বৰপেটাৰ অতিৰিক্ত উপায়ুক্তক উৎকোচ দিব গৈ আজি সন্ধিয়া আটক হয় এগৰাকী কণিষ্ঠ অভিযন্তা ৷
বৰপেটাৰ অতিৰিক্ত উপায়ুক্ত নৱজিৎ পাঠকক জিলা উপায়ুক্তৰ কাৰ্যালয়ত উৎকোচ দিব গৈছিল জনস্বাস্থ্য কাৰিকৰী বিভাগৰ কণিষ্ঠ অভিযন্তা নাছিৰউদ্দিন আহমেদে ৷
অতিৰিক্ত উপায়ুক্ত গৰাকীয়ে এই ঘটনা সন্দৰ্ভত লগে লগে বৰপেটা থানাক অবগত কৰে। বৰপেটা আৰক্ষীয়ে টকাসহ কণিষ্ঠ অভিযন্তা নাছিৰউদ্দিন আহমেদক আটক কৰি বৰপেটা থানালৈ লৈ আহে ৷
জানিব পৰা মতে কণিষ্ঠ অভিযন্তা গৰাকীয়ে ৯০ হাজাৰ টকা উৎকোচ দিব গৈছিল অতিৰিক্ত উপায়ুক্ত নৱজিৎ পাঠকক ৷
বৰ্তমান আৰক্ষীয়ে ঘটনাৰ তদন্ত অব্যাহত ৰাখিছে ৷
উল্লেখ্য যে, জনস্বাস্থ্য কাৰিকৰী বিভাগৰ বৰপেটা সংমণ্ডলত সংঘটিত বিয়াগোম অনাময় শৌচালয় কেলেংকাৰিৰ তদন্ত কৰি আছে অতিৰিক্ত উপায়ুক্ত নৱজিৎ পাঠকে ৷
বৰপেটাৰ উপায়ুক্ত মুনীন্দ্ৰ শৰ্মাৰ নিৰ্দেশমৰ্মে কেলেংকাৰিৰ তদন্ত কৰি আছে অতিৰিক্ত উপায়ুক্তগৰাকীয়ে ৷
কেলেংকাৰিত দোষী সাব্যস্ত হোৱাৰ ভয়ত তদন্তকাৰী বিষয়াক মেনেজ কৰাৰ চেষ্টা চলাইছিল কনিষ্ঠ অভিযন্তা গৰাকীয়ে ৷
সম্প্ৰতি বৰপেটা সদৰ থানাত নাছিৰুদ্দিনক জেৰা কৰি থকা হৈছে ৷
