আজি পাঠশালা আঞ্চলিক ছাত্ৰ সন্থাৰ কাৰ্য্যালয় সম্পাদক দ্বীপ গাংগুলিৰ ঘৰত মাক দেউতাক নথকা অৱস্থাত তেওঁৰ কনিষ্ঠ ভাতৃক ভাৰতীয় জনতা পাৰ্টীৰ ছয়জনমান মহিলা কৰ্মীয়ে গৈ প্ৰাণে মৰা ভাবুকি প্ৰদান কৰাৰ লগতে অশ্লীল ভাষাৰে গালি গালাজ পাৰে। লগতে নাগৰিকত্ব (সংশোধনী) বিধেয়কৰ বিৰোধিতা কৰি থাকিলে গাঁৱৰ পৰা খেদি পঠোৱাৰো ভাবুকি প্ৰদান কৰে।
এই সন্দৰ্ভত বৰপেটা জিলা ছাত্ৰ সন্থাৰ সাধাৰণ সম্পাদক সমুদ্ৰ পাটগিৰিয়ে এখন সংবাদমেল যোগে ভাৰতীয় জনতা পাৰ্টীৰ বজালী জিলা সমিতিৰ যদি সৎ সাহস আছে তেতিয়া হ’লে এনেকৈ চোৰৰ দৰে মানুহ নোহোৱাত ‘আছু’ কৰ্মীৰ ঘৰত গৈ দম দি যি প্ৰতিবাদী কণ্ঠ নোহোৱা কৰিব বিচাৰিছে তাক তীব্ৰ ভাষাৰে গৰিহণা দিয়ে।
লগতে এনেকৈ যদি প্ৰতিবাদী কণ্ঠ ৰোধ কৰাৰ বাবে ‘আছু’ কৰ্মীৰ ঘৰত গৈ ভয় ভাবুকি প্ৰদান কৰে তেতিয়া হ’লে ইয়াৰ অৱস্থা ভয়াৱহ হ’ব বুলি সকীয়াই দিয়ে। হিমন্ত বিশ্ব শৰ্মাই পাঠশালাত মত বিনিময় অনুষ্ঠানত উপস্থিত থাকি ক’লা পতাকা দেখুৱা লোকসকল ভাড়াতীয়া বুলি কোৱা কথাৰ প্ৰত্যুত্তৰ দি কয় যে আন ঠাইৰ মানুহ এজন যদি আন ঠাইত আহি বিধায়ক হ’ব পাৰে তেতিয়া হ’লে বিভিন্ন স্থানৰ পৰা পঢ়িব অহা ছাত্ৰ ছাত্ৰীয়ে কিয় ক’লা পতাকা দেখুৱাব নোৱাৰে।
আনহাতে পাঠশালা আঞ্চলিক ছাত্ৰ সন্থাৰ কাৰ্য্যালয় সম্পাদক দ্বীপ গাংগুলিয়ে কয়, ‘‘বিজেপি চৰকাৰে যিমানেই প্ৰতিবাদী কণ্ঠ ৰোধ কৰিবলৈ ভয় নেদেখুৱাক কিয় মই এজন খিলঞ্জীয়া বাঙালী হিচাপে নাগৰিকত্ব (সংশোধনী) বিধেয়কৰ বিৰোধিতা কৰি আহিছিলোঁ, কৰি আছো আৰু কৰি যাম।’’
