰন্থ আৰু কবিতা পুথি লিখিছে।
২০১২ চনৰ অসম সাহিত্য সভাত সভাপতিৰ পদ অলংকিত কৰাৰ লগতে বিশিষ্ট সাহিত্যিক গৰাকীক অসম চৰকাৰে অসম উপত্যকা সাহিত্য বঁটা আৰু আজানপীৰ বঁটাৰে সন্মানিত কৰিছে।
ওপজা দিনত ইমৰাণ শ্বাহে নতুন প্ৰজন্মৰ লেখক লেখিকা সকলক উদ্যেশি কয়, ‘পৃথিৱী সলনি হ’ল সমাজ সলনি হ’ল, এই পৰিৱৰ্তিত ব্যৱস্থাত তেওঁলোকে সাৱধানতাৰে অধ্যয়ণ কৰে আৰু সময়ল লগত খাপ খুৱাই আগুৱাই যাবলৈ চেষ্টা কৰিব লাগে’।
তেওঁ লগতে কয়, ‘বৰ্তমানৰ অসমৰ পৰিস্থিতি জাতীয় জীৱনৰ বাবে ভয়লগা হৈ পৰিছে। আমি যিখন অসম চিনি পাও সেইখন অসম নোহোৱা হৈ গ’ল। অসমখন অসম কৰি ৰাখিবলৈ নৱপ্ৰজন্মই পদক্ষেপ লওক’।
ওপজা দিনত কথাশিল্পী ইমৰাণ শ্বাহলৈ নৰ্থ-ইষ্ট নাওৰ তৰফৰ পৰাও জনোৱা হ’ল আন্তৰিক শুভেচ্ছা। সক্ৰিয় হৈ থাকক তেওঁৰ কলম। দীৰ্ঘায়ু হওঁক তেওঁৰ জীৱন।