ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াক পুনৰ সমালোচনাৰে পশ্চিম বংগৰ মুখ্য মন্ত্ৰী মমতা বেনাৰ্জীয়ে ইয়াক নিৰ্বাচন কেন্দ্ৰিক কাৰচাজি বুলি অভিহিত কৰিছে।
“পশ্চিম বংগত কেতিয়াও এন আৰ চিৰ কাম হ’বলৈ নিদিওঁ”, আজি কলকাতাৰ নেতাজী ইণ্ড’ৰ ষ্টেডিয়ামত সম্পন্ন এটা চৰকাৰী কাৰ্য্যসূচীত ভাগ লোৱাৰ সময়ত ভাৰতৰ ‘অগ্নিবৰ্ষী’ নেত্ৰীগৰাকীয়ে স্পষ্টকৈ কয়।
“মোৰ বয়সৰ বহুতো মানুহ আছে, যি তেওঁলোকৰ জন্মৰ প্ৰমাণপত্ৰ দিব নোৱাৰিব। মোক খুজিলেও মই জন্মৰ প্ৰমাণপত্ৰ দিব নোৱাৰিম, কাৰণ তেতিয়া ব্যৱস্থাটোৱেই বেলেগ আছিল।” যুক্তি দাঙি ধৰে বেনাৰ্জীয়ে।
তেওঁ আকৌ কয়, “এতিয়া যদি আপুনি জন্মৰ প্ৰমাণপত্ৰ দাখিল কৰিব নোৱাৰে, আপোনাক এন আৰ চিৰ নামত আন দেশৰ নাগৰিক বুলি ধৰা হ’ব।”
“সিহঁতে (চৰকাৰে) এতিয়া কোনে নাগৰিকত্ব পাব কাক এন আৰ চিৰ পৰা বাহিৰ কৰা হ’ব, সেয়া নিৰ্ধাৰণ কৰিবলৈ ধৰিছে। এইবোৰ নিৰ্বাচনকেন্দ্ৰিক কাৰচাজিৰ বাদে একো নহয়। এইবোৰত গুৰুত্ব নিদিব।” দিদি খ্যাত নেত্ৰীগৰাকীয়ে কয়।
“আমি জীয়াই থকালৈকে আমাৰ ঠাইত এইটো হ’বলৈ কেতিয়াও নিদিওঁ”, নেত্ৰীগৰাকীয়ে এন আৰ চিক নসাৎ কৰে এইদৰে।
ইপিনে কেন্দ্ৰীয় চৰকাৰক নাগৰিকত্ব সংশোধনী বিধেয়কখন অনা বাবে কঠোৰ ভাষাৰে সমালোচনা কৰে মমতাই।
“কেন্দ্ৰীয় চৰকাৰে অনা নাগৰিকত্ব সংশোধনী বিধেয়কখনেও মানুহৰ মনত অশান্তি আনিছে”, মমতাৰ ভাষ্য।
প্ৰসংগক্ৰমে উল্লেখ কৰিব পাৰি যে অসমত চলি থকা এন আৰ চি উন্নীতকৰণ প্ৰক্ৰিয়াটোৰ আটাইতকৈ কঠোৰ সমালোচক হিচাপে মমতাৰ বেচ পৰিচিতি আছে। তেওঁৰ বক্তব্যই অসমত অস্থিৰতাৰ সৃষ্টি কৰিছিল এন আৰ চিৰ চূড়ান্ত খচৰা প্ৰকাশৰ সময়ত।