বাঘজানৰ তৈল খাদৰ অনিৰ্বাপিত জুই নিৰ্বাপনৰ দায়িত্ব অ’ এন জি চিক দায়িত্ব দিয়া হোৱা নাই। এই কথা স্পষ্ট কৰিছে অইল ইণ্ডিয়া লিমিটেডে।
উল্লেখ্য যে, বাঘজনাৰ তৈল খাদৰ যোৱা তিনি মাহ ধৰি জ্বলি থকা জুই নিৰ্বাপনত অইল ব্যৰ্থ হোৱাৰ বুলি অভিযোগ কৰি কেন্দ্ৰীয় পেট্ৰলিয়াম মন্ত্ৰণালয়ে এই অনিৰ্বাপিত জুই নোমোৱাৰ দায়িত্ব অ’এন জি চিক দিয়া বুলি বাতৰি প্ৰচাৰ হৈছিল।
এক সূত্ৰৰ খবৰ মতে কেন্দ্ৰীয় পেট্ৰলিয়াম মন্ত্ৰী ধৰ্মেন্দ্ৰ প্ৰধানে অইলৰ চি এম ডিৰ সুশীল চন্দ্ৰ মিশ্ৰৰ সৈতে ভিডিঅ’ কনফাৰেন্সিঙৰ জৰিয়তে বাঘজান কাণ্ডৰ বিষয়ে আলোচনা কৰিছিল।
সেই আলোচনাত কেন্দ্ৰীয় মন্ত্ৰী প্ৰধানে বাঘজানৰ জুই নিয়ন্ত্ৰণত অইল বাৰে বাৰে ব্যৰ্থ হোৱা বুলি অভিযোগ কৰে বুলি জানিব পৰা গৈছে।
“কেন্দ্ৰীয় মন্ত্ৰী গৰাকীয়ে কয় যে অইলৰ বিষয়াসকলৰ বাঘজানৰ সংকট নিয়ন্ত্ৰণৰ বাবে কোনো ভৱিষ্যৎ পৰিকল্পনা নাই আৰু এই ক্ষেত্ৰত তেওঁলোক ব্যৰ্থ হৈছে।” সূত্ৰটোৱে কয়।
এই বৈঠকৰ পিছতে বাতৰি প্ৰকাশ পাইছিল যে কেন্দ্ৰীয় মন্ত্ৰী গৰাকীয়ে বাঘজানৰ সংকট মোচনত অইল ব্যৰ্থ হোৱাত অ’ এন জি চিৰ চি এম ডি শশী শংকৰক এই দায়িত্ব প্ৰদান কৰিছে। কিন্তু অইলে এই বাতৰি অস্বীকাৰ কৰিছে।
সোমবাৰে অইলে দাবী কৰিছিল যে বাঘজানৰ ৫ নং তৈল খাদটোৰ নিৰ্গত গেছ বাঘজান ই পি এছলৈ নিবলৈ সক্ষম হৈছিল যদিও কিছু ঘণ্টাৰ পিছত এটা ছিদ্ৰৰ সৃষ্টি হৈ এক বিস্ফোৰণ হোৱাৰ ফলত সেই অভিযান বন্ধ ৰাখিবলগীয়া হয়।
সূত্ৰটোৰ দাবী কৰে যে সেই সমগ্ৰ অভিযান অ’ এন জি চিৰ চি এম ডিৰ ভিডিঅ’ কনফাৰেন্সৰ দ্বাৰা লাভ কৰা পৰামৰ্শ ক্ৰমে বন্ধ ৰখা হয়।
ইফালে মংগলবাৰে অ’ এন জি চিৰ চি এম ডি শশী শংকৰে বাঘজানৰ পৰিস্থিতিৰ বুজ ল’বলৈ তাত উপস্থিত হৈছিল।
অইলৰ মুখপাত্ৰ ত্ৰিদীপ হাজৰিকাই নাৰ্থ ইষ্ট নাওক জনায় যে অ’ এন জি চিৰ চি এম ডি শশী শংকৰে বাঘজানত উস্থিতিত হোৱা কথাটোকে সংবাদ মাধ্যমে বাঘজানৰ সংকট মোচনৰ দায়িত্ব অ’ এন জি চিক অৰ্পণ কৰা বুলি ভুলকৈ বাতৰি প্ৰচাৰ কৰিছে।
“অইল আৰু অ’ এন জি চি-এ যৌথভাৱে বাঘজানৰ সংকট মোচনৰ বাবে চেষ্টা কৰি আহিছে। এই সন্দৰ্ভত সংবাদ মাধ্যমত প্ৰচাৰিত ভুৱা বাতৰি সম্পৰ্কত আমি আমাৰ স্পষ্টীকৰণ প্ৰকাশ কৰিলো।” মুখপাত্ৰ হাজৰিকাই লগতে কয়।
উল্লেখ্য যে বুধবাৰে বাঘজানৰ অগ্নি নিৰ্বাপনত কৰ্মৰত অৰ্ণৱ কিশোৰ বৰদলৈ নামৰ এগৰাকী অসমীয়া যুৱ অভিযন্তা বৈদ্যুতিক শ্বক লাগি মৃত্যু ঘটিছে।
