সমগ্ৰ ৰাজ্যবাসীয়ে মাঘ বিহু উদযাপনত ব্যস্ত থকাৰ সময়ত ৰাইজৰ দলৰ এটা গোটে উৰুকাৰ নিশা যোৰহাট জিলাত ২৪ ঘণ্টীয়া অনশনৰ যোগেদি প্ৰতিবাদী সাব্যস্ত কৰে।
ৰাইজৰ দলৰ নেতা-কৰ্মী সকলে উৰুকা উদযাপন নকৰাৰ সিদ্ধান্তৰে যোৰহাটৰ জিলা সত্ৰ ন্যায়াধীশৰ কাৰ্য্যালয়ৰ সন্মুখত অখিল গগৈৰ মুক্তিৰ দাবীৰে অনশন কাৰ্য্যসূচী ৰূপায়ন কৰে।
নাগৰিকত্ব সংশোধনী আইনৰ বিৰুদ্ধে প্ৰতিবাদৰ সময়তে ২০১৯ চনৰ ১২ ডিচেম্বৰত কৃষক নেতা অখিল গগৈক যোৰহাটৰ বাসগৃহৰ পৰা গ্ৰেপ্তাৰ কৰা হৈছিল।
গুৱাহাটী উচ্চ ন্যায়ালয়ে বিগত সপ্তাহত অখিল গগৈৰ জামিন আবেদন নাকচ কৰিছিল।
কৃষক নেতা গৰাকীয়ে অহিংস আন্দোলন বাদ দি হিংসাত্মক পথ বাচি লোৱা অপৰাধতে গুৱাহাটী উচ্চ ন্যায়ালয়ে গগৈৰ জামিন আবেদন নাকচ কৰে বুলি জানিব পৰা গৈছে।
ইপিনে, ৰাইজৰ দলে অখিল গগৈৰ মুক্তিৰ দাবীৰে উচ্চতম ন্যায়ালয়ৰ দ্বাৰস্থ হোৱাৰ মনস্থ কৰিছে।
‘‘আমাৰ নেতা গৰাকীক কোনোধৰণৰ গ্ৰহণযোগ্য কাৰণ নোহোৱাকৈ ১৩ মাহ কাৰাগাৰত আৱদ্ধ কৰি ৰখা হৈছে। আমাৰ নেতা গৰাকী অবিহনে উৰুকা উৰুঙা সেয়েহে তেওঁ কাৰাগাৰত থকা সময়ত আমিও লঘোণে থাকি তেওঁৰ মুক্তিৰ দাবী জনাইছো,’’ অনশনত অংশলোৱা ৰাইজৰ দলৰ এগৰাকী প্ৰতিনিধিয়ে এইদৰে কয়।