বিশ্বকাপ আৰম্ভ হোৱাৰ ঠিক আগমুহূৰ্তত ফিফাৰ বৰ্তমানৰ সভাপতি জিয়ানি ইনফান্তিনোৰ বিৰুদ্ধে এক গুৰুতৰ পদক্ষেপ গ্ৰহণ কৰিলে উয়েফাৰ প্ৰাক্তন সভাপতি মিচেল প্লাতিনিয়ে। তেওঁ ইনফান্তিনোকে ধৰি মুঠ পাঁচজন ফুটবল বিষয়াৰ বিৰুদ্ধে ফ্ৰান্সৰ আদালতত ফৌজদাৰী আৰু দেৱানী গোচৰ তৰিছে। প্ৰাক্তন কিংবদন্তি ফুটবল খেলুৱৈগৰাকীয়ে বৰ্তমানৰ ফিফা সভাপতিৰ বিৰুদ্ধে তেওঁক ২০১৬ চনত ফিফাৰ সভাপতি হ’বলৈ অনৈতিকভাৱে বাধা দিয়াৰ অভিযোগ উত্থাপন কৰিছে।
চেপ ব্লাটাৰৰ উত্তৰসূৰী হিচাপে প্লাতিনিকে ফিফাৰ সভাপতি পদৰ বাবে আটাইতকৈ উপযুক্ত বুলি গণ্য কৰা হৈছিল। কিন্তু সেই সময়তে ব্লাটাৰৰ সৈতে এক বিতৰ্কিত আৰ্থিক লেনদেনৰ সৈতে প্লাতিনিৰ নাম সাঙোৰ খাই পৰে আৰু তাৰ ফলস্বৰূপে তেওঁক ২০১৬ চনত ফিফাৰ সভাপতি হ’বলৈ বাধা দিয়া হয়। ২০১৫ চনত ফিফাৰ নৈতিক সমিতিৰ দ্বাৰা তেওঁক আঠ বছৰৰ বাবে নিষিদ্ধ কৰা হৈছিল যদিও পৰৱৰ্তী সময়ত ক্ৰীড়া আদালতৰ দ্বাৰা সেই শাস্তি চাৰি বছৰলৈ হ্ৰাস কৰা হয়। অৱশ্যে পিছলৈ ছুইজাৰলেণ্ডৰ আদালতে প্লাতিনি আৰু ব্লাটাৰ উভয়কে এই গোচৰত নিৰ্দোষ বুলি ঘোষণা কৰে।
এতিয়া সেই অতীতৰ তিক্ত অভিজ্ঞতাৰ বাবে যিসকল ব্যক্তিয়ে তেওঁৰ পথত হেঙাৰ হৈ থিয় দিছিল, তেওঁলোকৰ বিৰুদ্ধে প্লাতিনি আইনী যুঁজত নামিছে। সমগ্ৰ বিশ্বৰ দৃষ্টি এতিয়া বিশ্বকাপৰ ওপৰত নিবদ্ধ থকাৰ সময়তে প্লাতিনি আৰু তেওঁৰ অধিবক্তা অলিভিয়াৰ বালেতোলিয়ে এই গোচৰটো দাখিল কৰাৰ বাবে বিশেষভাৱে নিৰ্বাচন কৰিছে। অধিবক্তাগৰাকীৰ মতে, যিসকলে সেই সময়ত প্লাতিনিৰ ফিফা সভাপতি হোৱাৰ বাটত বাধা সৃষ্টি কৰিছিল, তেওঁলোকৰ বিৰুদ্ধেই এই গোচৰ তৰা হৈছে।
প্লাতিনি আৰু তেওঁৰ অধিবক্তাৰ দৃঢ় বিশ্বাস যে বৰ্তমানৰ ফিফা সভাপতি জিয়ানি ইনফান্তিনোৱেই সেই সময়ত তেওঁক বাধা দিয়াৰ আঁৰৰ মূল সূত্ৰধাৰ আছিল। সেয়েহে তেওঁৰ বিৰুদ্ধেই এই আইনী ব্যৱস্থা গ্ৰহণ কৰা হৈছে। প্লাতিনিৰ মতে, যদি সেই বাধা নাথাকিলহেঁতেন, তেন্তে তেওঁ অতি সহজেই ফিফাৰ সভাপতি হ’ব পাৰিলেহেঁতেন। অৱশ্যে এই গুৰুতৰ অভিযোগৰ প্ৰতি এতিয়ালৈকে জিয়ানি ইনফান্তিনোৱে কোনো ধৰণৰ প্ৰতিক্ৰিয়া প্ৰকাশ কৰা নাই।
