গোলাঘাট জিলাত কোভিড-১৯ৰ প্ৰাদুৰ্ভাৱ ৰোধ কৰাৰ উদ্দেশ্যে কাইলৈৰে পৰা জিলাখনলৈ গুৱাহাটীৰ পৰা অহা সকলো বাছ, অন্যান্য বাহন আৰু ব্যক্তিগত বাহনৰ যাত্ৰী আৰু চালক-কৰ্মচাৰীৰ কোভিড পৰীক্ষা কৰোৱা হ’ব।
নুমলীগড়ত গুৱাহাটীৰ পৰা অহা বাহনসমূহ ৰখাই ৰেপিড এন্টিজেন টেষ্ট কৰোৱাৰ বাবে ব্যৱস্থা গ্ৰহণ কৰা হৈছে।
সোমবাৰে জিলা উপায়ুক্তৰ কাৰ্য্যালয়ৰ সভাকক্ষত অনুষ্ঠিত কোভিড-১৯ৰ স্থিতি আৰু ইয়াৰ বিৰুদ্ধে যুঁজ দিয়াৰ বাবে প্ৰয়োজনীয় প্ৰস্তুতি সন্দৰ্ভত হোৱা এখন পৰ্যালোচনা বৈঠকত জিলা উপায়ুক্ত বিভাষ চন্দ্ৰ মোদীয়ে এই নিৰ্দেশ দিয়ে।
তেওঁ ২৪ ঘণ্টাই গুৱাহাটীৰ পৰা অহা বাহনসমূহৰ লোকসকলৰ কোভিড পৰীক্ষা কৰিবলৈ কঠোৰ নিৰ্দেশ দিয়ে।
তেওঁ কয় যে গুৱাহাটীৰ পৰা অহা অধিকাংশ লোকৰ দেহতে কোভিডৰ সংক্ৰমণ ধৰা পৰাৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হৈছে। লগতে কাইলৈৰে পৰা গোলাঘাট নগৰৰ বিভিন্ন প্ৰৱেশ পথত মাস্ক পৰিধান নকৰা লোকৰ বিৰুদ্ধে এহেজাৰ টকা পৰ্যন্ত জৰিমনা বিহা হ’ব।
জিলা উপায়ুক্ত গৰাকীয়ে ইতিমধ্যে জিলাখনৰ বাট-পথ, চিকিৎসালয়, কাৰ্যালয়, বজাৰ আদি সকলো ৰাজহুৱা স্থানত প্ৰতিজন লোকেই তিনিটা তৰপ থকা মাস্ক পিন্ধাটো বাধ্যতামূলক ঘোষণা কৰিছে।
মাস্ক নাথাকিলে গামোচা বা অন্য কাপোৰেৰে অন্ততঃ দুটা তৰপ কৰি মুখ আৰু নাক ভালকৈ ঢাকি ল’ব লাগিব। ব্যক্তিগত, চৰকাৰী অথবা ৰাজহুৱা বাহনত ভ্ৰমণ কৰোতেও মাস্ক পৰিধান কৰিব লাগিব। কাৰ্যালয় অথবা যিকোনো কৰ্মস্থলীত মাস্ক পৰিধান কৰাটো বাধ্যতামূলক।
কোনো লোকে মাস্ক পৰিধান নকৰিলে ভাৰতীয় দণ্ডবিধিৰ ১৮৮ ধাৰাৰ অধীনত শাস্তিমূলক ব্যৱস্থা গ্ৰহণ কৰা হ’ব। মাস্ক পৰিধান নকৰা ব্যক্তিয়ে ১০০০ টকা পৰ্যন্ত জৰিমনা ভৰিব লাগিব।
উপায়ুক্তগৰাকীয়ে কয় যে সজাগতাইহে এই ৰোগ প্ৰতিৰোধ কৰাত সহায় কৰিব। মাস্ক নিপিন্ধা লোকক ৰেহাই দিয়া নহ’ব বুলি উল্লেখ কৰি তেওঁ কয় যে সময়ে সময়ে তেওঁ নিজেই গৈ বিভিন্ন স্থান পৰিদৰ্শন কৰিব।
ইপিনে কোভিডৰ বিৰুদ্ধে যুঁজ দিয়াৰ বাবে জিলা স্বাস্থ্য বিভাগেও প্ৰয়োজনীয় প্ৰস্তুতি গ্ৰহণ কৰিছে। ৪৫ বছৰ বয়সৰ উৰ্ধৰ লোকসকলক কোভিড প্ৰতিষেধক গ্ৰহণ কৰিবলৈ উপায়ুক্তগৰাকীয়ে আহ্বান জনায়।
বৈঠকত জিলা স্বাস্থ্য সেৱাৰ যুটীয়া সঞ্চালক অৰুণ চন্দ্ৰ মহন্ত আৰু জিলা প্ৰশাসন তথা স্বাস্থ্য বিভাগৰ ভালেসংখ্যক বিষয়া কৰ্মচাৰী উপস্থিত আছিল।
