অসমৰ জ্যেষ্ঠ নাগৰিকক চৰম অপমান কৰিলে অ’এনজিচিয়ে। জ্যেষ্ঠ নাগৰিকৰ অধিৱেশনৰ বাবে অ’এনজিচি কৰ্তৃপক্ষই মুকলি মঞ্চ ব্যৱহাৰৰ প্ৰতিশ্ৰুতি দি শেষ মুহূৰ্তত অনুমতি নাকচ কৰে। এই কথাত জাঙুৰ খাই উঠিছে অসম জ্যেষ্ঠ নাগৰিক সন্মিলনীয়ে।
উল্লেখযোগ্য যে অসম জ্যেষ্ঠ নাগৰিক সন্মিলনীৰ অষ্টম দ্বি-বাৰ্ষিক অধিৱশনখন অহা ১৬ আৰু ১৭ ফেব্ৰুৱাৰিত শিৱসাগৰত অনুষ্ঠিত হ’ব। ইয়াৰ বাবে শিৱসাগৰ শাখাই অধিৱেশনখন সফলভাৱে অনুষ্ঠিত কৰিবলৈ ব্যাপক প্ৰস্তুতি চলাইছে।
ৰাজ্যৰ কেইবা হাজাৰ প্ৰতিনিধি উপস্থিত থাকিবলগীয়া এই অধিৱেশন অনুষ্ঠিত কৰিবৰ বাবে শিৱসাগৰৰ অ’এনজিচি আৱাসিক এলেকাত থকা বৃহৎ মুকলি মঞ্চত অনুষ্ঠিত কৰিবলৈ সন্মিলনীয়ে জিলা উপায়ুক্তৰ যোগেদি অনুমতি বিচাৰি অ’এনজিচিৰ মানৱ সম্পদৰ সঞ্চালকলৈ আবেদন জনায়।
এই আবেদনৰ ভিত্তিত যেৱা ১৭ জানুৱাৰিত অ’এনজিচিৰ মানৱ সম্পদৰ মহাপ্ৰৱন্ধকৰ লগত উদযাপন সমিতিৰ বৈঠক অনুষ্ঠিত হয় আৰু বৈঠকত বিষয়া গৰাকীয়ে সভা পাতিবলৈ মুকলি মঞ্চটো দিয়াৰ লগতে আসন, মাইক, যানবাহনৰ ব্যৱস্থা কৰি দিয়াৰো প্ৰতিশ্ৰুতি প্ৰদান কৰে।
কিন্তু সেই একেগৰাকী বিষয়াই সেই দিনা নিশা ৭ বজাত উদযাপন সমিতিক তেওঁলোকৰ অনুমতি নাকচ কৰা বুলি ফোন যোগে জানিবলৈ দিয়ে। পৰৱৰ্তী সময়ত জ্যেষ্ঠ নাগৰিকৰ সন্মিলনত অ’এনজিচিৰ বহু সংখ্যক কৰ্মচাৰী জড়িত থকাত অ’এনজিচিৰ অৱসৰপ্ৰাপ্ত কল্যাণ সমিতিয়ে শেষৰ দিনাৰ মুকলি সভাখন অনুষ্ঠিত কৰিব বাবে পুনৰ অনুমতি বিচাৰি আবেদন জনায়।
সেইমৰ্মে যোৱা ২১ জানুৱাৰিত সন্মিলনীৰ সভাপতিৰ নেতৃত্বত যোৱা এটি সজাতি দলে অ’এনজিচিৰ কৰ্তৃপক্ষৰ লগত আলোচনা কৰাত মুকলি সভাৰ বাবে মঞ্চখন ব্যৱহাৰৰ অনুমতি প্ৰদান কৰে। ইয়াৰ পৰিপ্ৰেক্ষিতত উদযাপন সমিতিয়ে নিমন্ত্ৰণী পত্ৰ আৰু গোহাৰি পত্ৰত মুকলি সভা অনুষ্ঠিত হ’বলগীয়া স্থান আদি ছপা কৰি সকলো শাখালৈ প্ৰেৰণ কৰে।
ইপিনে, অধিৱেশনলৈ মাজত মাত্ৰ কেইটামান দিন থকা অৱস্থাত অ’এনজিচিয়ে যোৱা ৪ ফেব্ৰুৱাৰিত মুকলি মঞ্চ ব্যৱহাৰৰ অনুমতি বাতিল কৰা হৈছে বুলি পুনৰ জনায়। যাৰ বাবে উদযাপন সমিতি যথেষ্ট অসুবিধাৰ সন্মুখীন হ’বলগীয়া হয়। ফলত সমিতিয়ে জৰুৰীভাৱে কৰ্ণধাৰ সমিতিৰ সভা আহ্বান কৰি মিলন মন্দিৰত সভাখন অনুষ্ঠিত কৰাৰ সিদ্ধান্ত লয়।
অ’এনজিচিয়ে দুবাৰকৈ প্ৰতিশ্ৰুতি প্ৰদান কৰি শেষ মুহূৰ্তত নাকচ কৰাত সমগ্ৰ অসমৰ জ্যেষ্ঠ নাগৰিকক অপমানিত কৰছে বুলি মন্তব্য কৰে জিলাখনৰ জ্যেষ্ঠ নাগৰিকে। সোমবাৰে এখন সংবাদ মেলত এই কথা ব্যক্ত কৰে সন্মিলনীৰ সভাপতি দেবেন চন্দ্ৰ বৰুৱা আৰু সম্পাদক যোগেশ চন্দ্ৰ ৰাজখোৱাই। তেওঁলোকে লগতে জনায় যে জ্যেষ্ঠ নাগৰিকক কৰা এই অপমানৰ প্ৰতিবাদত জ্যেষ্ঠ নাগৰিক সন্মিলনীয়ে অ’এনজিচিৰ বিৰুদ্ধে প্ৰতিবাদী কাৰ্যসূচী গ্ৰহণ কৰিব।
উল্লেখ্য যে, অসমৰ প্ৰায় ২৫ লাখ জ্যেষ্ঠ নাগৰিকৰ কল্যাণাৰ্থে ২০০৩ চনত অসম জ্যেষ্ঠ নাগৰিক সন্মিলনী প্ৰতিষ্ঠা কৰা হৈছিল। ৰাজ্যৰ ২৭০ টাৰো অধিক শাখাৰ প্ৰায় ৩০ হাজাৰ জ্যেষ্ঠ নাগৰিক এই সন্মিলনীৰ সদস্য। ১৬ আৰ ১৭ ফেব্ৰুৱাৰিত দুদিনীয়া কাৰ্যসূচীৰে শিৱসাগৰৰ মিলন মন্দিৰত অষ্টম দ্বিবাৰ্ষিক অধিৱেশন অনুষ্ঠিত হ’ব। দুয়োদিনৰ কাৰ্যসূচীত অসমৰ সকলো জ্যেষ্ঠ নাগৰিকক উপস্থিত থাকিবলৈ উদযাপন সমিতিয়ে অনুৰোধ জনায়।
