“অগপৰ কোন মন্ত্ৰী বা বিষয়ববীয়াই জনস্বাৰ্থবিৰোধী কিবা কাম কৰিছে তাৰ বিচাৰ ৰাইজে কৰিব। গণতন্ত্ৰত ৰাইজেই ৰজা”। আজি শিৱসাগৰৰ আৱৰ্ত ভৱনত আয়োজিত এক সংবাদ মেলত এই কথা ব্যক্ত কৰে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই।
নিজ দলৰ সতীৰ্থৰ কথা উল্লেখ কৰি প্ৰাক্তন মুখ্য মন্ত্ৰীজনে কয়, কা-বিৰোধী আন্দোলনত শ্বহীদ হোৱা ৬ জন যুৱকৰ মৃত্যুৰ বাবে বিজেপি যিমান দায়ী বহুতে অগপকো দায়ী কৰিব বিচাৰিছে। কিন্তু ইয়াৰ বাবে এজিপিৰ সকলো বিষয়ববীয়া সদস্য দায়ী নহয়। যিসকলে চৰকাৰৰ অংশীদাৰ হৈ কা সমৰ্থন কৰিছে, সেইকেইজনহে দায়ী বুলি মন্তব্য কৰে প্ৰফুল্ল কুমাৰ মহন্তই। তেওঁ লগতে কয়, অসমৰ ৰাইজে সময়ত ইয়াৰ বিচাৰ কৰিব।
সংবাদমেলত মহন্তই কয়, অগপই ৰাজনৈতিকভাৱে নাগৰিকত্ব সংশোধনী আইনৰ বিৰোধিতা কৰি আহিছে আৰু বিৰোধিতা কৰি থাকিব।
তেওঁ কয়, এই আইনে অসম চুক্তি লাঘৱ কৰিব। যিখন ৰাজ্যত দুটাতকৈ বেছি সন্তান থাকিলে পঞ্চায়ত নিৰ্বাচনত প্ৰতিদ্বন্দ্বিতা কৰিব নোৱাৰে সেই ৰাজ্যত মুছলমানৰ জনসংখ্যা বৃদ্ধি পোৱাৰ বাবে আন দেশৰ পৰা হিন্দু শৰণাৰ্থী আনি নাগৰিকত্ব দিব বিচৰা হৈছে। নাগৰিকত্ব লাভ কৰাৰ লগেলগেই এইসকল বিদেশীয়ে ৰাজনৈতিক আৰু আইনগত সুবিধা লাভ কৰিব, যাৰবাবে স্থানীয় খলুৱা জনগণৰ অধিকাৰ খৰ্ব হ’ব আৰু অসম চুক্তি খৰ্ব হ’ব।
সেইবাবে অসমৰ সকলো জাতি-ধৰ্ম-নিৰ্বিশেষে সকলো জাতি-জনগোষ্ঠীয় দল-সংগঠনৰ লগতে ৰাজনৈতিক দলসমূহে এই ক’লা আইনৰ বিৰোধিতা কৰিব লাগে বুলি মন্তব্য কৰে প্ৰাক্তন মুখ্য মন্ত্ৰীজনে।
আনহাতে সদ্যপ্ৰয়াত অসম বিধান সভাৰ প্ৰাক্তন অধ্যক্ষ প্ৰণৱ কুমাৰ গগৈৰ আদ্য শ্ৰাদ্ধত উপস্থিত হৈ প্ৰয়াত নেতাগৰাকীক শ্ৰদ্ধা নিবেদন কৰাৰ লগতে পৰিয়ালৰ লোকক সাক্ষাৎ কৰি সমবেদনা জ্ঞাপন কৰে প্ৰাক্তন মুখ্য মন্ত্ৰী মহন্তই।
