বিশেষ সূত্ৰৰ পৰা লাভ কৰা খবৰৰ ভিত্তিত অভিযান চলাই ভাৰতীয় সেনা বাহিনী আৰু অসম আৰক্ষীৰ যুটীয়া অভিযানত ডিব্ৰুগড় জিলাৰ ঔগুৰি গাঁৱত এগৰাকী দুৰ্ধৰ্ষ আলফা স্বাধীনৰ সদস্য আটক হয়।
আটকা হোৱা আলফা স্বাধীনৰ সদস্য গৰাকী ডিব্ৰুগড় জিলাৰ টিংখঙৰ ২ নং নাচনী গাঁৱৰ বাবুল গগৈ বুলি চিনাক্ত কৰা হৈছে।
অভিযান কালত আটকাধীন আলফা(স্বা)ৰ সদস্য গৰাকীৰ পৰা এটা পইণ্ট ২২ এম এম পিষ্টল, এটা মেগজিন, আঠটা ক’ৰডেক্স আৰু চৈধ্যটা ডিটেনেটৰ সেনাবাহিনীৰ দলটোৱে জব্দ কৰে।
বাবুল গগৈ উজনি অসমত আলফা স্বাধীনৰ নতুন সদস্য ভৰ্তি আৰু ধন সংগ্ৰহৰ কামত জড়িত হৈ আছিল বুলি আৰক্ষী সূত্ৰত প্ৰকাশ পাইছে।
আটকাধীন আলফা স্বাধীনৰ সদস্য গৰাকীক উদ্ধাৰ হোৱা অস্ত্ৰ-সস্ত্ৰৰ সৈতে ডিব্ৰুগড় আৰক্ষীৰ হাতত গটাই দিয়া হৈছে।
আৰক্ষীয়ে অধিক তথ্যৰ বাবে বৰ্তমান আলফা স্বাধীনৰ সদস্য গৰাকীক জেৰা অব্যাহত ৰাখিছে।