নগাঁও জিলাৰ পুৰণিগুদামৰ দৈনিক বজাৰৰ ৩৭ নং ৰাষ্ট্ৰীয় ঘাইপথত ৯ জানুৱাৰি অৰ্থাৎ বুধবাৰে নিশা প্ৰায় ১২ বজাত এখন চুপাৰ আৰু ট্ৰাকৰ মাজত সংঘটিত হয় এক ভয়ংকৰ দুৰ্ঘটনা। এই দুৰ্ঘটনাটোত ট্ৰাকখনৰ চালকজন থিতাতে মৃত্যু হয় বুলি জানিব পৰা গৈছে।
ঘটনা সন্দৰ্ভত জানিব পৰা অনুসৰি তেজপুৰৰ পৰা গুৱাহাটী অভিমুখে আহি থকা চুপাৰখনে বিপৰীত দিশ তথা গুৱাহাটীৰ পৰা উজনি অভিমুখী ট্ৰাকখনৰ সৈতে মুখামুখি সংঘৰ্ষ হোৱাত অন্ধপ্ৰদেশৰ এজন ট্ৰাক চালক থিতাতে নিহিত হোৱাৰ লগতে চুপাৰ বাছখনৰ চালক, পৰিচালকসহ আন চাৰিজন লোক গুৰুতৰভাৱে আহত হয়।
এই ভয়ংকৰ পথ দুৰ্ঘটনাটো সংঘটিত হোৱাৰ পাছতে চামগুৰি আৰু পুৰণিগুদাম আৰক্ষীৰ দল ঘটনাস্থলীত উপস্থিত হৈ স্থানীয় লোকৰ সহযোগত আহত লোক কেইজনক উদ্ধাৰ কৰি নগাঁও অসামৰিক চিকিৎসালয়লৈ প্ৰেৰণ কৰে।
আনহাতে নিহত চালকজনৰ মৃতদেহটো আজি মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰে বুলি চামগুৰি আৰক্ষীৰ সূত্ৰই প্ৰকাশ কৰিছে।
