যোৱা তিনি মাহৰ পূৰ্বে শিৱসাগৰৰ জয়সাগৰস্থিত ‘স্বপ্নালয়’ নামৰ এখন অনাথ আশ্ৰমৰ পৰিচালকে এগৰাকী কিশোৰীক যৌন নিৰ্যাতন চলোৱা বুলি অভিযোগ উঠাৰ পাছতো আজি পৰ্যন্ত একো ব্যৱস্থা গ্ৰহণ নকৰাত শিৱসাগৰৰ ৰংঘৰ চাৰিআলিত ঐক্য সেনা অসমৰ শিৱসাগৰ জিলা সমিতিয়ে পথ অৱৰোধ কাৰ্য্যসূচীৰে তীব্ৰ প্ৰতিবাদ সাব্যস্ত কৰে।
অনাথ আশ্ৰমখনৰ পৰিচালকৰ বিৰুদ্ধে কিশোৰীক যৌন নিৰ্যাতন চলোৱা বুলি অভিযোগ উত্থাপন হোৱাৰ পাছতো আৰক্ষীয়ে আজিলৈ আশ্ৰমখনৰ পৰিচালকজনক গ্ৰেপ্তাৰ নকৰা বাবেই ঐক্য সেনাই এ টি ৰোড পথ অৱৰোধ কাৰ্যসূচী ৰূপায়ণ কৰে বুলি জানিবলৈ দিয়ে।
উল্লেখ্য যে তিনি মাহৰ পূৰ্বে অনাথ আশ্ৰমৰ পৰিচালকজনৰ বিৰুদ্ধে যৌন নিৰ্যাতনৰ অভিযোগ উত্থাপন কৰি ঐক্য সেনা অসমৰ শিৱসাগৰ জিলা সমিতিয়ে শিৱসাগৰ সদৰ থানাত এজাহাৰ দাখিল কৰিছিল। সেই অনুসৰি পক্স’ আইনৰ অধীনত পৰিচালকজনৰ বিৰুদ্ধে জামিন বিহীন ধাৰাত এটা গোচৰো ৰুজু হৈছিল। কিন্তু এজাহাৰ দাখিলৰ তিনি মাহ অতিক্ৰম কৰাৰ পাছতো আৰক্ষীয়ে আশ্ৰমখনৰ পৰিচালকজনক গ্ৰেপ্তাৰ নকৰি বৃহৎ ধনৰ বিনিময়ত ৰক্ষণাবেক্ষণ দিয়া বুলিহে অভিযোগ উত্থাপন কৰিছে সংগঠনটোৱে
প্ৰায় এঘন্টা ধৰি এ টি ৰোডটো অৱৰোধ কৰি ৰখাত যাতায়ত ব্যৱস্থা সম্পূৰ্ণৰূপে ব্যাহত হৈ পৰাৰ লগতে পথটোৰ দুয়োফালে তিনি কিলোমিটাৰ পৰ্যন্ত তীব্ৰ যান-জঁটৰ সৃষ্টি হয় ৷ পথ অৱৰোধকাৰী সকলে ঐতিহাসিক দুবৰণি আলিৰো মেৰামতিৰ দাবী উত্থাপন কৰে।
