কণ্ঠশিল্পী তথা চলচ্চিত্ৰ নিৰ্মাতা পলাশ মুচলৰ বিৰুদ্ধে ৪০ লাখ টকা প্ৰতাৰণা কৰাৰ অভিযোগ উঠিছে। বুধবাৰে সন্ধিয়া ছাংলি জিলা আৰক্ষীক এই সন্দৰ্ভত এখন লিখিত এজাহাৰ দাখিল কৰা হয়।
অভিযোগকাৰীৰ নাম বৈভৱ মানে। তেওঁ পলাশৰ প্ৰাক্তন, ভাৰতীয় ক্ৰিকেটাৰ স্মৃতি মান্ধনাৰ শৈশৱৰ বন্ধু আৰু পেছাত চলচ্চিত্ৰত ধন বিনিয়োগকাৰী। এজাহাৰত তেওঁ কয় যে স্মৃতিৰ পিতৃ শ্ৰীনিবাস মান্ধনাৰ জৰিয়তে পলাশক ছাংলিত লগ পাইছিল।
বৈভৱে দাবী কৰিছে যে তেওঁৰ পৰা এখন ছবি নিৰ্মাণৰ বাবে ধন লোৱা হৈছিল, কিন্তু প্ৰকল্পটো ৰূপায়ন নহ’ল আৰু সেই ধন তেওঁক ঘূৰাই দিয়া নাই।
অভিযোগ পত্ৰৰ লগতে লেনদেনৰ নথি-পত্ৰ আৰু প্ৰমাণ ছাংলিৰ আৰক্ষী অধীক্ষকক জমা দিয়ে বৈভৱে।
বৈভৱ মানেই অভিযোগ কৰে যে পলাশ মুচলে ‘নাজৰিয়া’ নামৰ এখন ছবি নিৰ্মাণৰ বাবে বিনিয়োগৰ প্ৰস্তাৱ লৈ তেওঁৰ কাষ চাপিছিল। অ’টিটি প্লেটফৰ্মত ছবিখন ক্ষিপ্ৰতাৰে মুক্তি পাব আৰু বিনিয়োগৰ ধন কম সময়ৰ ভিতৰতে ঘূৰাই দিয়া হ’ব বুলি তেওঁক আশ্বাস দিয়া হৈছিল। এই আশ্বাসৰ ভিত্তিত তেওঁ মুঠ ৪০ লাখ টকা বিনিয়োগ কৰিছিল।
অভিযোগকাৰীয়ে দাবী কৰিছে যে এই ধন নগদ ধন হিচাপে আৰু গুগল পে’ৰ জৰিয়তে একাধিক কিস্তিত প্ৰদান কৰা হৈছিল। সেই সকলোবোৰ লেনদেনৰ প্ৰমাণো কৰ্তৃপক্ষক প্ৰদান কৰিছে।
অৱশ্যে ছবিখনৰ কাম সম্পূৰ্ণ নহ’ল বুলি অভিযোগ কৰা হৈছে। পিছত পইচা ঘূৰাই বিচৰাত পলাশ মুচলে প্ৰথমে টকা ঘূৰাই দিয়াৰ আশ্বাস দিয়ে। কিন্তু সময় পাৰ হৈ যোৱাৰ লগে লগে তেওঁ ফোন ৰিচিভ কৰা বন্ধ কৰি অৱশেষত অভিযোগকাৰীৰ নম্বৰটো ব্লক কৰি দিয়ে।
কেইমাহমান অপেক্ষা কৰি বৈভৱ মানেই ছাংলি আৰক্ষীৰ কাষ চাপি আৰ্থিক জালিয়াতিৰ অভিযোগ উত্থাপন কৰি এজাহাৰ দাখিল কৰে।
অভিযোগ গ্ৰহণ কৰি অভিযোগকাৰীয়ে দাখিল কৰা নথি-পত্ৰ পৰীক্ষা কৰি থকা বুলি আৰক্ষীয়ে জানিবলৈ দিয়ে। তদন্ত প্ৰক্ৰিয়া আৰম্ভ হৈছে।
উল্লেখ্য যে পলাশ মুচলে ইয়াৰ পূৰ্বে ক্ৰিকেটাৰ স্মৃতি মান্ধনাৰ সৈতে বিচ্ছেদৰ বাবে শিৰোনাম দখল কৰিছিল। সেই ঘটনাৰ কেইসপ্তাহমান পিছত তেওঁ পুনৰ কামলৈ আহি অভিনেতা শ্ৰেয়াস তালপাডেৰ সৈতে নিজৰ পৰৱৰ্তী প্ৰজেক্টৰ প্ৰস্তুতি আৰম্ভ কৰে। তাৰ মাজতে এই অভিযোগ পোহৰলৈ আহিল।
