খালি ভৰিৰে মাতৃৰ মৃতদেহ কান্ধত তুলি শ্মশানলৈ নিলে প্ৰধানমন্ত্ৰী মোডীয়ে; কৰিলে মুখাগ্নি

PM Modi performs last rites of his mother প্ৰধানমন্ত্ৰী নৰেন্দ্ৰ মোদীয়ে তেওঁৰ মাতৃৰ মৃতদেহ খালি ভৰিৰে কান্ধত লৈ শ্মশানলৈ নিয়ে। প্ৰধানমন্ত্ৰীয়ে পৃথিৱীৰ নিয়ম অনুসৰি ইহজগতৰ পৰা বিদায় লোৱা মাতৃৰ মৃতদেহ গান্ধীনগৰৰ শ্মশানত মুখাগ্নি কৰি জ্বলাই দিয়ে।

প্ৰধানমন্ত্ৰীৰ মাতৃ হীৰাবেনক বুধবাৰে আহমেদাবাদৰ ইউ এন মেহতা ইনষ্টিটিউট অৱ কাৰ্ডিঅ’লজী এণ্ড ৰিচাৰ্ছ চেণ্টাৰত ভৰ্তি কৰোৱা হৈছিল। বৃহস্পতিবাৰে আবেলিও তেওঁৰ শাৰীৰিক অৱস্থা উন্নত হোৱাৰ খবৰ পোৱা গৈছিল। আনকি চিকিৎসালয়ৰ পৰা অব্যাহতি পোৱাৰ কথাও আলোচনা হৈছিল।

লগতে পঢ়ক: ১০০ বছৰত প্ৰয়াত হীৰাবেন মোদী; মাতৃহাৰা হ’ল প্ৰধানমন্ত্ৰী নৰেন্দ্ৰ মোদী

চিকিৎসালয়খনে ইয়াৰ চিকিৎসা বুলেটিনত শুকুৰবাৰে পুৱা ৩.৩০ বজাত মোডীৰ মাতৃয়ে শেষ নিশ্বাস ত্যাগ কৰাৰ কথা সদৰী কৰে।

মাতৃৰ মৃত্যুৰ খবৰ পোৱাৰ পিছতে মোডী দিল্লীৰ পৰা আহমেদাবাদ বিমানবন্দৰলৈ আহে। তাৰ পিছত তেওঁ পোনপটীয়াকৈ তেওঁৰ সৰু ভায়েক পংকজৰ ঘৰলৈ যায়। মোডীৰ মাকৰ মৃতদেহ তাত ৰখা হৈছিল। প্ৰধানমন্ত্ৰীয়ে চৰণত প্ৰণাম কৰি ফুলেৰে মাকক শেষ শ্ৰদ্ধা জনায়। তাৰ পিছতে তেওঁ তেওঁৰ ভাতৃসকলৰ সৈতে মাকৰ মৃতদেহটো কান্ধত লৈ শ্মশানলৈ যায়।

প্ৰধানমন্ত্ৰীৰ মাতৃৰ মৃতদেহ গান্ধীনগৰৰ শ্মশানলৈ অনা হয়। হিন্দু শাস্ত্ৰ অনুসৰি, প্ৰধানমন্ত্ৰীৰ মাতৃৰ অন্ত্যেষ্টিক্ৰিয়া সকলো নিয়ম আৰু ৰীতি-নীতি অনুসৰি সম্পন্ন কৰা হয়। মোডীয়ে তেওঁৰ মাতৃৰ মুখাগ্নি কৰে। জুই জ্বলাৰ পিছতো মোডী চিতাৰ সন্মুখত থিয় হৈ আছিল। চকুৰে বৈ আহিব খোজা চকুপানী খিনি বৰ কষ্টেৰে ধৰি ৰাখিছিল।

লগতে পঢ়ক:ভয়ংকৰ পথ দুৰ্ঘটনাত গুৰুতৰভাৱে আহত ক্ৰিকেটাৰ ঋষভ পন্ট; হাস্পাতালত ভৰ্তি

জানিব পৰা মতে, মোডী বৰ্তমান গান্ধীনগৰতে থাকিব। তেওঁৰ পৰিয়ালেও সকলোকে তেওঁলোকৰ নিৰ্ধাৰিত পৰিকল্পনা অনুসৰি কাম কৰিবলৈ আৰু প্ৰধানমন্ত্ৰীৰ মাতৃক শ্ৰদ্ধাঞ্জলি জনোৱাৰ বাবে আহ্বান জনাইছে। আজি মোডীয়ে গুজৰাটৰ পৰা ভাৰ্চুৱেলি কলকাতাত কেইবাটাও প্ৰকল্প উদ্বোধন কৰিব।