জম্মু-কাশ্মীৰৰ জনসাধাৰণৰ বাবে সিন্ধু জলচুক্তিক অভিশাপ আখ্যা মুখ্যমন্ত্ৰী ওমৰ আব্দুল্লাৰ

শেহতীয়া ভাৰত পাকিস্তানৰ সংঘৰ্ষই দুই দেশৰ মাজত যুদ্ধসম পৰিৱেশৰ সৃষ্টি কৰিছে। পহলগাম আক্ৰমণৰ পিছত কেন্দ্ৰই পাকিস্তানৰ সৈতে স্থগিত ৰখা সিন্ধু জলচুক্তিক লৈ জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই তীব্ৰ প্ৰতিক্ৰিয়া প্ৰকাশ কৰিছে

শ্ৰীনগৰত সাংবাদিকৰ সৈতে হোৱা বাৰ্তালাপত তেওঁ কয় যে ১৯৬০ চনত ভাৰত আৰু পাকিস্তানৰ মাজত স্বাক্ষৰিত এই সন্ধি জম্মু-কাশ্মীৰৰ বাবে সদায় প্ৰতিকূল হৈ আহিছে। আৰু এই চুক্তিক কেন্দ্ৰীয় শাসিত অঞ্চলৰ জনসাধাৰণৰ প্ৰতি অন্যায়পূৰ্ণ নথি হিচাপে অভিহিত কৰে।

পহলগামত ২৬ জন লোকৰ মৃত্যু হোৱা মাৰাত্মক সন্ত্ৰাসবাদী আক্ৰমণৰ পিছত ভাৰতে সন্ধি স্থগিত ৰখাৰ সিদ্ধান্ত লোৱাৰ পিছতে তেওঁ এই দৰে মন্তব্য কৰে। আব্দুল্লাই কয় যে জম্মু-কাশ্মীৰৰ জনসাধাৰণে এই সন্ধিক কেতিয়াও সমৰ্থন কৰা নাছিল কাৰণ ইয়াৰ ফলত তেওঁলোকৰ জলসম্পদৰ প্ৰৱেশত বাধা আৰোপ কৰা হৈছে। এই সন্ধিৰ জৰিয়তে সিন্ধু নদী আৰু ইয়াৰ উপনৈসমূহৰ পানী ভাৰত আৰু পাকিস্তানৰ মাজত বিভাজন কৰা হৈছে যদিও জম্মু-কাশ্মীৰৰ বহুতেই অনুভৱ কৰে যে ইয়াৰ ফলত এই নদীসমূহ বিদ্যুৎ আৰু জলসিঞ্চনৰ বাবে ব্যৱহাৰ কৰাৰ ক্ষমতা সীমিত হৈ পৰিছে।

আব্দুল্লাই কয় যে সন্ধিখন স্থগিত ৰখাৰ দীৰ্ঘম্যাদী প্ৰভাৱ স্পষ্ট নহয় যদিও অঞ্চলটোৱে দীৰ্ঘদিন ধৰি ইয়াৰ নেতিবাচক প্ৰভাৱ অনুভৱ কৰি আহিছে। এই সন্ধি স্থগিত ৰখাৰ ফলত উত্তেজনাৰ সৃষ্টি হৈছে, পাকিস্তানে ইয়াক এক্ট অফ ৱাৰ বুলি অভিহিত কৰিছে। পহলগাম আক্ৰমণৰ প্ৰত্যুত্তৰ হিচাপে এই পদক্ষেপ ভাৰতে  গ্ৰহণ কৰাৰ লগতে  কূটনৈতিক সম্পৰ্ক ভংগ কৰৰি লগতে আটাৰী সীমান্ত পাৰ বন্ধ কৰিছে।

আব্দুল্লাই জোৰ দি কয় যে বৰ্তমান অৰ্থনৈতিক লোকচানৰ ওপৰত নহয়, হেৰুৱা জীৱনৰ ওপৰতহে গুৰুত্ব দিয়া হৈছে। তেওঁ এই আক্ৰমণত নিহত স্থানীয় পনি অপাৰেটৰ এজনৰ সাহসিকতাৰ প্ৰশংসা কৰি তেওঁক কাশ্মীৰী আতিথ্যৰ প্ৰতীক বুলি অভিহিত কৰে।