ভাৰতৰ অটোমোবাইল ৰিটেইল খণ্ডত উত্তৰ-পূৰ্বাঞ্চলৰ বাবে এক ডাঙৰ গৌৰৱৰ খবৰ। অৰুণাচল প্ৰদেশৰ আগশাৰীৰ মহিলা উদ্যোগী তথা ‘আইকনিক অটোমোবাইলছ’ৰ পৰিচালন সঞ্চালক পেমা ৱাই কে লয়ীক ‘ফেডাৰেচন অফ অটোমোবাইল ডিলাৰ্ছ এছোচিয়েশন’ৰ মহিলা শাখা ‘ৱমেন ইন ফাডা’ৰ অধ্যক্ষা হিচাপে নিযুক্ত হৈছে। সোমবাৰে নতুন দিল্লীত অনুষ্ঠিত ফাডাৰ ৬৩তম বাৰ্ষিক সাধাৰণ সভাত তেওঁক এই গুৰুত্বপূৰ্ণ দায়িত্ব অৰ্পণ কৰা হয়। উল্লেখযোগ্য যে, পূব আৰু উত্তৰ-পূৰ্ব ভাৰতৰ পৰা ‘ৱমেন ইন এফএডিএ’ৰ অধ্যক্ষা পদত অধিষ্ঠিত হোৱা পেমা ৱাই কে লয়ীয়েই হৈছে প্ৰথমগৰাকী মহিলা। ১৯৬৪ চনত প্ৰতিষ্ঠা হোৱা ফাডা হৈছে ভাৰতৰ অটোমোবাইল ৰিটেইল উদ্যোগৰ সৰ্বোচ্চ ৰাষ্ট্ৰীয় সংস্থা, যিয়ে সমগ্ৰ দেশৰ ১৫,০০০ৰো অধিক গাড়ী ডিলাৰশ্বিপক প্ৰতিনিধিত্ব কৰে।
অৰুণাচল প্ৰদেশৰ এগৰাকী সফল উদ্যোগী হিচাপে পেমা লয়ীয়ে ‘আইকনিক অটোমোবাইলছ’ক উত্তৰ-পূৰ্বৰ এক উল্লেখনীয় গাড়ী ডিলাৰশ্বিপলৈ ৰূপান্তৰিত কৰিছে। তেওঁৰ প্ৰতিষ্ঠানটোৱে অৰুণাচল প্ৰদেশত মহিন্দ্ৰা এণ্ড মহিন্দ্ৰা কোম্পানীৰ যাত্ৰীবাহী আৰু বাণিজ্যিক বাহনৰ অনুমোদিত ডিলাৰ হিচাপে কাম কৰি আহিছে। তেওঁৰ বলিষ্ঠ নেতৃত্বত ইটানগৰত স্থাপন কৰা আইকনিক অটোমোবাইলছৰ শ্ব’ৰুমটোৱে সমগ্ৰ ভাৰতৰ ভিতৰতে প্ৰথমখন “কেৱল মহিলাৰ দ্বাৰা পৰিচালিত” মহিন্দ্ৰা শ্বোৰুম হিচাপে স্বীকৃতি লাভ কৰিছে। পৰম্পৰাগতভাৱে পুৰুষৰ আধিপত্য থকা এই খণ্ডটোত মহিলাৰ অংশগ্ৰহণ বৃদ্ধি কৰাৰ ক্ষেত্ৰত এই পদক্ষেপে তেওঁৰ দূৰদৰ্শিতা প্ৰমাণ কৰে।
অটোমোবাইল উদ্যোগত মহিলাৰ সমস্যা আৰু সম্ভাৱনাৰ বিষয়ে পেমা লয়ীয়ে সদায় সক্ৰিয়ভাৱে কণ্ঠস্বর উত্থাপন কৰি আহিছে। ২০২৫ চনৰ ১৩তম ফাডা অটো ছামিটত তেওঁক “ৱমেন ইন এফএডিএ ড্ৰাইভেন বাই কাৰেজ” শীৰ্ষক এক বিশেষ অধিৱেশনলৈ আমন্ত্ৰণ জনোৱা হৈছিল, য’ত তেওঁ অটোমোবাইল ৰিটেইল খণ্ডত মহিলাৰ নেতৃত্ব আৰু নিজৰ অভিজ্ঞতাৰ বিষয়ে বক্তব্য আগবঢ়াইছিল। গত আগষ্ট মাহত নতুন দিল্লীত অনুষ্ঠিত নৱম ইটিঅটো ৰিটেইল ফ’ৰামত তেওঁক ‘ৱমেন ট্ৰেন্সফৰ্মিং অটো ৰিটেইল (ইষ্ট)’ বঁটাৰে সন্মানিত কৰা হৈছিল। ইয়াৰ পূৰ্বে ২০২৫ চনত বেংক অফ বৰোদায়ে নিজৰ প্ৰতিষ্ঠা দিৱসত তেওঁক উত্তৰ-পূৰ্বাঞ্চলৰ এগৰাকী আগশাৰীৰ মহিলা উদ্যোগী হিচাপে স্বীকৃতি দিছিল।
নতুন দায়িত্ব গ্ৰহণ কৰাৰ পাছত পেমা লয়ীয়ে জনাইছে যে অটোমোবাইল ডিলাৰশ্বিপৰ ক্ষেত্ৰখনত মহিলাৰ অংশগ্ৰহণ সুদৃঢ় কৰা তথা তেওঁলোকক নেতৃত্ব আৰু উদ্যোগী হিচাপে আগবাঢ়ি যোৱাৰ বাবে অধিক সুযোগ সৃষ্টি কৰাই হ’ব তেওঁৰ মূল লক্ষ্য। অৰুণাচল প্ৰদেশৰ এগৰাকী যুৱ উদ্যোগীৰ পৰা আৰম্ভ কৰি সমগ্ৰ ভাৰতৰ অটোমোবাইল ডিলাৰ সমাজৰ এক শীৰ্ষ নেতৃত্বৰ পদলৈ পেমা লয়ীৰ এই যাত্ৰাই ৰাষ্ট্ৰীয় প্ৰেক্ষাপটত উত্তৰ-পূৰ্বাঞ্চলৰ ক্ৰমবৰ্ধমান উত্থানকে প্ৰতিফলিত কৰিছে।
