চাকৰিয়ালসকলৰ বাবে এটা অতি ভাল খবৰ। এতিয়াৰে পৰা কোনো কাগজ-পত্ৰ বা অনুমোদনৰ বাবে অপেক্ষা কৰিব নালাগে। অতি সোনকালেই গ্ৰাহকসকলে ইউপিআই এপ আৰু ইপিএফৰ সৈতে সংলগ্ন এটিএমৰ জৰিয়তে পোনে পোনে নিজৰ প্ৰভিডেন্ট ফাণ্ডৰ ধন উলিয়াব পাৰিব। কৰ্মচাৰী ভৱিষ্যনিধি সংগঠন বা ইপিএফঅ’ৰ নতুন ডিজিটেল প্লেটফৰ্ম ইপিএফঅ’ ৩.০ ৰ জৰিয়তে এই সুবিধা আৰম্ভ হ’ব। জুন মাহৰ শেষৰ ফালে এই নতুন সেৱাৰ আনুষ্ঠানিক আৰম্ভণি হোৱাৰ সম্ভাৱনা আছে। ইতিমধ্যে নেচনেল পেমেণ্টছ কৰ্প’ৰেচন অৱ ইণ্ডিয়াৰ সহযোগত এই ব্যৱস্থাৰ পৰীক্ষামূলক কাম সম্পূৰ্ণ হৈছে। কেন্দ্ৰীয় শ্ৰম মন্ত্ৰী মনসুখ মাণ্ডৱিয়াই জানিবলৈ দিছে যে অতি সোনকালেই এই বিষয়ে আনুষ্ঠানিক ঘোষণা কৰা হ’ব।
বৰ্তমান পিএফৰ ধন উলিয়াবলৈ প্ৰথমে আবেদন কৰিব লাগে আৰু অনুমোদনৰ বাবে বহু সময় অপেক্ষা কৰিব লাগে। নতুন ব্যৱস্থাত এই প্ৰক্ৰিয়া বহুত সহজ হৈ পৰিব। নতুন নিয়ম অনুসৰি, গ্ৰাহকসকলে তেওঁলোকৰ জমা থকা পিএফৰ ধনৰ সৰ্বোচ্চ ৭৫ শতাংশলৈকে লগে লগে নিজৰ বেংক একাউণ্টলৈ ট্ৰেন্সফাৰ কৰিব পাৰিব। ইউপিআই প্লেটফৰ্মৰ লগতে ইপিএফ-লিংক থকা এটিএমৰ পৰাও এই সুবিধা লাভ কৰিব। অৱশ্যে বাকী থকা অতি কমেও ২৫ শতাংশ ধন ভৱিষ্যতৰ সঞ্চয় হিচাপে একাউণ্টত ৰাখিব লাগিব।
এই নতুন ডিজিটেল ব্যৱস্থাৰ আন এটা গুৰুত্বপূৰ্ণ পৰিৱৰ্তন হৈছে স্বয়ংক্রিয় দাবী নিষ্পত্তিৰ সীমা বৃদ্ধি কৰা। আগতে একেলগে এক লাখ টকালৈকে উলিয়াব পৰা গৈছিল। এতিয়া সেই সীমা পাঁচ লাখ টকালৈ বৃদ্ধি কৰা হৈছে। ইয়াৰ ফলত জৰুৰী প্ৰয়োজনত গ্ৰাহকসকলে অতি সোনকালেই ধন লাভ কৰিবলৈ সক্ষম হ’ব।
পৰিচয় প্ৰমাণ কৰাৰ ক্ষেত্ৰতো নতুন ব্যৱস্থা অনা হৈছে। উমং এপৰ জৰিয়তে ফেচ অথেনটিকেচন প্ৰযুক্তি ব্যৱহাৰ কৰি সদস্যসকলে নিজৰ পৰিচয় নিশ্চিত কৰিব পাৰিব। ইয়াৰ ফলত বহুতো নথি-পত্ৰ জমা দিয়াৰ সমস্যা কমিব। ইয়াৰ উপৰিও অতি সোনকালেই ইউনিভাৰ্চেল একাউণ্ট নম্বৰ বা ইউএএন সক্ৰিয় কৰা, অনলাইনত পিএফ পাছবুক চোৱাৰ সুবিধা আৰু আধাৰৰ সৈতে সংযুক্ত তথ্য সলনি কৰা প্ৰক্ৰিয়া আৰু অধিক সহজ কৰি তোলা হ’ব।
বিশেষজ্ঞসকলৰ মতে, ইপিএফঅ’ ৩.০ য়ে দেশৰ বিত্তীয় সেৱাক অধিক দ্ৰুত, স্বচ্ছ আৰু গ্ৰাহকৰ সুবিধাৰ অনুকূলে গঢ়ি তুলিব। জৰুৰী অৱস্থাত পিএফৰ ধন সোনকালে ব্যৱহাৰ কৰাৰ সুবিধা বৃদ্ধি পোৱাৰ লগতে অৱসৰৰ সময়ৰ সঞ্চয় ব্যৱস্থাও আধুনিক ডিজিটেল আন্তঃগাঁথনিৰ সৈতে সুন্দৰকৈ জড়িত হৈ পৰিব। অৱশ্যে একে সময়তে সঞ্চিত ধনৰ নিৰাপত্তা নিশ্চিত কৰিবলৈ শক্তিশালী পৰীক্ষণ আৰু প্ৰতাৰণা ৰোধ কৰা ব্যৱস্থাৰ ওপৰতো বিশেষ গুৰুত্ব দিয়া হৈছে।
