হাৰিয়ানাৰ গুৰুগ্ৰাম জিলাৰ মানেচৰত থকা ৰাষ্ট্ৰীয় নিৰাপত্তাৰক্ষী বাহিনী বা চমুকৈ এন এছ জিয়ে এক ঐতিহাসিক পদক্ষেপ গ্ৰহণ কৰিছে। ৰাজ্যিক আৰক্ষী বাহিনী আৰু কেন্দ্ৰীয় সশস্ত্ৰ আৰক্ষী বাহিনীৰ মহিলা জোৱানসকলৰ বাবে এন এছ জিয়ে প্ৰথমটো ‘মহিলা কমাণ্ডো কনভাৰ্জন কোৰ্চ’ আৰম্ভ কৰিছে। সন্ত্ৰাসবাদ বিৰোধী বিশেষ অভিযানসমূহত মহিলাৰ অংশগ্ৰহণ বৃদ্ধি কৰাৰ লক্ষ্যৰেই এই গুৰুত্বপূৰ্ণ পদক্ষেপ গ্ৰহণ কৰা হৈছে বুলি এন এছ জি কৰ্তৃপক্ষই সদৰী কৰিছে।
প্ৰকাশিত তথ্য অনুসৰি, ১২ সপ্তাহৰ এই কঠোৰ প্ৰশিক্ষণ পাঠ্যক্ৰমটো এনেদৰে প্ৰস্তুত কৰা হৈছে যাতে নিৰ্বাচিত মহিলা জোৱানসকলক শাৰীৰিকভাৱে অপৰাজেয়, কাৰিকৰীভাৱে দক্ষ আৰু অভিযানৰ বাবে তীক্ষ্ণ কমাণ্ডো হিচাপে গঢ়ি তুলিব পৰা যায়। সামাজিক মাধ্যম এক্সত (X) কৰা এক পোষ্টত এন এছ জিয়ে উল্লেখ কৰে যে এই প্ৰশিক্ষণত শাৰীৰিক সক্ষমতা, নিখুঁত অস্ত্ৰ চালনা, জিম্মী উদ্ধাৰ আৰু সন্ত্ৰাসবাদ বিৰোধী অন্যান্য বিশেষ কৌশলসমূহৰ ওপৰত গুৰুত্ব আৰোপ কৰা হ’ব।
প্ৰশিক্ষণ সমাপ্ত কৰাৰ পাছত এই মহিলা কমাণ্ডোসকল নিজৰ নিজৰ মূল বাহিনীলৈ উভতি যাব আৰু তাত এক নতুন শক্তি হিচাপে কাম কৰিব। এন এছ জিৰ এই বিশেষ প্ৰশিক্ষণে তেওঁলোকৰ যুদ্ধৰ দক্ষতা আৰু সামৰিক জ্ঞান বৃদ্ধি কৰিব, যাৰ ফলত সমগ্ৰ দেশতেই সন্ত্ৰাসবাদৰ বিৰুদ্ধে যুঁজ দিয়াৰ ক্ষমতা অধিক শক্তিশালী আৰু বিস্তৃত হৈ পৰিব বুলি আশা কৰা হৈছে।
এই প্ৰশিক্ষণ কাৰ্যসূচীক মহিলা সৱলীকৰণৰ এক নৱতম অধ্যায় হিচাপে অভিহিত কৰিছে এন এছ জিয়ে। সংস্থাটোৱে স্পষ্ট কৰি দিছে যে ই কেৱল মহিলা জোৱানৰ সংখ্যা বঢ়োৱাৰ প্ৰয়াস নহয়, বৰঞ্চ তেওঁলোকক সামৰিকভাৱে শক্তিশালী কৰি তোলাৰ এক প্ৰকৃত পদক্ষেপ। এই কঠোৰ প্ৰশিক্ষণে তেওঁলোকক ভৱিষ্যতে যিকোনো কঠিন পৰিস্থিতিৰ সন্মুখীন হ’বলৈ প্ৰস্তুত কৰিব আৰু দেশৰ আভ্যন্তৰীণ নিৰাপত্তাত তেওঁলোকৰ গুৰুত্বপূৰ্ণ ভূমিকা নিশ্চিত কৰিব। পোষ্টটোৰ শেষাংশত মহিলা কমাণ্ডোসকলৰ মনোবল বৃদ্ধি কৰি এন এছ জিয়ে লিখিছে যে “যিয়ে সাহস কৰে, তেৱেঁই নেতৃত্ব দিয়ে।”
