ডিমা হাচাও জিলাৰ ডাওট’হাজা আৰু ফাইদিঙৰ মাজত আজি দুপৰীয়া প্ৰায় ১২ মান বজাত এখন মালবাহী ৰে’ল দুৰ্ঘটনাত পতিত হয়।
জানিব পৰা মতে মালবাহী ৰে’লখন লাইনচ্যুত হোৱাৰ বাবেই এই দুৰ্ঘটনাটো সংঘটিত হয়। দুৰ্ঘটনাটোত ৰে’লখনৰ ৯টা ডবা লাইনচ্যুত হোৱাত ৰে’ল পথটোৰ বিস্তৰ ক্ষতিসাধন হোৱা বুলি জানিব পৰা যায়।
ইফালে লামডিঙৰ পৰা উত্তৰ-পূব সীমান্ত ৰে’লৰ সংশ্লিষ্ট বিষয়া-কৰ্মচাৰীৰ দল লগে লগে গৈ ঘটনাস্থলত উপস্থিত হোৱাৰ লগতে লাইনচ্যুত হোৱা ডবা কেইটা উঠোৱাৰ কাম আৰম্ভ কৰিছে।
উল্লেখযোগ্য যে ৰে’ল দুৰ্ঘটনাটোৰ বাবে ৰে’ল চলাচল ব্যাহত হৈ পৰাত ৰে’ল কৰ্তৃপক্ষই মাইবঙত ৰখাই থৈছে কাঞ্চনজংঘা এক্সপ্ৰেছ।
ৰে’ল সুত্ৰই জানিব দিয়া মতে ৰে’লপথটো পুনৰ কাৰ্যক্ষম কৰি তুলিবলৈ কৰ্তৃপক্ষক কমেও দশ ঘন্টা সময়ৰ প্ৰয়োজন হ’ব।