স্বাধীনতা দিৱস উপলক্ষে দিল্লীৰ লালকিল্লাৰ পৰা দেশবাসীক উদ্দেশ্যি দিয়া ভাষণত প্ৰধান মন্ত্ৰী মোদীয়ে কৰ’নাৰ ভেকচিনক লৈ চলি থকা কামকাজৰ কথা সদৰী কৰে।
অৱশ্যে প্ৰধান মন্ত্ৰীয়ে কেতিয়ালৈ কৰ’নাৰ ভেকচিন ওলাব সেই কথা কোৱা নাই।
তেওঁ কয় যে বিজ্ঞানীসকলে যৎপৰোনাস্তি চেষ্টা কৰিছে। ভেকচিন বজাৰলৈ আহিলেই সেয়া সাধাৰণ লোকৰ কাষলৈ যাতে ক্ষিপ্ৰতাৰে গৈ পায় তাক নিশ্চিত কৰিবলৈ চৰকাৰ প্ৰস্তুত হৈ আছে।
তেওঁ কয়, ঋষি-মুনিসকলৰ দৰে সাধনাৰে বিজ্ঞানীসকলে ভেকচিন প্ৰস্তুত কৰিছে। বিভিন্ন পৰ্যায়ত তিনিটাকৈ ভেকচিনৰ কাম চলি থকা বুলি তেওঁ জানিবলৈ দিয়ে।
বিজ্ঞানীসকলে কাম সম্পন্ন হোৱাৰ কথা জনালেই সেয়া মানুহৰ কাষলৈ লৈ যোৱা হ’ব আৰু দেশৰ সকলো মানুহৰ কাষলৈ ক্ষিপ্ৰভাৱে সেয়া নিয়াৰ ৰূপৰেখা ইতিমধ্যে প্ৰস্তুত কৰা হৈছে।
ইপিনে, নীতি আয়োগৰ সদস্য তথা স্বাস্থ্য সচিবৰ নেতৃত্বত কমিটিয়ে কৰ’না ভেকচিনক লৈ আলোচনা কৰিছে। কোনটো ভেকচিন লোৱা হ’ব আৰু সেইটো কেনেকৈ দেশবাসীৰ মাজত বিতৰণ কৰা হ’ব সেই সকলোবোৰ ঠিকঠাক কৰা হৈছে।
প্ৰধান মন্ত্ৰী মোদীয়ে ইয়াকেই আজি তেওঁৰ ভাষণত উল্লেখ কৰে আৰু এতিয়া মাথো ভেকচিনৰ অপেক্ষাত থকাৰ কথা জানিবলৈ দিয়ে।
উল্লেখ্য যে আইচিএমআৰে ১৫ আগষ্টৰ ভিতৰত ভেকচিন প্ৰস্তুত কৰি তোলাৰ লক্ষ্য বান্ধি লৈছিল যদিও সেয়া সফল নহ’ল।
