জনজাতিকৰণ বিচাৰি থকা ছয় জনগোষ্ঠীকে ধৰি কোনো অসমীয়াই মোদী তথা বিজেপিৰ জালত ভৰি নিদিয়াত চিন্তিত হৈ পৰিছে দলটোৰ শীৰ্ষ নেতৃত্ব। গোপন সূত্ৰৰ খবৰ মতে লোকসভা নিৰ্বাচনৰ প্ৰাকমুহূৰ্তত অসম চুক্তিৰ ৬ নং দফাৰ কাৰ্য্যকৰীকৰণৰ ‘তৎপৰতা’ দেখুৱাই অসমীয়াৰ স্বাৰ্থ ৰক্ষকৰ যি ভাও দেখুৱাব খুজিছিল সেয়া সম্পূৰ্ণ ব্যৰ্থ হোৱাত দলটোৰ নিৰ্বাচনী অংকত আউল লাগিছে।
ইপিনে যোৱা প্ৰায় ৫ বছৰ সম্পূৰ্ণ ভেকো-ভাওনাৰে আভুৱা ভাঁৰি থকাৰ পিছত বিজেপি নেতৃত্বাধীন কেন্দ্ৰীয় চৰকাৰে জনজাতিকৰণ দাবী কৰি থকা ৬ জনগোষ্ঠীৰ দল-সংগঠনৰ নেতৃবৃন্দক যি নতুন টোপ আগ বঢ়াইছিল, তাৰ প্ৰতিও নেতৃবৃন্দই কোনো সঁহাৰি নিদিয়াত হতাশ হৈছে দলটোৰ কেন্দ্ৰীয় আৰু ৰাজ্যিক নেতৃত্ব।
ইয়াৰ মাজতে অসমৰ বিজেপি মন্ত্ৰী হিমন্তই ৰাইজক এইকেইটা কামৰ জৰিয়তে মোদীয়ে অসমক ‘মহান উপহাৰ দিলে’ ধৰণৰ প্ৰচাৰ কৰি নিজকে হাঁহিয়াতৰ পাত্ৰ কৰি তুলিছে অসমৰ জনগণৰ দৃষ্টিত। অথচ আজি সকলো অসমীয়াই দেখিলে যে অসম চুক্তিৰ বাবে ততাতৈয়াকৈ বিজেপিৰ কেন্দ্ৰীয় চৰকাৰে এখন কমিটী ঘোষণা কৰিছিল যদিও সেয়া বাস্তৱতে ধোঁৱাৰ লগত মিলি গ’ল। কেন্দ্ৰীয় চৰকাৰৰ দ্বাৰা মনোনীত আছুৰ প্ৰতিনিধি, সাহিত্য সভাৰ প্ৰাক্তন সভাপতি ৰংবং তেৰাং, নগেন শইকীয়া, ধীৰেন্দ্ৰ নাথ বেজবৰুৱাই কমিটীখনত নাথাকো বুলি পোনচাতেই নাকচ কৰি দিয়াৰ পিছত ইয়াৰ অধ্যক্ষ হিচাপে মনোনীত কৰা মদন প্ৰসাদ বেজবৰুৱায়ো পদত্যাগ কৰাত, কমিটীখনৰে অস্তিত্ব নোহোৱা হয়।
আনহাতে ৬ জনগোষ্ঠীৰ জনজাতিকৰণৰ বাবে দৰাচলতে একোৱেই কাম আগ বঢ়া নাই। জনজাতিৰ বাবে থকা ৰাষ্ট্ৰীয় আয়োগ (National Commission for Scheduled Tribes)ৰ অনুমোদনৰ ভিত্তিত কেন্দ্ৰীয় কেবিনেটে ছয় জনগোষ্ঠীৰ জনজাতিকৰণত অনুমোদন দিলেও সেয়া যথেষ্টতো নহয়ে, একোৱেই নহয়। এয়া মাথো এটা প্ৰস্তাৱ আৰু সমৰ্থনহে। ইয়াৰ বাবে যোৱা ৯ জানুৱাৰিত ৰাজ্যসভাত