‘No Road No Vote, No Electricity No Vote’ ধ্বনিৰে উত্তাল হৈ পৰিছে অসম-মেঘালয় সীমান্তত থকা থাণ্টী পাৰা নামৰ গাঁওখন।
দ্বিতীয় পৰ্যায়ৰ নিৰ্বাচনৰ প্ৰচাৰ তীব্ৰ গতিত চলি থকা সময়তে অসম-মেঘালয় সীমান্তৰ থাণ্টী পাৰা নামৰ গাঁওখনৰ ৰাইজে ভোট বৰ্জনৰ হুংকাৰ প্ৰদান কৰাৰ লগতে মেঘালয়ত চামিল হোৱাৰো ভাবুকি প্ৰদান কৰিছে।
উল্লেখযোগ্য যে স্বাধীনতাৰ পিছৰে পৰা বহু চৰকাৰ আহিল আৰু গ’ল কিন্তু অসম-মেঘালয় সীমান্তৰ থাণ্টী পাৰা গাঁওখনত বৰ্তমানলৈকে কোনো ধৰণৰ উন্নয়ন নহ’ল।
প্ৰায় ১৫০ টা পৰিয়লে বসবাস কৰা গাঁওখনৰ লোকসকলে বৰ্তমানো আদিম মানৱৰ দৰে জীৱন যাপন কৰিব লগা হৈছে। গাঁওখনলৈ যোৱাৰ বাবে নাই এটাও উপযুক্ত পথ তাৰোপৰি গাঁওখনৰ লোকসকলে নিজৰাৰ পানীকে খাই জীৱন নিৰ্বাহ কৰিব লগীয়া হৈছে।
মন কৰিব লগীয়া যে অঞ্চলটোত নাই কোনো স্বাস্থ্যকেন্দ্ৰ, তাৰোপৰি একমাত্ৰ প্ৰাথমিক বিদ্যালয়খনৰ বাহিৰে শিক্ষা গ্ৰহণৰ বাবে ৬ কিলোমিটাৰ পাহাৰী পথ অতিক্ৰম কৰি পুনৰ ২০/২৫ কিলোমিটাৰ আঁতৰত কৃষ্ণাই অথবা গোৱালপাৰালৈ আহিব লাগে।
আনহাতে এই সন্দৰ্ভত দীৰ্ঘদিনৰে পৰা স্থানীয় ৰাইজে জিলা প্ৰশাসন তথা চৰকাৰৰ ওচৰত আবেদন নিবেদন কৰি আহিছে যদিও চৰকাৰে তথা প্ৰশাসনে এই ক্ষেত্ৰত এতিয়ালৈকে কোনো ধৰণৰ গুৰুত্ব প্ৰদান নকৰিলে। ফলত ক্ষোভিত গাঁওবাসীয়ে এইবাৰ পঞ্চায়ত নিৰ্বাচন বৰ্জন কৰাৰ হুংকাৰ প্ৰদান কৰিছে।
ইফালে অসম চৰকাৰৰ অমনোযোগিতাৰ সুযোগ গ্ৰহণ কৰি মেঘালয় চৰকাৰে থাণ্টী পাহাৰবালীক বিদ্যুৎ, চিকিৎসাৰ পৰা ধৰি সকলো সা-সুবিধা প্ৰদান কৰাৰ আশ্বাস প্ৰদান কৰিছে।
গতিকে অসম চৰকাৰৰ অমনোযোগিতাৰ বিপৰীতে মেঘালয় চৰকাৰৰ সেউজ সংকেত লাভ কৰি অঞ্চলটোৰ লোকসকলে মেঘালয়ত চামিল হোৱাৰ ভাবুকি প্ৰদান কৰিছে।