১৪ হাজাৰ পুৰুষক ‘লড়কী-বহিন’ আঁচনিৰ ধন; লগতে অযোগ্য আৰু ২৬ লাখ! মহাৰাষ্ট্ৰত বিয়াগোম দুৰ্নীতি
আৰম্ভ হোৱাৰ মাত্ৰ এবছৰৰ ভিতৰতে মহাৰাষ্ট্ৰৰ লড়কী-বহিন আঁচনিত ব্যাপক দুৰ্নীতি সংঘটিত হৈছে! অভিযোগ উত্থাপন হৈছে যে ১৪ হাজাৰৰো অধিক পুৰুষে মহিলাৰ বাবে আবণ্টিত ভাট্টা লাভ কৰিছে!
কেৱল সেয়াই নহয়, অযোগ্য হোৱাৰ পিছতো কমেও ২৬ লাখে মাহৰ পিছত মাহ ভাট্টা লাভ কৰিছে। মুঠতে এন চি পিৰ সাংসদ সুপ্ৰিয়া সূলেই এই বৃহৎ দুৰ্নীতিৰ চি বি আইৰ তদন্তৰ দাবী জনাইছে।
বিধানসভা নিৰ্বাচনৰ ঠিক আগতেই মহাৰাষ্ট্ৰত ‘মাঝি লড়কী-বহিনা’ আঁচনি আৰম্ভ কৰিছিল মহাজুটি মিত্ৰজোঁটে। ২১ৰ পৰা ৬৫ বছৰৰ ভিতৰৰ মহিলাক প্ৰতিমাহে ১৫০০ টকা দিব বুলি ঘোষণা কৰা হৈছিল। যোৱা বছৰৰ জুন মাহৰ পৰা এই আঁচনি আৰম্ভ হৈছিল।
কিন্তু শেহতীয়াকৈ মহিলা আৰু শিশু কল্যাণ বিভাগৰ এক অডিটত দেখা গৈছে যে লড়কী-বহিন আঁচনিৰ পৰা ১৪,২৯৮ জন পুৰুষে ধন লাভ কৰিছে। মুঠ ২১.৪৪ কোটি টকা লাভ কৰে।
জানিব পৰা মতে, ইয়াৰে ১৪ হাজাৰৰো অধিক লোকে আবেদন পৰ্টেলত মহিলা হিচাপে পঞ্জীয়ন কৰিছিল। বিষয়টো পোহৰলৈ অহাত মহাৰাষ্ট্ৰৰ উপ-মুখ্যমন্ত্ৰী অজিত পাৱাৰে কয়, “দৰিদ্ৰ মহিলাসকলক সহায়ৰ বাবে এই আঁচনি আৰম্ভ কৰা হৈছে।পুৰুষে কোনো সুবিধা নাপাব।তেওঁলোকে যি ধন পাইছে, সেই ধন ঘূৰাই দিব লাগিব।”
কেৱল পুৰুষেই নহয়, আৰু ২৬ লাখ মহিলাই অবৈধভাৱে লাভ কৰিছে লড়কী-বহিন আঁচনিৰ সুবিধা। তেওঁলোকৰ বহুতেই একেটা পৰিয়ালৰ তৃতীয় মহিলা হিচাপে এই আঁচনিৰ বাবে আবেদন কৰিছে। ৬৫ বছৰ অতিক্ৰম কৰিও একাংশই এই আঁচনিৰ পৰা ধন লাভ কৰিছে।পৰিয়ালৰ অধিক আয় থকা মহিলাসকলেও এই আঁচনিৰ বাবে পঞ্জীয়ন কৰিছে।
ইয়াৰ ফলত এই ‘অযোগ্য’ লোকসকলৰ বাবে যোৱা এবছৰত মহাৰাষ্ট্ৰৰ কোষাগাৰৰ পৰা ১৬৪০ কোটি টকা ব্যয় হৈছে। সমগ্ৰ বিষয়টোৰ সন্দৰ্ভত সুপ্ৰিয়াই কয় যে চৰকাৰে এটা সৰু বিষয়তেই তদন্তৰ বাবে ইডি-চিবিআইক নমায়। এই অভিযোগৰ সন্দৰ্ভতো চিবিআইৰ তদন্তৰ দাবী জনায় সুপ্ৰিয়াই।