লুইতৰ পাৰ জিলিকোৱাৰ প্ৰতিশ্ৰুতি বহনকাৰী গুৱাহাটী বিশ্ববিদ্যালয়ে উত্তৰ-পূবৰ দুৱাৰমুখ গুৱাহাটীত বছৰ বছৰ ধৰি জিলিকাই ৰাখিছে ভূতবাংলোসদৃশ তথ্যকেন্দ্ৰটো।
আমবাৰীত অগপ মুখ্যালয়ৰ সমীপতে থকা কেন্দ্ৰটোত কোনো দৰ্শনাৰ্থী তথ্য বিচাৰি গ’লে অতিক্ৰম কৰিবলগা হয় মকৰাজালৰ নিৰাপত্তা বেহু।
মকৰাজাল আৰু জংঘলৰ মাজত ফঁটা দেৱালেৰে থিয় হৈ আছে উত্তৰ-পূবৰ প্ৰথমখন বিশ্ববিদ্যালয়ৰ তথ্য কেন্দ্ৰটো। চৌহদৰ শোভা বঢ়াই নিথৰ হৈ পৰি আছে মদৰ কেইটামান খালী বটল।
মকৰাজাল আৰু ধূলিৰ মাজত এতিয়াও নিজৰ অস্তিত্ব বৰ্তাই আছে ৭ বছৰ পূৰ্বেই অঁৰা এখন জাননী। গুৱাহাটী বিশ্ববিদ্যালয়ৰ ইতিহাস ধৰি ৰখা এই জাননীৰ পিছত আৰু হয়তো একো ঘোষণা অঁৰা হোৱা নাই ফলকখনত।
আৰু এই ভূতবাংলোসদৃশ কেন্দ্ৰৰ চোৱা-চিতা কৰিবলৈ মাহিলী দৰমহা দি দুজন কৰ্মচাৰী ৰাখিছে বিশ্ববিদ্যালয় কৰ্তৃপক্ষই। দায়িত্বত আছে শৈলেন্দ্ৰ নাথ ডেকা আৰু জয়ন্ত ঠাকুৰীয়া।
“আমাৰ কাম বুলিবলৈ একোৱেই নাথাকে,” ৰাজহুৱা দৰ্মহা লৈ থকা প্ৰতিষ্ঠানটো অন্ততঃ পৰিস্কাৰকৈ ৰখাটো হয়তো অতিৰিক্ত আৰু অকৰণীয় বুলি গণ্য কৰা শৈলেন্দ্ৰ নাথ ডেকাৰ মন্তব্য।
ডেকাৰ মতে তেওঁ ১০ হাজাৰ আৰু জয়ন্ত ঠাকুৰীয়াই ২৬ হাজাৰ টকাকৈ মাহিলী দৰমহা লাভ কৰি আছে। ডেকাই ২০১২ চনৰ ৩০ নৱেম্বৰত কেন্দ্ৰটোত যোগ দিয়াৰ বিপৰীতে তাৰ তিনি বছৰ পূৰ্বে যোগ দিছিল ঠাকুৰীয়াই।
ইপিনে ডেকাই সদৰী কৰা মতে তথ্যকেন্দ্ৰটোৰ বিজুলী বিলো বিশ্ববিদ্যালয়ে পৰিশোধ নকৰে, ফলত তেওঁলোকে নিজেই ইয়াৰ ধন ভৰি আহিছে। ডেকাই কয় কাৰেন্টৰ বিলসমূহ বিশ্ববিদ্যালয় কৰ্তৃপক্ষক জমা দি আহিছে যদিও “ফাইলটো বিচাৰি নোপোৱা” বাবে প্ৰাপ্য ধন কৰ্তৃপক্ষই মোকলাই দিব পৰা নাই।
জালুকবাৰীত অৱস্থিত বিশ্ববিদ্যালয়খনৰ নগৰৰ মুখ কেন্দ্ৰটোৰ এই অৱস্থাত কোনো উদ্বিগ্নতাভৰা প্ৰতিক্ৰিয়া নাই উপাচাৰ্য্য মৃদুল হাজৰিকাৰ।
