দেশৰ প্ৰধানমন্ত্ৰী নৰেন্দ্ৰ মোদীক মহামাৰী কৰোনাৰ ‘চুপাৰ সংক্ৰামক’ বুলি আখ্যা দিছে ইণ্ডিয়ান মেডিকেল এচ’ছিয়েশ্যন(IMA)ৰ উপ সভাপতি ডাঃ নৱজোৎ দাহিয়াই।
ৰাজ্যসমূহত বিশাল নিৰ্বাচনী ৰেলী আয়োজন আৰু গুৰুতৰ পৰিস্থিতিৰ সময়ত কুম্ভমেলাৰ অনুমতি দি কোভিড-১৯ৰ দ্বিতীয় ঢৌ বিয়পোৱাৰ বাবে মোদীক দায়িত্বহীন প্ৰধানমন্ত্ৰী বুলি আখ্যা দি দোষাৰোপ কৰিছে ডাঃ দাহিয়াই।
IMAৰ উপ-সভাপতি ডাঃ দাহিয়াই কয়, “চিকিৎসা সেৱাত জড়িত লোকসকলক বাধ্যতামূলকভাৱে কোভিড নিয়ম বুজাবলৈ ব্ৰতী থকা প্ৰধানমন্ত্ৰী মোডীয়ে নিজেই সকলো কোভিড প্ৰট’কল ভংগ কৰি বিশাল ৰাজনৈতিক ৰেলীবোৰ সম্বোধন কৰিবলৈ কুণ্ঠাবোধ কৰা নাছিল।”
তেওঁ লগতে অভিযোগ কৰি কয় যে, “মেডিকেল অক্সিজেনৰ অভাৱত দেশৰ প্ৰতিটো প্ৰান্ততে বহুতো ৰোগীৰ মৃত্যুৰ কাৰণ হৈ পৰিছে। অক্সিজেন প্লান্ট স্থাপনৰ বাবে কেইবাটাও প্ৰস্তাৱিত প্ৰকল্প এতিয়াও কেন্দ্ৰীয় চৰকাৰে অনুমোদন কৰা নাই। মোডী চৰকাৰে এনে গুৰুত্বপূৰ্ণ প্ৰয়োজনীয়তাৰ প্ৰতি কোনো গুৰুত্ব দিয়া নাছিল।”
দেশৰ শেহতীয়া কোভিড পৰিৱেশ বৰ্ণনা কৰি তেওঁ লগতে কয় যে সমগ্ৰ দেশতে এই মহামাৰীয়ে কালৰূপ ধাৰণ কৰিছে আৰু দেশৰ প্ৰায় প্ৰতিখন চহৰতে শ্মশানত মৃতদেহ জমা হৈছে। চিকিৎসালয়ৰ বাহিৰত এম্বুলেন্সৰ দীঘলীয়া শাৰী আছে।
ইফালে পাঁচ ৰাজ্যসহ পডুচেৰীৰ বিধানসভা নিৰ্বাচন আৰু কুম্ভমেলাৰ সন্দৰ্ভত মন্তব্য কৰি ডাঃ দাহিয়াই মোদী চৰকাৰে মাৰাত্মক ভাইৰাছৰ প্ৰতিৰোধ নকৰি ইয়াৰ দ্বাৰা দেশত কোভিড সংক্ৰমণ ঘটোৱা বুলিও বিস্ফোৰক অভিযোগ কৰে।
“আনকি কৃষি আইনৰ বিৰুদ্ধে কৃষকৰ আন্দোলনৰ ক্ষেত্ৰতো প্ৰধানমন্ত্ৰী নৰেন্দ্ৰ মোদীয়ে দায়িত্বশীলভাৱে কাম কৰা নাছিল আৰু কৃষকসকলৰ সমস্যা সমাধানত গুৰুত্ব নিদি বিশাল সমাৱেশৰ অনুমতি দি দেশত কোভিড সংক্ৰমণৰ পৰিৱেশৰ সূচনা কৰিছিল।” ডাঃ দাহিয়াই লগতে আৰু কয়।
