যোৱা ৫ আৰু ৯ ডিচেম্বৰত ৰাজ্যখনত দুটা পৰ্যায়ত অনুষ্ঠিত হৈ যোৱা পঞ্চায়ত নিৰ্বাচনৰ ভোট গণনা আজি পুৱা ৮ বজাত আৰম্ভ হৈছে। ইতিমধ্যে ভোটগণনা কেন্দ্ৰত প্ৰাৰ্থী আৰু দলীয় কৰ্মী-সমৰ্থকৰ ভিৰ আৰম্ভ হৈ গৈছে।
অৱশ্যে ভোট গণনা আৰম্ভ হ’লেও ফলাফল ওলাবলৈ যথেষ্ট সময়ৰ প্ৰয়োজন হ’ব আৰু হয়তো আজি সন্ধিয়াৰ ভিতৰত পোৱা নাযাব পাৰে বহু সংখ্যক প্ৰাৰ্থীৰ জয়-পৰাজয়ৰ স্পষ্ট ছবি। কাৰণ পৰম্পৰাগত বেলট পেপাৰত হোৱা এই ভোট গণনাত অধিক সময় লগাটোৱেই স্বাভাৱিক। ইয়াৰ উপৰি থাকিব পুনৰ গণনাৰ দাবী-আপত্তি আদিবোৰো।
উল্লেখযোগ্য যে ষষ্ঠ অনুসূচী এলেকাৰ জিলাকেইখনক বাদ দি ৰাজ্যৰ মুঠ ২৬খন জিলাত এই নিৰ্বাচন অনুষ্ঠিত হৈছে। এইবাৰ মুঠ ২৬,৮০৮টা পদত ৭৮,৫৭১গৰাকী প্ৰাৰ্থীয়ে নিৰ্বাচনত প্ৰতিদ্বন্দ্বিতা কৰিছে। পদবিলাকৰ ভিতৰত জিলা পৰিষদ সদস্যৰ ৪২০টা, গাঁও পঞ্চায়তৰ সভাপতি আৰু আঞ্চলিক পঞ্চায়তৰ সদস্য (কাউন্সিলৰ) ২১৯৯টাকৈ আৰু গাঁও পঞ্চায়তৰ সদস্যৰ ২১,৯৯০টা।
ৰাজ্যিক নিৰ্বাচন আয়োগে জনোৱা মতে, ৰাজ্যিক নিৰ্বাচন আয়োগৰ গণনা কেন্দ্ৰত ক্ল’জ চাৰ্কিট কেমেৰাৰ ব্যৱস্থা কৰা হৈছে।
যিহেতু পৰম্পৰাগত বেলট পেপাৰ পদ্ধতিত ভোটগ্ৰহণ কৰা হৈছে আৰু প্ৰতিটো পদৰ বাবে সুকীয়া সুকীয়া মুঠ ৪খন বেলট পেপাৰ ব্যৱহাৰ কৰা হৈছে, গতিকে গণনা প্ৰক্ৰিয়া কিছু লেহেমীয়া হোৱাৰ সম্ভাৱনা আছে। লগতে এইবোৰত পুনৰ গণনাৰ দাবী উঠাৰ সম্ভাৱনাও ই ভি এম পদ্ধতিতকৈ বহুগুণে বেছি।
গতিকে আজি সন্ধিয়ালৈ কিছু সংখ্যক প্ৰাৰ্থীৰহে ফলাফল জানিব পৰা যাব। সম্পূৰ্ণ ফল পাবলৈ বা উৎকণ্ঠাৰ অন্ত পৰিবলৈ কাইলৈ পৰ্য্যন্ত ৰ’ব লগীয়া হোৱাৰ সম্ভাৱনা আছে।
পঞ্চায়ত নিৰ্বাচনৰ ফলাফলে ৰাজ্যত বহু কথাৰে ইংগিত কৰিব বুলি ৰাজনৈতিক বিশ্লেষকসকলে ইতিমধ্যে পূৰ্বানুমান কৰিছে। বিশেষকৈ নাগৰিকত্ব সংশোধনী বিধেয়ক বিৰোধী আন্দোলনৰ কেনেদৰে এই নিৰ্বাচনত প্ৰতিফলন ঘটে সেয়া নিশ্চয়কৈ লক্ষণীয় হ’ব।