“তথ্য কেন্দ্ৰটো নামতহে আছে। লাগি থকা চাইন ব’ৰ্ডখন উঠাইহে দিব লাগে। আজিকালি অনলাইনৰ যুগ। তথ্য কেন্দ্ৰত গৈ তথ্য লোৱাৰ প্ৰক্ৰিয়া নাইকিয়া হৈ গৈছে। আজিকালি ৱে’বচাইট আহিছে,” এয়া উপাচাৰ্য্য হাজৰিকাৰ মন্তব্য।
অথচ কেৱল নগৰৰ সোঁমাজতে নহয়, কেন্দ্ৰটো অৱস্থিত গুৱাহাটীত পৰ্য্যটকৰ দৰ্শনীয় স্থানসমূহৰ লগতে। কাষতে থূপ খাই আছে ৰবীন্দ্ৰ ভৱন, পুথিভঁৰাল, নেদফি হাট, দীঘলীপুখুৰী, ৰাজ্যিক সংগ্ৰহালয়কে ধৰি বহুকেইটা পৰ্য্যটন থলী। পৃথিৱীৰ বিখ্যাত বিশ্ববিদ্যালয়সমূহে দৰ্শনাৰ্থীৰ বাবে ৰাখে বিশেষ ভ্ৰমণ পেকে’জ।
“চাইনব’ৰ্দখনো উঠাই দিব লাগে” বুলি মন্তব্য কৰাৰ পিছত একেটা প্ৰতিক্ৰিয়াতে একেগৰাকী উপাচাৰ্য্যই “এইবাৰ বাজেটত কেন্দ্ৰটোৰ আন্তঃগাঁথনি উন্নয়নৰ বাবে ধন ধাৰ্য্য কৰা হৈছিল” আৰু “তাত অন্য এটা কেন্দ্ৰ স্থাপন কৰিবলৈ চিন্তা-চৰ্চা কৰা হৈছে” বুলিও বিৰোধমূলক যেন লগা তিনিটা কথা প্ৰকাশ কৰে।
“এইবছৰ বাজেটত এই কেন্দ্ৰটোৰ আন্তঃগাঁথনি উন্নয়ন কৰাৰ বাবে ধন ধায্য কৰা হৈছে। আমি সেই তথ্য কেন্দ্ৰটো ভাঙি তাৰ ঠাইত মডাৰ্ন তথ্যকেন্দ্ৰ নিৰ্মাণ কৰিব পাৰিলোহেঁতেন। কিন্তু তথ্যকেন্দ্ৰৰ ওপৰ মহলাটোত মেডিকেল এছ’চিয়েছনৰ এক কাৰ্য্যালয় আছে। গতিকে পুনৰ নিৰ্মাণ কৰিবলৈ হ’লে যুটীয়াভাৱে কৰিব লাগিব।…. আমি বেলেগ এটা কেন্দ্ৰ নিৰ্মাণ কৰাৰ কথা ভাবিছো। আলোচনা চলি আছে, কিন্তু কেনেকুৱা কি স্থাপন কৰা হ’ব সেয়া এতিয়াও ঠিক হোৱা নাই। মুঠতে নতুন কেন্দ্ৰ এটা তাত নিৰ্মাণ হ’ব,” এয়া উপাচাৰ্য্যৰ মন্তব্য।
কেন্দ্ৰটোৰ কৰ্মচাৰীজনৰ বিজুলী বিলৰ অভিযোগ ‘ভিত্তিহীন’ বুলিও হাজৰিকাই দাবী কৰে।
এইদৰেই জিলিকিবনেকি লুইতৰ পাৰ?
প্ৰাক্তন ছাত্ৰ-ছাত্ৰী, বৰ্তমানৰ ছাত্ৰ-ছাত্ৰী, প্ৰাক্তন আৰু বৰ্তমানৰ শিক্ষক, সংগঠন, বিশিষ্ট– কাৰো গাত নালাগেনে বিশ্ববিদ্যালয়ৰ লেতেৰা, পৰিত্যক্ত ঘৰটো দেখি?
