পঞ্জাৱৰ মোহালিত হঠাৎ ভাঙি পৰিল এটা বহুমহলীয়া অট্টালিকা। এই ঘটনাত এজনৰ মৃত্যু ঘটে আৰু একাধিক আবদ্ধ হৈ পৰে। ধ্বংসাৱশেষৰ পৰা তেওঁলোকক উলিয়াই অনাৰ প্ৰচেষ্টা অব্যাহত আছে। ঘটনাস্থলীত উপস্থিত হৈ উদ্ধাৰ অভিযান চলাইছে এনডিআৰএফে।
মৃতকৰ নাম দৃষ্টি ভাৰ্মা (২০)। তেওঁ হিমাচল প্ৰদেশৰ বাসিন্দা আছিল। বহুমহলীয়া অট্টালিকাটো ভাঙি যোৱাৰ পিছত তেওঁ তাত পিষ্ট হৈ মৃত্যুমুখত পৰে। তেওঁক উদ্ধাৰ কৰি স্থানীয় সোহানা চিকিৎসালয়লৈ লৈ যোৱা হয় যদিও জীৱন ৰক্ষা নহ’ল। শৰীৰত গুৰুতৰ আঘাতৰ বাবে তেওঁৰ মৃত্যু হয়।
আৰক্ষীৰ তথ্য অনুসৰি বহু মহলীয়া অট্টালিকাটোৰ ধ্বংসাৱশেষৰ তলত পোত খাই আছে ৫জন লোক। তেওঁলোকক সোনকালে উলিয়াই অনাৰ প্ৰচেষ্টা চলোৱা হৈছে। এন ডি আৰ এফৰ সৈতে ভাৰতীয় সেনাৰ এটা দলো সেই স্থানত উপস্থিত হৈ উদ্ধাৰ অভিযানো আৰম্ভ কৰে।
সেই বহুমহলীয়া অট্টালিকাৰ তলত এটা জিম আছে বুলি স্থানীয় লোকৰ পৰা আৰক্ষীয়ে গম পায়। ওচৰৰ এটা প্লটত মাটি তোলাৰ কাম চলি আছিল। এই বহুমহলীয়া অট্টালিকাটো নিশা ভাঙি পৰে। আৰক্ষীয়ে এপাৰ্টমেণ্টৰ মালিক পৰৱিন্দৰ সিং আৰু গগনদীপ সিঙৰ বিৰুদ্ধে ভাৰতীয় দণ্ডবিধিৰ ১০৫ ধাৰাত গোচৰ ৰুজু কৰিছে।
এই সন্দৰ্ভত পঞ্জাৱৰ মুখ্যমন্ত্ৰী ভাগৱত মানে টুইট কৰে। পোষ্টটোত তেওঁ কয়, ‘মোহালিৰ সোহানা অঞ্চলৰ অজিত সিং নগৰত এটা বহুমহলীয়া অট্টালিকা ভাঙি পৰিছে। প্ৰশাসনিক বিষয়া আছে। উদ্ধাৰকাৰী দলো আছে। তেওঁলোকৰ সৈতে যোগাযোগ কৰিছো। বিষয়টোৰ তদন্ত অব্যাহত আছে। প্ৰাৰ্থনা কৰোঁ যাতে কোনেও প্ৰাণ নেহেৰুৱায়। অভিযোগ প্ৰমাণিত হ’লে কঠোৰ ব্যৱস্থা গ্ৰহণ কৰা হ’ব। স্থানীয় লোকক অনুৰোধ, প্ৰশাসনক সহযোগ কৰক।’
চৰকাৰে এটা হেল্পলাইন নম্বৰো ঘোষণা কৰিছে।
