পদ্মশ্ৰী বঁটাপ্ৰাপক বিশিষ্ট লেখিকা এলি আহমেদ অসুস্থ হৈ পৰাত দেওবাৰে আৰক্ষীয়ে তেওঁক উদ্ধাৰ কৰি হাস্পতালত ভৰ্তি কৰায়। বৰ্তমান মহানগৰীৰ ভি আই পি ৰোডস্থিত ৰহমান হাস্পতালত তেওঁ চিকিৎসাধীন হৈ আছে।
জানিব পৰা মতে, চানমাৰিৰ অসম ৰাজ্যিক হাউছিং কলনীৰ ব্লক-২ৰ ইউনিট-৬ নং বাসগৃহত বাস কৰা এলি আহমেদ প্ৰায় দুদিন ধৰি অসুস্থ অৱস্থাত ঘৰৰ মজিয়াত পৰি আছিল। যোৱা শুকুৰবাৰে বনকৰা মহিলাগৰাকী কাম শেষ কৰি উভতি যোৱাৰ পাছৰে পৰা তেওঁৰ কোনো খবৰ পোৱা হোৱা নাছিল। ঘৰলৈ দি যোৱা গাখীৰ বাহিৰতেই পৰি থকা দেখি ওচৰৰ বাসিন্দাসকলৰ সন্দেহ হয়। তেওঁলোকে ফোনযোগে যোগাযোগৰ চেষ্টা কৰিও কোনো সঁহাৰি পোৱা নাছিল। অৱশেষত দেওবাৰে ঘৰৰ দুৱাৰত টুকুৰিয়াইও উত্তৰ নাপোৱাত আবাসীসকলে আৰক্ষীক খবৰ দিয়ে।
খবৰ পাই চানমাৰি থানাৰ সহকাৰী উপ-পৰিদৰ্শক কলিতাৰ নেতৃত্বত আৰক্ষীৰ এটা দল ঘটনাস্থলীত উপস্থিত হয়। বহু চেষ্টাৰ অন্তত আৰক্ষীয়ে দুৱাৰ খুলিবলৈ সক্ষম হয় আৰু ঘৰৰ ভিতৰত শোৱনি কোঠাৰ মজিয়াত পৰি থকা অৱস্থাত এলি আহমেদক উদ্ধাৰ কৰে। আৰক্ষীক দেখি তেওঁ অতি দুৰ্বল মাতেৰে কয়, “মোক এখন কাপোৰ দিয়ক, বৰ ঠাণ্ডা লাগিছে।” আৰক্ষীয়ে তৎক্ষণাত এম্বুলেন্স মাতি তেওঁক ৰহমান হাস্পতাললৈ প্ৰেৰণ কৰে।
উল্লেখ্য যে ১৯৩৫ চনৰ ১৪ মাৰ্চত জন্মগ্ৰহণ কৰা এলি আহমেদৰ বয়স বৰ্তমান প্ৰায় ৯০ বছৰ। অবিবাহিতা লেখিকাগৰাকীয়ে দীৰ্ঘদিন ধৰি উক্ত বাসগৃহত অকলশৰীয়াকৈ বাস কৰি আহিছে। শিশু সাহিত্যিক আৰু গীতিকাৰ হিচাপে সুপৰিচিত এলি আহমেদে ২০১৫ চনত শিশু সাহিত্য অকাডেমি বঁটা আৰু ২০১৭ চনত পদ্মশ্ৰী সন্মান লাভ কৰিছিল।
এগৰাকী যশস্বী সাহিত্যিকৰ এনে অসহায় অৱস্থাই সাংস্কৃতিক তথা সাহিত্য জগতত গভীৰ দুখ আৰু উদ্বেগৰ সৃষ্টি কৰিছে।
