ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰা বকো ছয়গাঁৱৰ আচলপাৰাত ঈদৰ সাংস্কৃতিক অনুষ্ঠানত শিল্পীক উলংগ নৃত্য প্ৰদৰ্শনৰ বাবে হেঁচা দিয়া ঘটনাৰ সৈতে জড়িত আখতাৰ হুছেইন নামৰ আন এজন লোকক ছয়গাঁৱ আৰক্ষীয়ে আটক কৰিছে।
আৰক্ষীয়ে আটক কৰা আখতাৰ হুছেইনৰ ঘৰ ছয়গাঁৱৰ মাজৰটোপত। ধৃত আখতাৰে ড্ৰীমলেণ্ড টেণ্ট হাউছ নামৰ এখন টেন্ট হাউছৰ মালিক। আচলপাৰাৰ ঘটনাৰ দিনাখনৰ অনুষ্ঠানত আখতাৰৰ টেণ্ট হাউচৰ সামগ্ৰী ব্যৱহাৰ কৰা হৈছিল।
আনহাতে, অভিযোগ অনুসৰি সেইদিনাৰ সভ্য সমাজক লজ্জিত কৰা ঘটনাটোৰ নৃত্য পৰিবেশনৰ ভিডিঅ’ কৰোতে আখতাৰে বাধা প্ৰদান কৰিছিল। বৰ্তমান আৰক্ষীয়ে সমগ্ৰ ঘটনা সন্দৰ্ভত আখতাৰক জেৰা অব্যাহত ৰাখিছে।
উল্লেখযোগ্য যে, ৯ জুনত আৰক্ষীয়ে অভিযান চলাই ঘটনাটোৰ লগত জড়িত চাৰিজন লোক ক্ৰমে শ্বাহৰুখ খান, ছুভাহান খান, নিজামুদ্দিন আৰু ৰহমত আলীক আটক কৰিছিল।
বৰ্তমানলৈ আচলপাৰা কাণ্ডৰ লগত জড়িত থকাৰ সন্দেহত আৰক্ষীয়ে মুঠ ৮ গৰাকী লোকক আটক কৰিছে।