প্ৰথম পৰ্যায়ৰ শান্তি আলোচনা ছুইজাৰলেণ্ডত অনুষ্ঠিত হোৱাৰ পাছত এতিয়া দ্বিতীয় পৰ্যায়ৰ প্ৰস্তুতি আৰম্ভ হৈছে। আমেৰিকাৰ ৰাষ্ট্ৰপতি ডনাল্ড ট্ৰাম্পে সোমবাৰে জানিবলৈ দিয়ে যে ইৰাণৰ সৈতে দ্বিতীয় পৰ্যায়ৰ শান্তি বৈঠক কাটাৰৰ ৰাজধানী দোহাত অনুষ্ঠিত হ‘ব। মঙলবাৰে এই বৈঠক অনুষ্ঠিত হোৱাৰ কথা আছে। অৱশ্যে এই বৈঠকত আমেৰিকাৰ প্ৰতিনিধি হিচাপে কোন কোন উপস্থিত থাকিব, সেই কথা ট্ৰাম্পে স্পষ্ট কৰা নাই। ইয়াৰ পূৰ্বে ইৰাণে এই বৈঠকৰ সম্ভাৱনাক নুই কৰিছিল।
সোমবাৰে বিয়লি নিজৰ ছচিয়েল মিডিয়া প্লেটফৰ্ম ট্ৰুথ ছচিয়েলত ট্ৰাম্পে এই দ্বিতীয় পৰ্যায়ৰ বৈঠকৰ কথা ঘোষণা কৰে। তেওঁ লিখে যে ইৰাণে এখন বৈঠকৰ বাবে অনুৰোধ কৰিছিল আৰু সেই বৈঠক মঙলবাৰে অৰ্থাৎ ৩০ জুনত দোহাত অনুষ্ঠিত হ‘ব। পিছে সঁচাকৈয়ে এই বৈঠক অনুষ্ঠিত হ‘বনে নাই, তাক লৈ যথেষ্ট অনিশ্চয়তা আছে। ট্ৰাম্পৰ এই ঘোষণাৰ পূৰ্বে ইৰাণৰ উপ-বৈদেশিক মন্ত্ৰী কাজেম ঘৰিবাবাদীয়ে জানিবলৈ দিছিল যে এই সপ্তাহত কাটাৰত আমেৰিকাৰ প্ৰতিনিধিৰ সৈতে তেওঁলোকৰ কোনো বৈঠকৰ পৰিকল্পনা নাই।
যোৱা ২৮ ফেব্ৰুৱাৰীত ইৰাণৰ বিৰুদ্ধে আমেৰিকাই অপাৰেচন এপিক ফিউৰী আৰম্ভ কৰিছিল। পৰৱৰ্তী সময়ত এই যুদ্ধত ইজৰায়েলো জড়িত হৈ পৰে। ইয়াৰ প্ৰত্যুত্তৰত ইৰাণেও পশ্চিম এছিয়াত থকা আমেৰিকাৰ সামৰিক ঘাটিসমূহত আক্ৰমণ চলায়। ইয়াৰ ফলত পশ্চিম এছিয়াত তীব্ৰ অশান্তিৰ সৃষ্টি হয় আৰু হৰমুজ প্ৰণালীও অৱৰুদ্ধ হৈ পৰে। এমাহতকৈও অধিক সময় ধৰি যুদ্ধ চলাৰ পাছত কাটাৰ আৰু পাকিস্তানৰ মধ্যস্থতাত আমেৰিকা আৰু ইৰাণ দুয়োখন দেশেই যুদ্ধবিৰতিত সন্মত হয় আৰু শান্তি ঘূৰাই অনাৰ লক্ষ্যৰে আলোচনাত বহে।
যোৱা ১৭ জুনত যুদ্ধবিৰতিৰ চুক্তি স্বাক্ষৰ হোৱাৰ পাছত পৰিস্থিতি কিছু শান্ত হৈছিল যদিও যোৱা চাৰিদিনত আকৌ এবাৰ পশ্চিম এছিয়াত উত্তেজনা বিয়পি পৰে। যোৱা বৃহস্পতিবাৰে ওমান উপকূলৰ ওচৰত চিংগাপুৰৰ এখন জাহাজত আক্ৰমণ হয়। আমেৰিকাই দাবী কৰে যে ইৰাণে এই আক্ৰমণ চলাইছে, আনহাতে ইৰাণে এই অভিযোগ অস্বীকাৰ কৰি আমেৰিকাকহে দোষাৰোপ কৰে। ইয়াৰ পাছতে আমেৰিকাই ইৰাণৰ কেইবাখনো সামৰিক ঘাটিত বোমা পেলায় আৰু তাৰ প্ৰত্যুত্তৰত ইৰাণে কুৱেইট আৰু বাহৰেইনত থকা আমেৰিকাৰ ঘাটিত আক্ৰমণ কৰে। শনিবাৰলৈকে দুয়োপক্ষৰ মাজত গুলীয়াগুলী চলে। সামৰিক বিশেষজ্ঞসকলৰ মতে, দুয়োখন দেশেই যুদ্ধলৈ যাব নিবিচাৰে যদিও ইখনে সিখনৰ ওপৰত হেঁচা প্ৰয়োগ কৰিবলৈ চেষ্টা চলাই আছে। অৱশ্যে শেহতীয়া খবৰ অনুসৰি দুয়োখন দেশ পুনৰ যুদ্ধবিৰতিত সন্মত হৈছে।
এতিয়া আটাইতকৈ ডাঙৰ প্ৰশ্নটো হৈছে, নতুনকৈ সৃষ্টি হোৱা এই উত্তেজনাৰ মাজত দ্বিতীয় পৰ্যায়ৰ শান্তি বৈঠকখন সঁচাকৈয়ে অনুষ্ঠিত হ‘বনে? এই জল্পনা-কল্পনাৰ মাজতেই ট্ৰাম্পে বৈঠকৰ কথা সদৰী কৰিছে। বিশেষজ্ঞসকলৰ মতে, দুয়োখন দেশেই নিজকে বিজয়ী বুলি দাবী কৰিলেও তেওঁলোকে আলোচনা অব্যাহত ৰাখিব বিচাৰে। এতিয়া ট্ৰাম্পৰ দাবী অনুসৰি মঙলবাৰে দোহাত সঁচাকৈয়ে কোনো বৈঠক অনুষ্ঠিত হয় নে নহয়, সেয়াহে লক্ষণীয় হ‘ব।