বিধেয়ক উত্থাপন কৰা হৈছিল যদিও সেয়া কিমান বাস্তৱিক সন্দেহ আছে। কাৰণ বিধেয়ক উত্থাপন কৰিও ১২ জানুৱাৰিত কেন্দ্ৰীয় গৃহ মন্ত্ৰীৰ সৈতে অসমৰ মুখ্য মন্ত্ৰী, বিত্ত মন্ত্ৰী আৰু বি পি এফৰ শীৰ্ষ নেতা হাগ্ৰামা আৰু সাংসদ বিশ্বজিত দৈমাৰী, বিপিএফৰ মন্ত্ৰী চন্দন ব্ৰহ্মৰ বৈঠকত এইটোহ সিদ্ধান্ত কৰা হ’ল যে অসমৰ একাংশ মন্ত্ৰীক লৈ ৬ জনগোষ্ঠীৰ জনজাতিকৰণৰ বিষয়টো চালিজাৰি চাবলৈ এখন উচ্চ স্তৰীয় কমিটী গঠন কৰা হ’ব। বিভিন্ন দিশ চালিজাৰি চোৱাৰ বাবে কমিটী গঠন কৰিবলৈ বাকী আছে যদি বিধেয়ক কেনেকৈ উত্থাপন কৰিলে বুলি প্ৰশ্নৰ তুলিছে বিভিন্ন পক্ষই।
মন কৰিব লগীয়া যে ২০১৪ চনৰ বিগত লোকসভাৰ নিৰ্বাচনৰ প্ৰচাৰসভাত মোদীয়ে কেন্দ্ৰত বিজেপি শাসনলৈ অহাৰ ছমাহৰ ভিতৰত জনগোষ্ঠীকেইটাৰ জনজাতিকৰণৰ ব্যৱস্থা গ্ৰহণ কৰা হ’ব বুলি প্ৰতিশ্ৰুতি দিছিল।
আনহাতে নিৰ্বাচন আহিলেই বিভিন্ন দাবীত আন্দোলন চলাই থকাসকলৰ বাবে কমিটী গঠন কৰি তেওঁলোকৰ পৰা সমৰ্থন আদায় কৰাটো বিজেপিৰ এটা পৰিচিত নিৰ্বাচনী কৌশল হৈ পৰা দেখা যায়। যোৱা ত্ৰিপুৰা বিধানসভা নিৰ্বাচনৰ সময়তো সুকীয়া তিপৰা ৰাজ্য দাবী কৰি থকা ইণ্ডেজেনাছ পীপলছ ফ্ৰণ্ট অব ত্ৰিপুৰাৰ লগত কেন্দ্ৰীয় চৰকাৰে আলোচনা কৰি এখন উচ্চস্তৰীয় কমিটী গঠন কৰাৰ প্ৰতিশ্ৰুতি দিছিল।
কিন্তু বিজেপিৰ এই কৌশল সম্পৰ্কে শেহতীয়াকৈ সজাগ হৈ পৰিছে জনগণ। “বিধেয়ক আনিলেই নহ’ব, বিধেয়কখন আইনত পৰিণত নোহোৱালৈকে ক্ষান্ত নাথাকো” বুলি ইতিমধ্যে স্পষ্ট কৰি দিছে ৬ জনগোষ্ঠীৰ প্ৰতিনিধি দল-সংগঠনবোৰে।
আনপিনে ৬ জনগোষ্ঠীক জনজাতিৰ মৰ্য্যাদা দিলে ৰাজ্যত দলটোৱে চৰকাৰ চলাই থকাৰ একমাত্ৰ ভৰসা বি পি এফৰ ৰোষত পৰাৰ সম্ভাৱনাই দেখা দিছে। গতিকে উভয় সংকটে চিন্তাত পেলাইছে দলৰ নেতৃত্বত। কাৰণ ইতিমধ্যে অগপই নাগৰিকত্ব সংশোধনী বিধেয়ক গৃহীত কৰাৰ প্ৰতিবাদত মিত্ৰতা ত্যাগ কৰি এখোজ সংকটলৈ ঠেলিয়েই থৈছে দলটোক।
