মহিলাক অসন্মান কৰা অনলাইন পোষ্ট অপৰাধ হ’ব বুলি বম্বে উচ্চ ন্যায়ালয়ে এটা গোচৰৰ পাছত প্ৰকাশ কৰিছে। আদালতৰ মতে, অনলাইনত কোনো শব্দ ব্যৱহাৰ কৰি মহিলাক অসন্মান কৰিব নোৱাৰিব। এগৰাকী মহিলাক মৌখিকভাৱে অসন্মান কৰাৰ শাস্তি আৰু অনলাইন ভাৱে অসন্মানজনক শব্দ ব্যৱহাৰ কৰাৰ শাস্তি একেই। এজন যুৱকৰ আবেদন খাৰিজ কৰি উচ্চ ন্যায়ালয়ে এই মন্তব্য দিয়ে৷
যুৱকজনে ২০০৯ চনত এটা গোচৰ খাৰিজ কৰিবলৈ বম্বে উচ্চ ন্যায়ালয়ত আবেদন দাখিল কৰিছিল। চুবুৰীয়া মহিলাগৰাকীয়ে তেওঁৰ বিৰুদ্ধে মানহানিৰ গোচৰ ৰুজু কৰে। সেই গোচৰৰ পৰা মুক্তি পাব বিচাৰিছিল তেওঁ। কিন্তু আদালতে তেওঁৰ আবেদন নাকচ কৰে।
অভিযোগকাৰীজন দক্ষিণ মুম্বাইৰ বাসিন্দা যুৱক। ২০০৯ চনত তেওঁ এগৰাকী মহিলা চুবুৰীয়াক অসন্মানজনক মন্তব্যৰে ইমেইল কৰিছিল বুলি অভিযোগ উঠিছে। সেই ইমেইলটো সেই মহিলাগৰাকীলৈ প্ৰেৰণ কৰা হৈছিল। অভিযোগ অনুসৰি যুৱকজনে চুবুৰীটোৰ আন লোকলৈও ইমেইলটো প্ৰেৰণ কৰে। ইমেইলৰ জৰিয়তে মহিলাগৰাকীৰ চৰিত্ৰক লৈ প্ৰশ্ন উত্থাপন হয়। যিটো অভিযোগকাৰীয়ে অপমানজনক বুলি বিবেচনা কৰিছিল। যুৱকজনৰ বিৰুদ্ধে আৰক্ষীৰ এজাহাৰ দাখিল কৰে।যুৱকজন এফআইআৰ বাতিল কৰিবলৈ আদালতলৈ যায়।
যুৱকজনৰ বিৰুদ্ধে তেতিয়াৰ ভাৰতীয় দণ্ডবিধিৰ ৫০৯ ধাৰাত গোচৰ ৰুজু হৈছিল। তেওঁৰ অধিবক্তাই আদালতত কয় যে ৫০৯ ধাৰাত মহিলাৰ বিৰুদ্ধে অসন্মানজনক কথা কোৱাটো অপৰাধ। কিন্তু যুৱকজনে একেবাৰেই কোনো শব্দ ‘উচ্চাৰণ’ কৰা নাছিল। তেওঁ মাত্ৰ অনলাইনত লিখিলে। আদালতে এই যুক্তি নাকচ কৰিলে। ন্যায়াধীশগৰাকীয়ে কয় যে আধুনিক সমাজত সভ্যতাৰ অগ্ৰগতিৰ সমান্তৰালকৈ মানুহৰ প্ৰকাশভংগীৰ ধৰণো সলনি হৈছে। গতিকে অনলাইনত এগৰাকী মহিলাক অসন্মানজনক পোষ্ট কৰাটোও একে অপৰাধৰ অধীনত পৰে।
