পশ্চিম এছিয়াৰ পৰিস্থিতি ক্ৰমান্বয়ে জটিল হৈ পৰিছে। শেহতীয়াকৈ সংঘাতৰ পৰিৱেশত ওমানৰ উপকূলত তেল টেংকাৰত ড্ৰ’ন আক্ৰমণৰ সন্দৰ্ভত আন্তঃৰাষ্ট্ৰীয় মহলত এক নতুন উদ্বেগৰ সৃষ্টি হৈছে। হৰমুজ প্ৰণালীৰ সমীপত এই আক্ৰমণত ভাৰতীয়কে ধৰি কেইবাজনো নাৱিক আহত হয়।
সূত্ৰ অনুসৰি ওমানৰ মুছাণ্ডাম অঞ্চলৰ উপকূলৰ কাষেৰে হৰমুজ প্ৰণালীৰ দিশে গৈ আছিল ‘স্কাইলাইট’ নামৰ এখন তেল টেংকাৰ। টেংকাৰখনত পালাউ বুলি ফ্লেগ কৰা হৈছিল আৰু ইয়াত মুঠ ২০ জন ক্ৰু আছিল। ইয়াৰে ১৫ জন ভাৰতীয় আৰু ৫ জন ইৰাণী নাগৰিক।
মুছাণ্ডাম উপকূলৰ পৰা প্ৰায় পাঁচ নটিকেল মাইল দূৰত থকা অৱস্থাত হঠাতে এখন ড্ৰোন আহি টেংকাৰখন খুন্দা মাৰে। অভিযোগ অনুসৰি ইৰাণৰ দিশৰ পৰা নিক্ষেপ কৰা হৈছিল ড্ৰ’নখন।
আক্ৰমণৰ লগে লগে জাহাজখনত আতংক বিয়পি পৰে। ওমানী ক’ষ্ট গাৰ্ডে দ্ৰুতগতিত উদ্ধাৰ অভিযান আৰম্ভ কৰে। প্ৰথম অৱস্থাত এই আক্ৰমণত কমেও চাৰিজন লোক আহত হোৱাৰ খবৰ পোৱা গৈছিল। তাৎক্ষণিক চিকিৎসাৰ বাবে নিৰাপদ স্থানলৈ লৈ যোৱা হয়। জাহাজখনৰ কেইবাজনো নাৱিককো নিৰাপদে উলিয়াই অনা হয়।
এই ঘটনাক কেন্দ্ৰ কৰি আন্তঃৰাষ্ট্ৰীয় সমাজৰ আন এটা ডাঙৰ চিন্তা হৈছে হৰমুজ প্ৰণালীৰ কৌশলগত গুৰুত্ব। বিশ্বৰ এই অন্যতম গুৰুত্বপূৰ্ণ জলপথৰ মাজেৰে প্ৰতিদিনে বৃহৎ পৰিমাণৰ তেল পৰিবহণ কৰা হয়। অনুমান কৰা হৈছে যে বিশ্বৰ মুঠ তেল যোগানৰ প্ৰায় এক পঞ্চমাংশ এই জলপথৰ মাজেৰে পাৰ হৈ যায়। ফলত ইয়াত যিকোনো সামৰিক বা নিৰাপত্তাজনিত ঘটনাই বিশ্বৰ অৰ্থনীতিতো প্ৰভাৱ পেলাব পাৰে।
মুছাণ্ডাম অঞ্চলটোও অতি গুৰুত্বপূৰ্ণ। ওমানৰ এই অংশ ভৌগোলিকভাৱে হৰমুজ প্ৰণালীৰ প্ৰৱেশদ্বাৰত অৱস্থিত। ইৰাণ আৰু ওমান দুয়োখনেই এই জলপথটোক কাৰ্যকৰীভাৱে প্ৰভাৱিত কৰে। ফলত এই অঞ্চলত সামান্য উত্তেজনা হ’লেও আন্তঃৰাষ্ট্ৰীয় বাণিজ্য আৰু শক্তি যোগানৰ বাবে ডাঙৰ বিপদৰ সৃষ্টি হ’ব পাৰে।
ইফালে কাটাৰে এই আক্ৰমণক তীব্ৰ গৰিহণা দিছে। তেওঁলোকৰ মতে এই আক্ৰমণ ওমানৰ সাৰ্বভৌমত্বৰ ওপৰত প্ৰত্যক্ষ আঘাত। একে সময়তে পশ্চিম এছিয়াত ক্ৰমবৰ্ধমান উত্তেজনাক লৈ উদ্বেগ প্ৰকাশ কৰি আলোচনাৰ জৰিয়তে সমস্যাৰ সমাধানৰ আহ্বান জনাইছে।
উল্লেখ্য যে যোৱা শনিবাৰৰ পৰা পশ্চিম এছিয়াৰ পৰিস্থিতি দ্ৰুতগতিত গৰম হৈ আহিছে। সেইদিনা ৰাতিপুৱা খবৰ ওলায় যে আমেৰিকা আৰু ইজৰাইলে ইৰাণৰ ওপৰত বৃহৎ আক্ৰমণ চলাইছে। সেই আক্ৰমণত ইৰাণৰ সৰ্বোচ্চ নেতা আয়াতুল্লাহ আলী খামেনেই নিহত হোৱা বুলি দাবী কৰা হৈছিল। এই ঘটনাৰ পিছৰে পৰা বিভিন্ন আন্তঃৰাষ্ট্ৰীয় সূত্ৰই প্ৰকাশ কৰিছে যে ইৰাণে ইটোৰ পিছত সিটো প্ৰত্যাক্ৰমণ চলাই আহিছে।
উপসাগৰীয় অঞ্চলৰ বিভিন্ন দেশত আমেৰিকাৰ সামৰিক ঘাটিক লক্ষ্য কৰি একাধিক আক্ৰমণৰ বাতৰিও প্ৰকাশ পাইছে। খবৰ অনুসৰি দেওবাৰে ইজৰাইলে তেহৰাণত নতুনকৈ আক্ৰমণ চলাইছে। এনে পৰিস্থিতিত একাংশ কূটনীতিবিদৰ মতে পশ্চিম এছিয়াত এক বৃহৎ সংঘাতৰ সম্ভাৱনা উদয় হৈছে।
যদিহে হৰমুজ প্ৰণালীৰ দৰে গুৰুত্বপূৰ্ণ অঞ্চলত আক্ৰমণ বৃদ্ধি পাই থাকে তেন্তে ই কেৱল আঞ্চলিক ক্ষেত্ৰতে নহয়, বিশ্ব অৰ্থনীতি আৰু শক্তি বজাৰতো এক বৃহৎ জোকাৰণিৰ সৃষ্টি কৰিব পাৰে।
