অসমৰ ৭১নং বিহালী বিধানসভা সমষ্টিত বলিছে উপ-নির্বাচনকেন্দ্রিক বতাহ।বিশেষকৈ শাসকীয় দল বিজেপিৰ নেতাৰ মাজত সমষ্টিটোত আৰম্ভ হৈছে প্রার্থিত্বকেন্দ্রিক তীব্র সংঘাত।বিজেপিৰ কেইবাজনো হেভীৱেইট নেতাই নিজকে বিজেপিৰ উপ-নির্বাচনৰ প্রার্থী হিচাপে সদম্ভে ঘোষণা কৰিছে৷
এইসমূহ চৰ্চাৰ মাজতে বিৰোধী কংগ্ৰেছ দলেও উপ-নির্বাচনৰ বাবে প্ৰস্তুতি আৰম্ভ কৰিছে। বিহালী বিধানসভাৰ উপ-নির্বাচনত অসম প্রদেশ কংগ্ৰেছৰ সভাপতি ভূপেন কুমাৰ বৰা প্রার্থী হ’ব পাৰে বুলি চর্চা চলাৰ সময়তে সমষ্টিটোত নির্বাচনত প্ৰতিদ্বন্দ্বিতা কৰাৰ মানসেৰে জনসম্পর্ক অভিযান আৰম্ভ কৰা তেজপুৰ লোকসভা সমষ্টিৰ বিজেপিৰ প্ৰাক্তন সাংসদ তথা ৰাজ্যিক বিজেপিৰ সাধাৰণ সম্পাদক পল্লৱলোচন দাসে ভূপেন কুমাৰ বৰাক প্রতিদ্বন্দ্বিতালৈ আদৰণি জনোৱা পৰিলক্ষিত হৈছে। বিহালীত হ’বলগীয়া উপ-নির্বাচনত বিজেপি দলৰ প্রার্থী হ’ব বুলি ইংগিত দি ভূপেন কুমাৰ বৰা সন্দৰ্ভত প্রতিক্রিয়া প্রকাশ কৰি পল্লৱলোচন দাসে সংবাদ মাধ্যমৰ আগত কয় যে ৰাজ্যিক সভাপতিক হৰুওৱাটো তেওঁৰ এক ট্রেক তথা সৌভাগ্য। সেয়েহে পুনৰ এইবাৰো আন এগৰাকী ৰাজ্যিক সভাপতিক হৰুৱাবলৈ সাজু তেওঁ। উল্লেখ্যো যে ২০১১ চনৰ বিধানসভা নির্বাচনত ৰঞ্জিত দত্ত বিজেপিৰ ৰাজ্যিক সভাপতি হৈ থকা সময়ত বিহালী বিধানসভা সমষ্টিত ৰঞ্জিত দত্তক কংগ্ৰেছৰ প্ৰাৰ্থী হিচাপে পৰাস্ত কৰিছিল পল্লৱলোচন দাসে। সেয়েহে পল্লৱলোচন দাসে সেই সময়ৰ অভিজ্ঞতা সোঁৱৰণ কৰি ৰঞ্জিত দত্তৰ নাম নোলোৱাকৈ ৰাজ্যিক সভাপতিক পৰাভূত কৰা তেওঁৰ ট্ৰেক ৰেকৰ্ড আগৰ পৰাই আছে বুলি একধৰণৰ দাম্ভিক মন্তব্য কৰিছে।
লগতে পল্লৱলোচন দাসে সংবাদ মাধ্যমৰ আগত কয় যে যদি তেওঁ দলীয় টিকট লাভ কৰে তেন্তে পুনৰবাৰ আন এগৰাকী ৰাজ্যিক সভাপতি ভূপেন কুমাৰ বৰাক হৰুৱাই তেওঁৰ সন্মান আৰু ৰাজনৈতিক দক্ষতা বৃদ্ধি কৰি তুলিব পাৰিব। ৰাজ্যিক সভাপতিক হৰুওৱাৰ সন্মানটো তেওঁৰ সদায় থাকি যাব বুলি ইতিকিংসূচক মন্তব্য কৰে পল্লৱলোচন দাসে।
