উন্মত্ত লোকৰ আক্ৰমণত পুনৰ এজন লোকে মৃত্যুক আঁকোৱালি ল’বলগীয়া হ’ল । নগাঁও জিলাৰ চামগুৰি আৰক্ষী থানাৰ অন্তৰ্গত বৰদল গাঁৱত সংঘটিত হোৱা এই ঘটনাই জিলা খনত চেপা উত্তেজনাৰ সৃষ্টি কৰিছে।
অঞ্চলটোত বিভিন্ন চুৰিকাণ্ডৰ লগত জড়িত থকাৰ সন্দেহতে একাংশ লোকে বৰদলৰ নিজ ঘৰৰ পৰাই উঠাই নি মালকী খালখ’ (৪০) নামৰ লোকজনক নিৰ্মমভাবে প্ৰহাৰ কৰি হত্যা কৰাৰ অভিযোগ উত্থাপিত হৈছে।
প্ৰাপ্ত খবৰ মতে, অঞ্চলটোৰ এঘৰৰ পুখুৰীত মাছ চুৰি কৰাৰ অভিযোগ উত্থাপন কৰি একাংশ লোকে মালাকীক দেওবাৰে নিশা ঘৰৰ পৰা উঠাই লৈ যায়।
আনকি দলটোৱে মালাকীৰ বাসগৃহৰ সন্মুখ ভাগ লণ্ডভণ্ড কৰি ৰুগীয়া পিতৃকো শাৰীৰিক ভাবে অপদস্থ কৰে। পৰৱৰ্তী সময়ত লোক কেইজনে অভিযুক্ত মালাকীক আৰক্ষীৰ হাতত গটাই দিম বুলি ঘৰৰ পৰা উঠাই আনি সমীপৰে তিনিআলিত গুৰুলাগুৰুলকৈ প্ৰহাৰ কৰাৰ অভিযোগ উত্থাপন কৰিছে মালাকীৰ পৰিয়ালে।
গণপ্ৰহাৰৰ পিছতেই গুৰুতৰভাৱে আঘাতপ্ৰাপ্ত মালাকীক মুমূৰ্ষ অৱস্থাত ঘৰৰ চোতালত পেলাই থৈ যাবলৈ বিচৰাত পৰিয়ালটোৱে হুলস্থুল কৰে।
পিছত লোক কেইজনে মালাকীক সমীপৰ চিকিৎসালয়লৈ চিকিৎসাৰ বাবে লৈ যায়। আধা ঘণ্টাৰ পাছতে মালাকীক মৃত অৱস্থাত পেলাই যুৱক কেইজনে পলায়ন কৰে। এই সমগ্ৰ ঘটনাৰ সৈতে স্থানীয় কেইবাজনো যুৱক জড়িত থকাৰ অভিযোগ উত্থাপন কৰিছে মৃত মালকীৰ পৰিয়ালৰ লোকে।
ইফালে দীৰ্ঘদিন ধৰি বৃহত্তৰ অঞ্চলটোত বিভিন্ন চুৰি কাণ্ড কৰি অহাৰো অভিযোগ আছিল মৃত মালকীৰ বিৰুদ্ধে। পুৱাৰ ভাগত চামগুৰি আৰক্ষী ঘটনাস্থলীত উপস্থিত হৈ মালকীৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰাৰ লগতে ঘটনা সন্দৰ্ভত তদন্ত আৰম্ভ কৰিছে ।
যোৱা নিশা সংঘটিত হোৱা উক্ত হত্যাকাণ্ডৰ পাছতে অঞ্চলটোত চেপা উত্তেজনাই বিৰাজ কৰিছে। আৰক্ষীয়ে বাতৰি লিখা সময়লৈকে এজনো অভিযুক্তক কৰায়ত্ব নকৰাৰ ঘটনাই সচেতন মহলৰ মাজত ৰহস্যৰ সৃষ্টি কৰিছে।
চামগুৰি আৰক্ষীয়ে পুৱাই গণ প্ৰহাৰত মৃত্যু হোৱা মালাকীৰ মৃতদেহ উদ্ধাৰ কৰাৰ পাছতো পৰিয়ালে এজাহাৰ দাখিল নকৰাৰ অজুহাততে এজনো অভিযুক্তক আটক কৰা হোৱা নাই বুলিহে সাংবাদিকৰ আগত ব্যক্ত কৰে। পৰৱৰ্তী সময়ত আৰক্ষীয়ে কি ভূমিকা লয় সেয়া লক্ষ্যণীয় হ’ব।