অগপক ‘ঐক্যবদ্ধ বিৰোধী’ হৈ বিভাজনকামী আৰু সাম্প্ৰদায়িক শক্তিৰ বিৰুদ্ধে একেলগে কাম কৰি যাবলৈ আজি আহ্বান জনালে বিৰোধী দলপতি দেৱব্ৰত শইকীয়াই। অগপই মিত্ৰতাৰ পৰা ওলাই অহাৰ কথা ঘোষণা কৰাৰ পিছতে শইকীয়াই এই আহ্বান জনায়।
“আজি অগপৰ সভাপতি অতুল বৰা আৰু কাৰ্য্যকৰী সভাপতি কেশৱ মহন্তলৈ ফোন কৰি কথা পাতো।” বিৰোধী দলপতি তথা কংগ্ৰেছৰ বিধায়কজনে কয়। অগপক তেওঁ ঐক্যবদ্ধ বিৰোধী হিচাপে কাম কৰি যাবলৈ আহ্বান জনোৱা বুলি নিজৰ টুইটাৰ যোগে প্ৰকাশ কৰে। “বিভাজনকামী আৰু সাম্প্ৰদায়িক শক্তিৰ বিৰুদ্ধে ঐক্যবদ্ধ বিৰোধী হিচাপে একেলগে কাম কৰি যোৱাৰ আশা কৰিছো।” টুইটত তেওঁ কয়।
আনহাতে প্ৰাক্তন মুখ্য মন্ত্ৰী তৰুণ গগৈয়েও অগপক জাতীয় স্বাৰ্থত মিত্ৰতাৰ পৰা ওলাই অহা বাবে ধন্যবাদ জনায়। “মিত্ৰতাটো আগতেই ভংগ কৰিব লাগিছিল। শেষ মুহূৰ্তলৈকে থকাটো দুৰ্ভাগ্যজনক বুলি মই ভাবো। তথাপি দেৰিকৈ হ’লে মিত্ৰতা ভংগ কৰিছে। ই অসমৰ কাৰণে এটা সুখবৰ বুলিয়ে মই ভাবিছো।” গগৈয়ে সাংবাদিকৰ আগত কয়।
“মই আগতেই কৈছিলো বিজেপিয়ে এজিপিক শেষ কৰিবলৈ বিচাৰিছে”, বিজেপিয়ে আঞ্চলিক দলক শেষ কৰিবলৈ বিচাৰিছে। আমিও আঞ্চলিক দলৰ বিৰোধী। কিন্তু আমি আঞ্চলিক দলৰ পৰা মুক্ত কৰিবলৈ নিবিচাৰো। বিজেপিয়ে যেনেকৈ ভাৰতবৰ্ষক কংগ্ৰেছমুক্ত, আঞ্চলিক দলমুক্ত কৰিব বিচাৰে। তেওঁলোকে একনায়কত্ব বিচাৰে। আমি কিন্তু বিজেপিমুক্ত বিচৰা নাই। গণতন্ত্ৰত বিৰোধী দল থাকিবই।” প্ৰাক্তন মুখ্য মন্ত্ৰীজনে কয়।
তেওঁ পুনৰ কয়, “মই এজিপিয়ে পুনৰ আন্দোলনত নমাটো বিচাৰিছো। আন্দোলন কৰাৰ তেওঁলোকৰ তেজ আছে। অসমত বিদেশী খেদাৰ আন্দোলন কৰিছে। আমি আঞ্চলিক দলটো উৎসাহ-উদ্দীপনাৰে শক্তিশালী হোৱাটো বিচাৰো।”
ইপিনে বিজেপিক আক্ৰমণ কৰি কয়, “বিজেপিক ক্ষমতাই মূৰত ধৰিছে। তাৰ প্ৰতিফল পাব।”
“মোদী, অমিত শ্বাহতকৈ বেছি দায়ী কৰো সোণোৱাল, হেমন্ত, পাটোৱাৰীক। এওঁলোকে অসমৰ মানুহক ভুৱা দি আহিছে। ক্ষমতা পাই অসমৰ ৰাইজক অৱজ্ঞা কৰিছে। গৰ্বত ডাঙৰ ডাঙৰ কথা কৈছে। হিমন্তৰ কথাকে যদি চাওঁ আমি কি বুজিম? হিমন্তই আজি জিন্নাৰ আদৰ্শক সমৰ্থন দিছে। জিন্নাই যেনিবা মুছলমানক সমৰ্থন জনাইছিল। এওঁ হিন্দুক সমৰ্থন জনাইছে।” গগৈয়ে কয়।
