৯ ডিচেম্বৰত অনষ্ঠিত হ’বলগীয়া দ্বিতীয় পৰ্যায়ৰ পঞ্চায়ত নিৰ্বাচনৰ বতাহে উত্তাল কৰি তুলিছে গোৱালপাৰা জিলাৰ কৃষ্ণাই অঞ্চল ৷ ইতিমধ্যে প্ৰতি গৰাকী দলীয়-নিৰ্দলীয় প্ৰাৰ্থীয়ে নিজৰ সমৰ্থনত সভা-সমিতি অনুষ্ঠিত কৰাৰ বিপৰীতে তিনি গৰাকী প্ৰাৰ্থীয়ে বৃহস্পতিবাৰে নিজৰ প্ৰচাৰৰ উদ্দেশ্যে কৃষ্ণাই অঞ্চলৰ গাঁৱে ভূঁঞে বিশাল সমদল উলিয়ায় ৷
কালি পোনতে কৃষ্ণাই গাঁও পঞ্চায়তৰ সভাপতিৰ প্ৰাৰ্থী ৰামিছ ৰাজা (ৰাজকুমাৰ)এ নিজৰ সমৰ্থকক লগত এক সমদল উলিয়ায় ৷ তাৰ পিছতে মানিকপুৰ ভেলাখামাৰ গাঁও পঞ্চায়তৰ সভানেত্ৰী পদৰ প্ৰাৰ্থী নাজিয়া হুছেইন (ৰূপা)ৰ সমৰ্থকে এক বিশাল সমদল উলিয়াই ভোটাৰক আকৰ্ষণ কৰাৰ চেষ্টা কৰে।
কিন্তু লক্ষ্যণীয়ভাৱে কৃষ্ণাই গাঁও পঞ্চায়তৰ বিজেপি দলৰ সভাপতি পদৰ প্ৰাৰ্থী চাহাবুল হক (ভাইটি)এ দুপৰীয়া উলিওৱা সমদলে সকলোৰে দৃষ্টি আকৰ্ষণ কৰে। প্ৰায় তিনি হেজাৰৰোধিক সমৰ্থকে গাড়ী মটৰ তথা ই ৰিক্সাৰে সমগ্ৰ কৃষ্ণাই অঞ্চলত চাহাবুল হকৰ সমৰ্থনত সমদল কৰি প্ৰচাৰ চলায়।
ইফালে কৃষ্ণাই জিলা পৰিষদৰ বি পি এফৰ প্ৰাৰ্থী মিন্ঠুলিনা এম চাংমা বসুমতাৰীৰ সমৰ্থনত কালি কৃষ্ণাইত এখন নিৰ্বাচনী সভা অনুষ্ঠিত হয়। উক্ত নিৰ্বাচনী সভাত বি পি এফৰ নেতা তথা ৰাজ্যসভাৰ সাংসদ বিশ্বজিৎ দৈমাৰী উপস্থিত থাকি ভাষণ প্ৰদান কৰে।
আনহাতে বিয়লি ভাগতো বহু কেইগৰাকী প্ৰাৰ্থীৰ সমৰ্থকে বিভিন্ন শ্লোগানেৰে নিৰ্বাচনী প্ৰচাৰ চলোৱা পৰিলক্ষিত হয় ৷ উল্লেখ্য যে আজি দ্বিতীয় পৰ্যায়ৰ পঞ্চায়ত নিৰ্বাচনৰ প্ৰচাৰ কাৰ্য সন্ধিয়া ৫ বজাত আনুষ্ঠানিকভাৱে সামৰণি পৰিব ৷
