কেন্দ্ৰীয় গৃহমন্ত্ৰী অমিত শ্বাহে পুনৰবাৰ নিৰ্বাচনমুখী অসমত লক্ষ্য কৰি লৈছে কংগ্ৰেছক। দেওবাৰে তেওঁ গুৱাহাটীত অভিযোগ কৰে যে অসমত কংগ্ৰেছৰ শাসনকালত প্ৰতি বছৰে স্বাস্থ্য খণ্ডৰ বাজেটৰ পৰা প্ৰায় ১৫০ কোটি টকা আত্মসাৎ কৰা হৈছিল।
ইয়াৰ পূৰ্বে অমিত শ্বাহে অনুপ্ৰৱেশৰ বিষয়ত কংগ্ৰেছক লক্ষ্য কৰি লৈছিল। নিৰ্বাচনৰ দিন ঘোষণাৰ মাত্ৰ কেইঘণ্টামান পূৰ্বে দেওবাৰে কেন্দ্ৰীয় গৃহমন্ত্ৰী অমিত শ্বাহে পুনৰ চৰকাৰী অনুষ্ঠানত অনুপ্ৰৱেশৰ বিষয়টো উত্থাপন কৰে। তেওঁ অভিযোগ কৰে যে কংগ্ৰেছ দলে অনুপ্ৰৱেশকাৰীক বৈধ, আনুষ্ঠানিক আৰু স্বাভাৱিক কৰি তুলিছে।
দেওবাৰে অমিত শ্বাহে গুৱাহাটীত প্ৰায় ২০৯২ কোটি টকাৰ বিভিন্ন স্বাস্থ্য প্ৰকল্পৰ উদ্বোধন আৰু আধাৰশিলা স্থাপন কৰে। তেওঁ গুৱাহাটীত নৱনিৰ্মিত প্ৰাগজ্যোতিষপুৰ চিকিৎসা মহাবিদ্যালয় আৰু হাস্পাতাল উদ্বোধন কৰে। ইয়াৰ সমান্তৰালকৈ কংগ্ৰেছৰ দিনত স্বাস্থ্যখণ্ডতো ব্যাপক দুৰ্নীতি সংঘটিত হোৱাৰ অভিযোগ উত্থাপন কৰে।
কেন্দ্ৰীয় গৃহমন্ত্ৰীগৰাকীয়ে দাবী কৰে যে কংগ্ৰেছে প্ৰতি বছৰে অসমৰ স্বাস্থ্য বাজেটৰ পৰা ১৫০ কোটি টকা আত্মসাৎ কৰি আহিছে। তেওঁ দাবী কৰে যে ২০০১ চনৰ পৰা ২০১৬ চনলৈ কংগ্ৰেছৰ ক্ষমতাত থকা সময়ত অসমৰ স্বাস্থ্য ব্যৱস্থা সম্পূৰ্ণৰূপে ভাঙি পৰিছিল।
তেওঁ লগতে কংগ্ৰেছ চৰকাৰে জনসাধাৰণৰ স্বাস্থ্যসেৱা উন্নত কৰাৰ পৰিৱৰ্তে তেওঁলোকৰ নেতাৰ পৰিয়ালৰ আৰ্থিক স্বাৰ্থ চোৱাচিতা কৰাত অধিক ব্যস্ত বুলিও অভিযোগ উত্থাপন কৰে। কিন্তু যোৱা কেইবছৰমানৰ পৰা হিমন্ত বিশ্ব শৰ্মা নেতৃত্বাধীন চৰকাৰৰ দিনত অসমৰ স্বাস্থ্যৰ আন্তঃগাঁথনিৰ যথেষ্ট পৰিৱৰ্তন হৈছে। এতিয়া গ্ৰামাঞ্চল আৰু দুৰ্গম গাঁৱৰ বাসিন্দাসকলে লাভ কৰিছে উন্নত মানৰ চিকিৎসা।
একেৰাহে তৃতীয়বাৰৰ বাবে বিজেপিয়ে অসমত চৰকাৰ গঠন কৰিবলৈ ওলাইছে বুলিও নিশ্চিত অমিত শ্বাহ।
কেন্দ্ৰীয় গৃহমন্ত্ৰীগৰাকীৰ এই ভাষণৰ পিছতে বিভিন্ন মহলত বিষয়টোকলৈ সৰৱ চৰ্চা আৰম্ভ হৈছে। বিশেষকৈ কংগ্ৰেছৰ শাসনকালত প্ৰতি বছৰে স্বাস্থ্য খণ্ডৰ বাজেটৰ পৰা প্ৰায় ১৫০ কোটি টকা আত্মসাৎ কৰা হৈছিল বুলি কোৱা কথাটোত বিভিন্নজনে প্ৰতিক্ৰিয়া প্ৰকাশ কৰিছে।
উল্লেখ্য অসমত কংগ্ৰেছ শাসনত থকা সময়ছোৱাত হিমন্ত বিশ্ব শৰ্মা ৮ বছৰ কাল স্বাস্থ্যমন্ত্ৰী হিচাপে কাৰ্যনিৰ্বাহ কৰিছিল। ২০০৬ চনৰ পৰা ২০১৪ চনলৈ হিমন্ত বিশ্ব শৰ্মা অসমৰ স্বাস্থ্যমন্ত্ৰী আছিল।
বিভিন্ন সচেতন মহলৰ প্ৰশ্নটো হৈছে অমিত শ্বাহে কোৱা দৰে যদি কংগ্ৰেছে বছৰি ১৫০ কোটি আত্মসাৎ কৰিছে তেন্তে নিজৰ ৮ বছৰীয় কাৰ্যকালত হিমন্ত বিশ্ব শৰ্মাও সেই দুৰ্নীতিৰ অংশীদাৰ আছিল। সেইমতে, হিমন্ত বিশ্ব শৰ্মাৰ স্বাস্থ্যমন্ত্ৰী থকা কালত ১২০০ কোটি টকাৰ দুৰ্নীতি সংঘটিত হৈছিল।
কংগ্ৰেছৰ দুৰ্নীতি উদঙাবলৈ গৈ এইদৰে অমিত শ্বাহে মুখ্যমন্ত্ৰী হিমন্ত বিশ্ব শৰ্মাৰ দুৰ্নীতিকে উদঙালে বুলিও সৰৱ চৰ্চা চলিছে।
