প্ৰদূষণমুক্ত ভাৰতৰ গঢ় দিয়াৰ বাবে সজাগতা সৃষ্টি কৰিবলৈ এক অভিনৱ পদক্ষেপ গ্ৰহণ কৰিছে বজালী জিলাৰ পাঠশালাৰ এজন যুৱকে। ১১০০ কিলোমিটাৰ চাইকেল চলাই ঝাৰখণ্ডলৈ যোৱাৰ পদক্ষেপ হাতত লৈছে যুৱকজনে।
পাঠশালাৰ টিটকা গাঁৱৰ ২৬ বছৰীয়া হিমাংশু শৰ্মা নামৰ প্ৰকৃতিপ্ৰেমী যুৱকজনে ২১ জুলাইত এই অভিযান আৰম্ভ কৰিছে। যোৱা ২৬ জুলাইত পশ্চিম বংগ আৰু বিহাৰৰ মাজেৰে চাইকেলেৰে ঝাৰখণ্ডৰ বাবা বৈদ্যনাথ ধাম মন্দিৰত উপস্থিত হৈছে যুৱকজন।
উল্লেখ্য যে শাওন মাহত এই মন্দিৰত দেশৰ বিভিন্ন প্ৰান্তৰ লাজ লাখ ভক্তই ভিৰ কৰে। সেই বাবেই উক্ত স্থানলৈ সজাগতাৰ বাবে যাত্ৰা কৰিছে হিমাংশু শৰ্মাই।
বাবা বৈদ্যনাথ ধাম মন্দিৰৰ ধৰ্মীয় পৰিৱেশৰ মাজত তেওঁ ক্ৰমাৎ বৃদ্ধি পোৱা বায়ু প্ৰদূষণ আৰু বহনক্ষম পৰিবহণৰ গুৰুত্বৰ বিষয়ে বাৰ্তা প্ৰচাৰ কৰাৰ সিদ্ধান্ত গ্ৰহণ কৰে।
শৰ্মাই কয় যে যান-জঁটৰ ফলত বায়ু প্ৰদূষণৰ বৃদ্ধি পাইছে। বায়ু প্ৰদূষণে আমাৰ মানৱ জাতিৰ স্বাস্থ্য আৰু কল্যাণৰ হেঙাৰ হৈ থিয় দিছে।
“মানুহে মটৰ চাইকেল আৰু গাড়ীৰ ওপৰত অত্যধিক নিৰ্ভৰশীল হৈ পৰিছে। কিন্তু আমি নিজৰ ভালৰ বাবে এই অভ্যাসটো কমাব লাগিব। চাইকেল চলোৱাটো প্ৰদূষণ হ্ৰাস কৰাৰ এক উত্তম উপায়ৰ লগতে ব্যক্তিগত স্বাস্থ্যৰ বাবেও উপকাৰী।’’ তেওঁ লগতে কয়।
এই যাত্ৰা সমাপ্ত কৰি হিমাংশু শৰ্মাই সকলোকে পৰিৱেশ ৰক্ষাৰ বাবে হাত আগবঢ়াবলৈ আৰু সজাগতা সৃষ্টি কৰিবলৈ আহ্বান জনাইছে।
হিমাংশুৰ এই পদক্ষেপক আদৰণি জনাইছে বিভিন্ন দল-সংগঠন আৰু সমাজ সচেতন লোকে।
