ভাৰতৰ প্ৰধানমন্ত্ৰী নৰেন্দ্ৰ মোদীয়ে মঙলবাৰে ইটালীত উপস্থিত হোৱাৰ পিছতে ৰোমত এক বিশেষ কূটনৈতিক আৰু বন্ধুত্বপূৰ্ণ পৰিৱেশৰ সৃষ্টি হয়। ইটালীত উপস্থিত হোৱাৰ পিছত প্ৰধানমন্ত্ৰী মোদীক উষ্ম আদৰণি জনায় দেশখনৰ প্ৰধানমন্ত্ৰী জৰ্জিয়া মেলোনীয়ে। ইয়াৰ পিছতে দুই নেতাই একেলগে নৈশভোজ গ্ৰহণ কৰে আৰু ৰোমৰ ঐতিহাসিক কলচিয়াম ভ্ৰমণ কৰে।
প্ৰধানমন্ত্ৰী মেলোনীয়ে ছচিয়েল মিডিয়া প্লেটফৰ্ম এক্সত মোদীক মোৰ বন্ধু বুলি সম্বোধন কৰি এখন সুন্দৰ ছবি শ্বেয়াৰ কৰে। এই ছবিত পিছফালে পোহৰেৰে আলোকিত হৈ থকা ঐতিহাসিক কলচিয়াম দেখা গৈছে। এই ছবিখনে ইতিমধ্যে ইণ্টাৰনেটত লাখ লাখ ভিউজ আৰু হাজাৰ হাজাৰ লাইক লাভ কৰি সমগ্ৰ বিশ্বৰে দৃষ্টি আকৰ্ষণ কৰিছে।
প্ৰধানমন্ত্ৰী নৰেন্দ্ৰ মোদীয়েও এই ভ্ৰমণৰ চাৰিখন বিশেষ ছবি ছচিয়েল মিডিয়াত শ্বেয়াৰ কৰিছে। তেওঁ উল্লেখ কৰে যে মেলোনীৰ সৈতে নৈশভোজ আৰু কলচিয়াম ভ্ৰমণৰ সময়ত তেওঁলোকে বিভিন্ন গুৰুত্বপূৰ্ণ বিষয়ত আলোচনা কৰে। ভাৰত আৰু ইটালীৰ বন্ধুত্বক অধিক মজবুত কৰাৰ বাবে আগন্তুক বৈঠকত বিতংভাৱে আলোচনা কৰা হ’ব বুলিও তেওঁ আশা প্ৰকাশ কৰে।
উল্লেখ্য যে প্ৰধানমন্ত্ৰী মোদীৰ এইটো পাঁচখন দেশৰ ভ্ৰমণসূচীৰ অন্তিমটো পৰ্যায়। ইয়াৰ পূৰ্বে তেওঁ নৰৱে, ইউ এ ইউ, নেদাৰলেণ্ড আৰু চুইডেন ভ্ৰমণ কৰিছিল। ইটালীত থকাৰ সময়ছোৱাত তেওঁ ৰাষ্ট্ৰপতি চাৰ্জিঅ’ মাট্টাৰেল্লাকো সাক্ষাৎ কৰিব আৰু বুধবাৰে ভাৰতলৈ ৰাওনা হোৱাৰ পূৰ্বে অন্যান্য কূটনৈতিক কাৰ্যসূচীত অংশগ্ৰহণ কৰিব।
প্ৰধানমন্ত্ৰী মোদী আৰু জৰ্জিয়া মেলোনীৰ মাজৰ এই সুন্দৰ বন্ধুত্ব নতুন নহয়। ছচিয়েল মিডিয়াত তেওঁলোকৰ এই বন্ধুত্বক মেলোডী বুলি কোৱা হয় আৰু ই ব্যাপকভাৱে ভাইৰেল হৈ আহিছে। ইয়াৰ পূৰ্বে ২০২৪ চনৰ জুন মাহত অনুষ্ঠিত হোৱা জি-৭ সন্মিলনৰ সময়তো মেলোনীয়ে মোদীৰ সৈতে এটা ভিডিঅ’ আৰু চেলফি প’ষ্ট কৰিছিল, য’ত তেওঁ হেল্ল’ ফ্ৰম দ্য মেলোডী টিম বুলি কৈছিল। তাৰো এবছৰ আগতে অৰ্থাৎ ২০২৩ চনত ডুবাইত অনুষ্ঠিত চিঅ’পি-২৮ জলবায়ু সন্মিলনৰ সময়তো দুই নেতাৰ চেলফিয়ে ইণ্টাৰনেটত তোলপাৰ লগাইছিল। প্ৰতিখন বৈঠকৰে এই চেলফিবোৰে প্ৰমাণ কৰে যে ভাৰত আৰু ইটালীৰ এই দুই শীৰ্ষ নেতাৰ মাজত কিমান গভীৰ আৰু আন্তৰিক সম্পৰ্ক আছে।
