ৰাম মন্দিৰৰ ভূমিপূজনত প্ৰধানমন্ত্ৰী নৰেন্দ্ৰ মোদীয়ে অংশগ্ৰহণ কৰাৰ মানেই দেশৰ ধৰ্মনিৰপেক্ষতাৰ চৰ্তক ভংগ কৰা। এই মন্তব্য কৰিলে আছাদুদ্দিন ওৰেছীয়ে।
এ আই এম আই এমৰ নেতাগৰাকীৰ মতে প্ৰধানমন্ত্ৰী নৰেন্দ্ৰ মোদী ৰাম মন্দিৰৰ ভূমিপূজন অনুষ্ঠানলৈ যোৱা উচিত নহয়।
কাৰণ, ৰাম মন্দিৰৰ ভূমিপূজনলৈ প্ৰধানমন্ত্ৰীয়ে যোৱাৰ লগে লগে সংবিধানৰ ধৰ্মনিৰপেক্ষ চৰ্তক লংঘন কৰা হ’ব।
তেওঁ আনকি এই বুলিও মন্তব্য কৰিছে যে, ভূমিপূজন অনুষ্ঠানলৈ প্ৰধানমন্ত্ৰী নৰেন্দ্ৰ মোদীয়ে দেশৰ প্ৰধানমন্ত্ৰী হিচাপে যাব নে এজন ব্যক্তি হিচাপে যাব সেয়া দেশবাসীক জনোৱা উচিত।
মঙলবাৰে এ আই এম আই এমৰ নেতাগৰাকীৰ টুইট কৰি লিখিছে, “প্ৰধানমন্ত্ৰী হিচাপে ভূমিপূজনত অংশগ্ৰহণ কৰা মানে প্ৰধানমন্ত্ৰীৰ সাংবিধানিক চৰ্তক লংঘন কৰা। কাৰণ, ধৰ্ম নিৰপেক্ষতা আমাৰ সংবিধামৰ মূল ভিত্তি। সেয়ে প্ৰধানমন্ত্ৰীয়ে দেশক জনোৱা উচিত যে তেওঁ তাত ব্যক্তি হিচাপে নে প্ৰধানমন্ত্ৰী হিচাপে উপস্থিত থাকিব।”
এ আই এম আই এমৰ নেতাগৰাকীয়ে আৰু কয় যে, বাবৰি মছজিদ ভাঙিলেও সেয়া তেওঁৰ হৃদয়ত সদায় থাকিব। অযোধ্যাত ৪০০ বছৰ দিন থকা মছজিদটোৰ কথা তেওঁ কেতিয়াও পাহৰিব নোৱাৰে বুলিও মন্তব্য কৰে।
এক সংবাদ প্ৰতিষ্ঠানত দিয়া সাক্ষাৎকাৰত তেওঁ দাবী কৰিছে, “ৰাম মন্দিৰ ইছ্যুটো বিভাজনমূলক। ক’ৰ’নাতংকই সমগ্ৰ দেশক আগুৰি ধৰাৰ সময়ত যদি প্ৰধানমন্ত্ৰীয়ে গৈ মন্দিৰৰ ভূমিপূজন কৰে, তেনেহ’লে ধৰ্ম স্থানসমূহো খুলি দিয়া উচিত।”
আনহাতে ওৱেছীৰ এই বিৰোধক বিজেপিয়ে বৰ বিশেষ গুৰুত্ব প্ৰদান কৰা পৰিলক্ষিত হোৱা নাই।
উল্লেখ্য যে, অহা ৫ আগষ্টত অযোধ্যাৰ ৰাম মন্দিৰৰ ট্ৰাষ্ট-এ ৰাম মন্দিৰৰ ভূমিপূজন অনুষ্ঠানত প্ৰধানমন্ত্ৰী নৰেন্দ্ৰ মোদী উপস্থিত থাকিব বুলি দাবী কৰি আহিছে।
ইফালে উত্তৰ প্ৰদেশৰ মুখ্যমন্ত্ৰী যোগী আদিত্যনাথেও ভূমিপূজন অনুষ্ঠানত প্ৰধানমন্ত্ৰী নৰেন্দ্ৰ মোদী উপস্থিত থাকিব বুলি জনাইছে।
অৱশ্যে প্ৰধানমন্ত্ৰীৰ দপ্তৰে চৰকাৰীভাৱে এতিয়াও এই সম্পৰ্কত কোনো চৰকাৰী ঘোষণা কৰা নাই।
