অসমত বানপানীৰ পৰিস্থিতি ক্ৰমান্বয়ে বেয়াৰ ফালে ঢাল খাইছে। নেৰানেপেৰা বৰষুণ, নদীৰ জলস্তৰ বৃদ্ধি আৰু মথাউৰি ছিঙাৰ ফলত ৰাজ্যৰ কেইবাখনো জিলাত বানপানী হৈছে। ইয়াৰ প্ৰতি লক্ষ্য ৰাখি চৰকাৰে সতৰ্কবাণী জাৰি কৰিছে।
ধেমাজি জিলাত ইতিমধ্যে ২০ হাজাৰৰো অধিক লোক এই বানৰ কৱলত পৰিছে। আনহাতে বজালীত নতুনকৈ হোৱা বানপানীয়ে খেতিমাটি, ৰাস্তা-ঘাট আৰু সাধাৰণ জীৱনযাত্ৰা ব্যাহত কৰিছে। উজনিৰ পৰা বৈ অহা পানীৰ পৰিমাণ বৃদ্ধি পোৱাৰ লগে লগে অসম চৰকাৰে বানপানীৰ মোকাবিলা কৰিবলৈ প্ৰস্তুতি তীব্ৰতৰ কৰি তুলিছে।
গুৱাহাটীৰ বতৰ বিজ্ঞান কেন্দ্ৰ আৰু ইটানগৰৰ বতৰ বিজ্ঞান কেন্দ্ৰৰ মতে, উজনিৰ অঞ্চলসমূহত হোৱা প্ৰবল বৰষুণৰ বাবে নদীৰ পানী বহুত বাঢ়ি গৈছে, যিয়ে নামনিৰ জিলাসমূহৰ বাবে ডাঙৰ বিপদ কঢ়িয়াই আনিছে।
কৰ্তৃপক্ষই জানিবলৈ দিয়া মতে, এই বানপানীয়ে প্ৰথমে ধেমাজি, লখিমপুৰ, বিশ্বনাথ আৰু শোণিতপুৰত প্ৰভাৱ পেলাব আৰু পিছলৈ ধুবুৰী পাবগৈ। মুখ্যমন্ত্ৰী হিমন্ত বিশ্ব শৰ্মাৰ নিৰ্দেশত মুখ্য সচিবগৰাকীয়ে সকলো জিলা প্ৰশাসনক সষ্টম হৈ থাকিবলৈ নিৰ্দেশ দিছে। এছ ডি আৰ এফ আৰু এন ডি আৰ এফৰ দলসমূহক সাজু কৰি ৰখা হৈছে। চৰকাৰে বানপানী হ’ব পৰা ঠাইৰ লোকসকলক সাৱধান হ’বলৈ আৰু নিৰাপদ স্থানলৈ যাবলৈ আহ্বান জনাইছে। লগতে ব্ৰহ্মপুত্ৰ আৰু ইয়াৰ উপনৈসমূহত নাও চলোৱা বা বানপানী হোৱা অঞ্চললৈ যোৱাৰ পৰা বিৰত থাকিবলৈ কোৱা হৈছে।
লখিমপুৰ জিলাত ৰঙানদীৰ পানী বঢ়াৰ বাবে হাই এলাৰ্ট জাৰি কৰা হৈছে আৰু সহায়ৰ বাবে ৬০০৩১৮৬২৬৮ নম্বৰৰ এটা হেল্পলাইন মুকলি কৰা হৈছে।
এই প্ৰথমটো বানপানীয়ে ধেমাজি জিলাত আটাইতকৈ বেছি ক্ষতি কৰিছে। নেৰানেপেৰা বৰষুণ আৰু অৰুণাচল প্ৰদেশৰ পানীৰ বাবে নদীসমূহৰ পানী উপচি পৰিছে। চৰকাৰী তথ্য অনুসৰি, ৮৪ খন গাঁৱৰ ২০ হাজাৰৰো অধিক লোক আক্ৰান্ত হৈছে আৰু প্ৰায় ৯২০ হেক্টৰ খেতিমাটি পানীৰ তলত গৈছে। জিয়াধল আৰু না-নদীৰ পানীয়ে বহুতো গাঁও জলমগ্ন কৰিছে যাৰ ফলত মানুহে খাদ্য আৰু খোৱাপানীৰ অভাৱত ভুগিছে। পথৰ ওপৰেৰে পানী যোৱাৰ বাবে বৰদৈবাম আৰু ঘিলামৰাৰ মাজত যাতায়াত বন্ধ হৈ পৰিছে।
জোনাই অঞ্চলতো পানী সোমাই মানুহৰ বিস্তৰ ক্ষতি কৰিছে। জিলা প্ৰশাসনে জীয়াধল পঞ্চায়তৰ অন্তৰ্গত ধৰ্মপুৰ লালুকিজান প্ৰাথমিক বিদ্যালয়ত এটা আশ্ৰয় শিবিৰ খুলিছে য’ত প্ৰায় ২০ টা পৰিয়ালক ৰখা হৈছে। ব্ৰহ্মপুত্ৰ নদীৰ পানীও বিপদসীমাৰ ওচৰৰে বৈ আছে।
আনহাতে বজালী জিলাতো বানপানীয়ে গুৰুতৰ ৰূপ ধাৰণ কৰিছে। কালদিয়া নদীৰ মথাউৰি প্ৰায় ৫০ মিটাৰ ছিঙি যোৱাৰ ফলত বহু খেতিমাটি আৰু ৰাস্তা-ঘাট পানীৰ তলত গৈছে। প্ৰায় ২,০০০ পশুধন আৰু ৩৫ হেক্টৰ খেতিমাটিৰ ক্ষতি হৈছে। স্থানীয় বিধায়ক ধৰ্মেশ্বৰ ৰায় ডাঙৰীয়াই বানত আক্ৰান্ত অঞ্চলসমূহ পৰিদৰ্শন কৰে।
ৰাইজে অভিযোগ কৰে যে মথাউৰিৰ ওচৰত মাটি খন্দাৰ বাবেই এই অৱস্থা হৈছে। বিধায়কগৰাকীয়ে ইয়াৰ তদন্তৰ নিৰ্দেশ দিয়াৰ লগতে পশুধনৰ বাবে বিনামূলীয়া খাদ্য দিয়াৰ কথা ঘোষণা কৰে।
ইফালে নেৰানেপেৰা বৰষুণৰ ফলত ডিব্ৰুগড় আৰু অৰুণাচল প্ৰদেশক সংযোগ কৰা ৩১৫-এ নম্বৰ ৰাষ্ট্ৰীয় ঘাইপথত ভূমিস্খলন হৈছে। জয়পুৰৰ কঠালগুৰিৰ ওচৰত ৰাস্তা ভাঙি যোৱাৰ বাবে গধুৰ বাহনৰ চলাচল বন্ধ কৰা হৈছে আৰু সন্ধিয়া ৬ বজাৰ পৰা পুৱা ৬ বজালৈ যাতায়াত নিষিদ্ধ কৰা হৈছে।
বৰষুণ আৰু নদীৰ পানী বাঢ়ি থকাৰ বাবে প্ৰশাসনে সকলো ৰাইজক সাৱধান হৈ থাকিবলৈ অনুৰোধ জনাইছে।
