অক্সফোৰ্ডৰ জেনাৰ ইনষ্টিটিউটৰ বিজ্ঞানীসকলে তৈয়াৰ কৰা সম্ভাৱ্য কৰ’না ভাইৰাছৰ ভেকচিনৰ ছয়টা বান্দৰৰ এটা দলৰ ওপৰত চলোৱা পৰীক্ষাত কিছু যোগাত্মক সংকেত লাভ কৰিছে।
প্ৰিপ্ৰিন্ট চাৰ্ভাৰ বায়’আৰএক্সিভ (preprint server bioRxiv)ৰ প্ৰতিবেদন অনুসৰি ভেকচিনৰ প্ৰয়োগ কৰা কেইটামান বান্দৰৰ ১৪ দিনৰ ভিতৰত কৰ’না ভাইৰাছৰ বিৰুদ্ধে এন্টিবডী তৈয়াৰ হৈছে।
আনহাতে, ভাইৰাছৰ শক্তিশালী মাত্ৰা প্ৰয়োগ কৰাৰ পূৰ্বে আটাইকেইটা বান্দৰৰে ২৮ দিনৰ ভিতৰত সুৰক্ষামূলক এন্টিবডী তৈয়াৰ হৈছে।
প্ৰয়োগৰ পাছত দেখা গৈছে যে ভেকচিনটোৱে হাওঁফাওৰ ক্ষতি ৰোধ কৰাৰ লগতে ভাইৰাছটোৱে ইয়াৰ বৃদ্ধি কৰাত বাধাত দিছে।
লণ্ডন স্কুল অফ হাইজিন এণ্ড ট্ৰপিকেল মেডিচিনৰ ফাৰ্মাক’পাইডেমিওলজিৰ এগৰাকী অধ্যাপক ষ্টিফেন ইভানছে কয় যে কৰ’না ভাইৰাছৰ বান্দৰৰ ওপৰত চলোৱা পৰীক্ষামূলক ভেকচিনৰ সম্বাৱনাপূৰ্ণ ফলাফল এক ‘ভাল খৱৰ’।
তেওঁ লগতে কয় যে বিশেষকৈ আশ্বাস দিব পৰা ইয়াৰ এটা ভাল দিশ হৈছে যে ইয়াত কোনো প্ৰতিৰোধ বৃদ্ধি কৰা ফলত হ’ব পৰা ৰোগৰ প্ৰমান নাই যিটোৱে এটা ভাইৰাছৰ বিৰুদ্ধে সুৰক্ষা দিয়াৰ পৰিৱৰ্তে প্ৰকৃততে ৰোগটো অধিক বেয়ালৈ নিব পাৰে।
অক্সফোৰ্ড য়ুনিভাৰ্ছিটিৰ এক বিবৃতিত কোৱা হৈছে যে সম্ভাৱনাপূৰ্ণ ভেকচিনটো এটা এডেনোভাইৰাছ ভেকচিন ভেক্টৰ (ChAdOx1)হে।
‘’SARS-CoV-2 (COVID-19)ৰ বাবে ইয়াক আটাইতকৈ উপযুক্ত ভেকচিন প্ৰযুক্তি হিচাপে পছন্দ কৰা হৈছে কিয়নো ই এটা ড’জৰ পৰাই এক শক্তিশালী প্ৰতিৰোধ ক্ষমতা তৈয়াৰ কৰিব পাৰে আৰু ই ভাইৰাছটোৰ প্ৰতিকৃতি সৃষ্টি নকৰে। গতিকেই ই ভেকচিন প্ৰদান কৰা ব্যক্তিৰ গাত চলি থকা সংক্ৰমণ ঘটাব নোৱাৰে,’’-বিবৃতিটোত লগতে কোৱা হয়।
‘’এডেনোভাইৰেল ভেক্টৰছ হৈছে এটা অতি পৰীক্ষিত ধৰণৰ ভেকচিন যাক হেজাৰবাৰ এবছৰৰ পৰা ৯০ বছৰৰ ব্যক্তিলৈকে ১০টাতকৈয়ো অধিক বিভিন্ন ৰোগক লক্ষ্য কৰি সুৰক্ষিতভাৱে ব্যৱহাৰ কৰি অহা হৈছে,’’-ইয়াত লগতে কোৱা হৈছে।
