চমু চাপি আহিছে নিৰ্বাচনৰ দিন আৰু সিমানেই বৃদ্ধি পাইছে ৰাজনৈতিক দলৰ নেতৃত্বৰ মাজৰ মুখ চুপতি। এদিন যদি মন্ত্ৰী হিমন্ত বিশ্ব শৰ্মাই কংগ্ৰেছক কটাক্ষ কৰি কেইদিনমান পাছত ৰাজীৱ ভৱনটো আজমল ভৱন বুলি কটাক্ষ কৈ আনদিনা আকৌ তেওঁক উভটি ধৰে কংগ্ৰেছৰ নেতৃত্বই।
বিৰোধী দলপতি দেবব্ৰত শইকীয়াই মন্ত্ৰী হিমন্ত বিশ্ব শৰ্মাক উভটি ধৰি কয় ‘ৰাজীৱ ভৱনটো আজমল ভৱন হ’ব বুলি মুখৰ খজুৱতি মাৰিছে হিমন্ত বিশ্ব শৰ্মাই।‘
তেওঁ লগতে কয় ‘মুখ্যমন্ত্ৰী হোৱাৰ সপোন লৈ তথা তেখেতৰ বিৰুদ্ধে থকা বিভিন্ন অভিযোগৰ পৰা হাত সাৰিবলৈ যেতিয়া কংগ্ৰেছৰ গ’ল পোষ্ট এৰি বিজেপিৰ গ’ল পোষ্টলৈ লৰ মাৰিছিল।‘
‘আজি য’ত অগপ দলৰ বোকোচাত উঠি তেওঁ মাননীয় মন্ত্ৰী হৈ আছে, তাৰ আগতে অৰ্থাৎ কংগ্ৰেছ দলত থাকোতে অগপ দলৰ কাৰ্যালয়টো বিবাহ ভৱনত পৰিণত হ’ব বুলি তেওঁ কটু মন্তব্য কৰিছিল। গতিকে তেওঁৰ এইবিলাক কথা মাত্ৰ মুখৰ খজুৱতি মাৰিবলৈ কোৱা কথা।‘ হিমন্তক কটাক্ষ কৰি এইদৰে কয় দেবব্ৰত শইকীয়াই।
আনহাতে, অসমৰ ৩ কোটি জনতাৰ মুখ্যমন্ত্ৰী হোৱাৰ যোগ্যতা আছে বুলি হিমন্তই কৰা মন্তব্যৰ প্ৰত্যুত্তৰ দি দেবব্ৰত শইকীয়াই কয় ‘যদি নিৰ্বাচিত বিধায়কসকলে তেওঁলোকৰ নেতা হিচাপে যদি নদাই-ভদাইকে নিৰ্বাচন কৰে তেন্তে ভাৰতীয় সংবিধানৰ মতে তেওঁয়ে মুখ্যমন্ত্ৰী হ’ব।‘
‘হিমন্ত বিশ্ব শৰ্মা অভিজ্ঞ ৰাজনীতিক গতিকে তেওঁৰ মুখত পাতলীয়া কথাই শোভা নাপায়। ময়ো হিন্দু কিন্তু কংগ্ৰেছ দলৰ নীতি আদৰ্শক ভাল পাওঁ আৰু বিৰোধী দলৰ দলপতি হৈ আছো। গতিকে এনেধৰণৰ পাতলীয়া মন্তব্যৰে গম্ভীৰ পৰিস্থিতি বেয়া নকৰিলে মই ভাল পাম।‘ শইকীয়াই এইদৰে কয়।