সমগ্ৰ বিশ্বব্যাপী বিভীষিকাৰ সৃষ্টি কৰা ক’ৰ’না ভাইৰাছৰ সংক্ৰমণৰ পৰা জনগনক ৰক্ষা কৰাৰ লক্ষ্যৰে প্ৰধানমন্ত্ৰী নৰেন্দ্ৰ মোডীয়ে ঘোষণা কৰা ল’কডাউনত জনগণৰ সুবিধাৰ্থে গ্ৰাহক ৰাইজে ৰন্ধন গেচ ঘৰতে বহি হোৱাটছএপৰ জৰিয়তে বুকিং কৰিব পাৰিব বুলি চৰকাৰে ঘোষণা কৰাৰ লগতে স্থানীয় এজেঞ্চীৰ জৰিয়তেও গেচ বুকিং অব্যাহত থকা বুলি গ্ৰাহক ৰাইজে জানিব পাৰিছিল।
লক্ষণীয়ভাৱে, ল’কডাউনৰ বাবে ঘৰতে আৱদ্ধ গ্ৰাহক ৰাইজে ৰন্ধন গেচ বুকিঙৰ নামত নগুৰ-নাকতি খাবলগীয়া হৈছে। আই ও চিৰ তৰফৰ পৰা ৭৫৮৮৮৮৮৮২৪ নম্বৰত ৰন্ধন গেচ গ্ৰাহক সকলক নিজৰ পঞ্জীয়নভূক্ত মোবাইল নম্বৰৰ জৰিয়তে কেৱল ৰিফিল ( REFILL ) লিখি ৱাটছএপ কৰিব লাগে বুলি নিৰ্দেশনা জাৰি কৰিছিল।
কিন্তু একাংশ গ্ৰাহকৰ বাবে এয়া আকাশত চাং পতা কথা হিচাপে বিবেচিত হৈছে কাৰণ দহ-এঘাৰ বাৰ হোৱাটছএপত ৰিফিল বুলি বাৰ্তা প্ৰেৰণ কৰাৰ পিছতো গেছ বুকিং নহয়। তাৰ পৰিৱৰ্তে আপোনাৰ তথ্য মিলা নাই, আপোনাৰ বুকিং হোৱা নাই ওচৰৰ ডিলাৰৰ লগত যোগাযোগ কৰক ইত্যাদি বিভিন্ন উত্তৰ আহে।
তাৎপৰ্যপূৰ্ণ কথা এয়ে যে, অসংখ্য গেছ গ্ৰাহকৰ হোৱাটছএপ একাউণ্ট খুলিবলৈ স্মাৰ্ট ফোন নায়। তেনেস্থলত একাংশ গ্ৰাহকৰ বাবে ৱাটছএপৰ জৰিয়তে গেছ বুকিং কৰাটো অসম্ভৱ হৈ পৰিছে।
আনহাতে, কোকৰাঝাৰ চহৰত অৱস্থিত কোকৰাঝাৰ কো-অপাৰেটিভ ইণ্ডেন নামৰ গেছ এজেঞ্চি টোত ৰন্ধন গেছৰ গ্ৰাহকৰ সুবিধাৰ্থে গেছ বুকিংৰ বাবে ০৩৬৬১২৭০৬২৭ আৰু আন বিষয়ক তথ্য পাবলৈ ০৩৬৬১২৭০২০৪ নম্বৰ দুটা এজেঞ্চিৰ টোত ফালৰ পৰা দিয়া হৈছে যদিও ৰহস্যজনক ভাৱে উক্ত নম্বৰ দুটাৰ সৈতে কোনো গ্ৰাহক ৰাইজে যোগাযোগ স্থাপন কৰিব পৰা নায়।
তাৰোপৰি, স্বাভাৱিক সময়ত উক্ত গেছ এজেঞ্চীটোত গেছ বিতৰণক লৈ এনে এক পৰিস্থিতিৰ উদ্ভৱ হয় যে সাধাৰণ ভদ্ৰ মহিলা বা পুৰুষ গ্ৰাহকে গৈ গেছৰ কুপন কাটিব নোৱাৰে।
কাৰ্যালটোৰ একাংশ কৰ্মচাৰীৰ সৈতে গোপন বুজাবুজি থকা একাংশ মহিলা দালালে এজেঞ্চিটোৰ সন্মুখত ৰাতিপুৱা চাৰি/পাঁচ বজাৰ পৰা শাৰী পাতি এনেকুৱা পৰিস্থিতিৰ সৃষ্টি কৰে যে মহিলাৰ মাজত চুলিয়াচুলি-মাৰপিট, উচ্চ স্বৰত তৰ্ক-বিতৰ্কৰে উক্ত ঠাইডোখৰ প্ৰায়ে উওপ্ত হৈ থকাটো কোকৰাঝাৰ বাসীৰ বাবে লজ্জাজনক হৈ পৰিছে।
এইক্ষেত্ৰত বিভিন্ন মহলে অভিযোগ কৰা মতে, মহিলা দালাল সকলে গেছৰ কূপন কাটি দিয়াৰ বিনিময়ত গ্ৰাহকৰ পৰা দুশ টকাৰ পৰা তিনিশ টকা পৰ্যন্ত আদায় লয়।
গ্ৰাহক সকলে গেছ পাবলৈ উক্ত দালালসকলৰ আশ্ৰয় নিবিচাৰিলে ৰন্ধন গেচৰ চিলিণ্ডাৰ লাভ কৰাৰ অন্য বিকল্প নোহোৱা হৈ পৰে।
সেয়ে, শীঘ্ৰে গ্ৰাহক ৰাইজে উৰ্দ্ধতন কৰ্তৃপক্ষক আৰু জিলা উপায়ুক্তক এজেঞ্চিটোৰ বিৰুদ্ধে উত্থাপন হোৱা উক্ত অভিযোগ বোৰৰ উচিত তদন্ত কৰি বিহিত ব্যৱস্থা গ্ৰহণ কৰাৰ বাবে আহ্বান জনাইছে।
