ভাৰতীয় ক্ৰিকেট দলৰ প্ৰাক্তন অধিনায়ক এম এছ ধোনীৰ অৱসৰ আৰু ভাৰতীয় দলত খেলুৱৈগৰাকীৰ ভবিষ্যত সম্পৰ্কে কোনোধৰণৰ খবৰ প্ৰকাশিত নোহোৱাৰ পাছতো মঙলবাৰে #ধোনীয়ে টুইটাৰত ট্ৰেণ্ডিং লাভ কৰিছে।
ক্ৰিকেট সমালোচক সকলে টুইটাৰত উইকেটৰক্ষক আৰু বেটছমেন হিচাপে ধোনীৰ অৱদানৰ বিষয়ে চৰ্চা আৰম্ভ কৰা পৰিলক্ষিত হৈছে।
বহু ক্ৰিকেট প্ৰেমীয়ে ধোনীক পুনৰ দলৰ হৈ খেলপথাৰলৈ উভতি অহাৰ বাবেও অনুৰোধ জনাইছে।
উল্লেখযোগ্য যে, টুইটাৰত ধোনীৰ প্ৰসংগই ট্ৰেণ্ড লাভ কৰাৰ পাছতে ধোনীৰ সমৰ্থকসকলে খেলুৱৈ গৰাকীয়ে অৱসৰ ল’ব বুলি চিন্তিত হৈ পৰিছে। যাৰ ফলত টুইটাৰ #NeverRetireDhoni আৰু #ThankYouDhoni টুইটেৰে ভৰি পৰিছে।
২০১৯ বিশ্বকাপত ভাৰতীয় দলটো নিউজিলেণ্ডৰ বিপক্ষে পৰাজিত হৈ বাহিৰ হোৱাৰ পাছৰে পৰা ধোনীৰ অৱসৰৰ প্ৰসংগত বিভিন্ন খবৰ প্ৰকাশ হৈ আহিছে।
উক্ত খেলখনৰ পাছৰে পৰা ধোনীয়ে ভাৰতীয় ক্ৰিকেট দলৰ সৈতে নায়।
আনহাতে, অলপতে দক্ষিণ আফ্ৰিকাৰ বিৰুদ্ধে ৰাঁচীত অনুষ্ঠিত হোৱা টেষ্টৰ পাছতে ভাৰতীয় দলৰ ড্ৰেছিং ৰূমত দেখা গৈছিল মহেন্দ্ৰ সিং ধোনীক।
তদুপৰি, দলৰ প্ৰশিক্ষক ৰবি শাস্ত্ৰীয়ো ধোনীৰ অৱসৰৰ বিষয়ে আলোচনা কৰা আধা সংখ্যক লোকে নিজৰ জোটাৰ ৰছী ভালকৈ গাঠিব নোৱাৰে বুলি মন্তব্য কৰিছিল।