ফুটবলৰ গ’লকীপাৰৰ পাৰদৰ্শিতা বৃদ্ধিৰ অগ্ৰণী প্ৰশিক্ষণ একাডেমি গ’লপ্লেৰ চিফ অপাৰেটিং অফিচাৰ মৰিটজ মেটছে আজি মুখ্য মন্ত্ৰী সৰ্বানন্দ সোণোৱালক ব্ৰহ্মপুত্ৰ ৰাজ্যিক অতিথি শালাত সাক্ষাৎ কৰি এই প্ৰশিক্ষণ প্ৰতিষ্ঠানৰ এটা কেন্দ্ৰ গুৱাহাটীত স্থাপনৰ দিশত ইচ্ছা ব্যক্ত কৰে।
উল্লেখ্য যে প্ৰতিষ্ঠানটোৰ সৈতে স্থাপন হোৱা কালৰে পৰা জড়িত তথা প্ৰতিষ্ঠানটোৰ মুখ্য কাৰ্য্যবাহী বিষয়া অলিভাৰ কানে ২০০২ বৰ্ষত অনুষ্ঠিত হোৱা বিশ্বকাপ ফুটবলত সোণালী গ্ল’ভছ লাভ কৰিবলৈ সক্ষম হৈছিল।
এই প্ৰতিষ্ঠানটোৱে ইয়াৰ পৰিসৰ বৃদ্ধিৰ বাবে ভাৰতবৰ্ষৰ পূব, পশ্চিম, উত্তৰ আৰু দক্ষিণ প্ৰান্তত গ’লকীপাৰৰ পাৰদৰ্শিতা বৃদ্ধিৰ চাৰিটা প্ৰশিক্ষণ কেন্দ্ৰ স্থাপন কৰিব। পূব প্ৰান্তৰ বাবে গুৱাহাটীত এই কেন্দ্ৰ স্থাপনৰ বাবে প্ৰশিক্ষণ প্ৰতিষ্ঠানটোৱে ইচ্ছা প্ৰকাশ কৰিছে।
মুখ্য মন্ত্ৰীৰ সৈতে হোৱা সাক্ষাৎকালত প্ৰশিক্ষণ প্ৰতিষ্ঠানটোৰ চিফ অপাৰেটিং অফিচাৰ মৰিটজ মেটছে মুখ্য মন্ত্ৰীক কয় যে গ’লপ্লে ৰাজ্যখনৰ ক্ৰীড়া বিভাগৰ সহযোগিতাৰে দুগৰাকী সম্ভাৱনীয়তা থকা গ’লকীপাৰক মিউনিখলৈ উন্নত প্ৰশিক্ষণৰ বাবে পঠিওৱাৰ ব্যৱস্থা কৰিব।
মুখ্য মন্ত্ৰী সোণোৱালে গ’লপ্লেই গুৱাহাটীত উন্নত মানদণ্ডৰ গ’লকীপিং প্ৰশিক্ষণ প্ৰতিষ্ঠান স্থাপনৰ দিশত লোৱা পদক্ষেপৰ বাবে অলিভাৰ কানক ধন্যবাদ জ্ঞাপন কৰাৰ উপৰি চৰকাৰে এই পৰিকল্পনা কাৰ্য্যকৰীকৰণৰ দিশত সকলো প্ৰকাৰৰ সহায়-সহযোগিতা আগবঢ়াব বুলি কয়।
আজিৰ সাক্ষাৎকালত সোণোৱালে প্ৰতিষ্ঠানটোৰ চিফ অপাৰেটিং অফিচাৰ মৰিটছ মেটছক ৰাজ্য চৰকাৰে অলিভাৰ কানক অসম ভ্ৰমণৰ বাবে আহ্বান জনোৱাৰ কথাটো অৱগত কৰিবলৈ অনুৰোধ জনায় যাতে তেওঁৰ আগমনে ৰাজ্যখনৰ প্ৰতিভাৱান খেলুৱৈ সকলক আৰু অধিক উৎসাহিত কৰিব পাৰে।
আলোচনাৰ সময়ত মুখ্য মন্ত্ৰীয়ে ৰাজ্য চৰকাৰে ৰাজ্যখনৰ ক্ৰীড়া তথা ক্ৰীড়া আন্তঃগাথনি উন্নীতকৰণৰ দিশত লোৱা বিভিন্ন ব্যৱস্থাৱলী সম্পৰ্কেও সদৰি কৰে।
